Bambae Yumi Stadi Bakegen Long Famle Buk
1 Pol i talem se “strong kakae i blong olgeta we oli kam bigman finis, we oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.” (Hib. 5:14) Buk stadi blong kongregesen i givim strong kakae long saed blong speret we yumi nidim blong mekem maen mo hat blong yumi i strong. Stat long wik blong Oktoba 3, bambae yumi stadi long buk ya “?Olsem Wanem Blong Mekem Famle Blong Yu i Hapi?” Nating se plante blong yumi oli stadi long buk ya finis, fasin blong rere oltaem mo joen blong givim ansa bambae i mekem yumi kam strong long saed blong speret. (1 Kor. 16:13) Yumi intres moa long ol miting mo oli leftemap tingting blong yumi moa, taem yumi joen blong givim ansa long olgeta. Samting ya i save mekem bigfala glad i kamaot, i mekem yumi haremgud mo yumi gru long saed blong speret. Taem yumi joen blong givim ansa, samting ya i leftemap tingting mo mekem ol brata blong yumi oli kam strong tu.
2 Blong rere long buk stadi, i moa gud we wanwan famle i mekem plan blong olgeta folem nid mo ol samting we oli kamaot long laef blong olgeta. Long sam famle, wanwan memba i rere long stadi blong hem. Samfala oli stadi long sam paragraf evri dei taem oli stap go mo kambak long wok. Blong halpem ol pikinini blong olgeta, ol papa mama oli pulum tingting blong olgeta mo leftemap tingting blong olgeta blong rere long stadi. Sam famle oli faenem se i givhan blong holem sam taem blong rere long stadi tugeta.
3 Blong evriwan we oli joen long stadi oli kasem gudfala samting from buk stadi, brata we i lidim stadi i mas reregud. (1 Tim. 4:15, 16) Mo tu, from we kolosap stret haf blong haoa blong stadi i blong ridim ol paragraf nomo, samtaem bifo, oli mas jusum wan man we i ridgud. Hem i mas kasem save gud long haf we oli stadi long hem mo ridim wetem fasin blong makem ol bigfala poen mo fasin we i kliagud. From we i wan miting blong ol smol grup nomo, plante oli save joen blong givim ansa. Plante taem, i gat moa taem blong luk sam vas blong Baebol, blong ridim mo storeyan long olgeta. Ol nyuwan mo ol pikinini oli faenem i isi blong givim ansa mo oli gohed kwik, taem oli kasem strong tingting blong talemaot bilif blong olgeta. Ale, yumi mas neva ting nating long buk stadi blong kongregesen, wan miting we i blong mekem yumi strong long saed blong speret.