?Oli Save Harem Olsem Wanem Sipos Yumi No Gobak Blong Luk Olgeta?
1 ‘?Sipos man i no go talemaot nyus blong God, bambae ol man oli save harem nyus ya olsem wanem?’ (Rom 10:14). Yes, ?olsem wanem oli save kasem mining blong trutok sipos yumi no mekem ol gudfala visit bakegen? Yumi mas visitim bakegen evri man we i bin soem se hem i glad blong tokbaot Kingdom wetem yumi. Long manis ya, maet yumi save gohed long storeyan blong yumi we yumi mekem bifo, mo ademap sam poen blong Baebol we oli stap long buklet we yumi bin livim wetem hem; samting ya i save mekem se bambae yumi statem wan Baebol stadi.
2 Sipos yumi bin livim buklet ya “What Is the Purpose of Life?—How Can You Find It?”, maet yumi save statem wan storeyan we i save lidim yumi i go long wan Baebol stadi. Yumi save askem, taem yumi soem fored blong buklet se:
◼ “?Yu yu laekem blong laef long wan wol we yu mo famle blong yu, yufala i save haremgud long wan fyuja we yufala i stap sefgud? [Letem man i ansa, afta tokbaot ol poen long pej 29 mo 30.] Yumi evriwan i wantem olsem, nating se plante man oli no ting se samting ya bambae i kamaot wan dei. God i promes blong mekem drim ya i kam wan samting we i tru, mo i no hadwok tumas long hem blong mekem samting ya.” Yumi save ridim Aesea 32:17, 18 long paragraf 2, no long Baebol blong yumi. Afta, yumi save eksplenem se, long ful wol, plante man oli harem glad ya finis mo oli gat pis long tingting from trufala hop ya blong fyuja. Yumi save storeyan long sam poen we oli kamaot long Baebol we oli stap long haf 7 long pej 25 blong buklet, afta, eksplenem long man ya se sipos hem i mekem stadi long buklet ya, bambae samting ya i givhan long hem blong kasem moa save. Mekem plan blong kambak i no longtaem tumas biaen, blong gohed long storeyan ya.
3 Sipos yu gobak blong luk man we yu bin livim buklet ya “?God i Rili Kea Long Yumi?” wetem hem, maet i gud blong talem se:
◼ “Taem mi kam visitim yu lastaem, yumi bin askem kwestin ya se: ?I gat wan God we i rili kea long yumi? ?Yu ting se God i stap tingbaot yumi bigwan, mekem se bambae Hem i finisim ol trabol we oli stap mekem man i harem nogud mo raf fasin? [Letem man i ansa, afta, soem poen long haf 6 blong buklet.] God i promes blong putum wan nyufala wol long ples blong rabis wol ya mo ol gudfala man nomo bambae oli laef long hem long pis. [Ridim Ol Sam 37:11.] Yumi tu, yumi save stap long nyufala wol ya sipos yumi bilif long Baebol mo folem ol advaes blong hem long laef blong yumi.” Yu save eksplenem plan blong ol Wetnes blong Jeova blong givhan long ol man blong stadi long Baebol.
4 Taem yu visitim wan man bakegen, yu save yusum buklet ya “Look! I Am Making All Things New”. Fastaem yu save soem pija long fored blong buklet, mo askem kwestin ya se:
◼ “?Yu ting se laef bambae i olsem wanem long wan wol we i stret olgeta? [Letem man i ansa.] Samting we yu luk long pija ya i no wan drim nomo; pija ya i soemaot ol trufala promes we Baebol i tokbaot. [Ridim Revelesen 21:4 mo Ol Sam 37:11, 29.] Mi glad blong eksplenem olsem wanem yu mo famle blong yu, yufala i save haremgud long ol blesing ya.” Gohed long storeyan mo askem man sipos hem i wantem stadi Baebol.
5 Taem yumi faenem ol man we hat blong olgeta i stret we oli stap lukaot trutok, yumi save soemaot trufala lav sipos yumi gobak blong givhan long olgeta blong mekem ol samting we oli harem i wok long laef blong olgeta. Bambae yumi yusum ol tabu trutok we God i givim long yumi blong kasem blesing blong olwe, mo blong man we i lesin long yumi i kasem blesing blong olwe tu.—1 Tim. 4:16.