Trutok mo Laef Foreva—!Ol Buk We Oli Stret Long Impoten Taem blong Yumi!
1 !Olsem ol profet tok blong Baebol oli talem, ol bigfala samting oli stap kamaot long wol! Taem yumi luk ol samting we oli stap hapen raonabaot long yumi long wol ya mo insaed long tiokratik ogenaesesen, yumi luksave se i impoten tumas blong talemaot “gud nyus” blong Kingdom. (Mak 13:10) From samting ya, bambae yumi gohed blong mekem minista wok blong yumi wetem strong tingting, long ful manis Epril.
2 Spesel wok we bambae yumi mekem long manis ya, i makemgud se mesej blong yumi i impoten tumas. Yumi glad tumas blong wet long nyufala Kingdom Nyus, mo blong givimaot long manis Epril mo Mei. Bambae ol buk ya, Laef Foreva mo Trutok, oli bildimap glad long tingting blong yumi blong mekem wok ya. Mak blong yumi i blong givimaot plante buk, long ples blong yumi mo long ol aelan farawe. ?Olsem wanem yumi save rerem wan rod blong storeyan, we bambae i pulum ol man blong intres long ol buk ya?
3 Ating yu save mekem wan gudfala storeyan, sipos yu folem ol stampa advaes ya: (1) Makem wan japta blong buk we yu ting se ol man long ples blong yu bambae oli laekem. (2) Makemaot wan tok no wan vas long japta ya we yu ting se bambae i wekemap intres blong man blong haos. (3) Rerem wan sotfala rod blong storeyan we yu talem halo wetem smael, yu yusum wan kwestin no wan tok we i stanemap wan nambawan poen blong Baebol, mo biaen yu askem man blong karem buk. Olsem yu luk, hemia wan isi rod nomo, mo i no gat plante poen blong eksplenem. Maet yu save joen wetem wan narafala pablisa we yutufala i prij tugeta, blong rerem wan rod blong storeyan.
4 Sipos yu soemaot Trutok buk, maet yu save talem olsemia:
◼ “Tede yumi stap fesem plante trabol. From samting ya, plante man oli no ting se laef long wan Paradaes we i no gat trabol nating, i save kamtru. Be hemia samting we Baebol i promes longtaem finis.” Soem Revelesen 21:3, 4 long pej 4 blong Trutok buk, mo ridim haf 1 long pej 102. Nao yu askem man blong karem buk blong 50 VT.
5 Sipos yu wantem givimaot Laef Foreva buk, maet yu talem se:
◼ “?Wanem kaen fyuja we yu yu wantem, blong yu mo blong famle blong yu? [Wet long ansa.] Yumi evriwan i laekem laef, mo yumi wantem stap laef longtaem. Be, i gat plante problem we oli kamaot, mo i luk olsem we oli putum laef blong yumi long denja. From samting ya, maet yu intres blong harem mesej blong Baebol long saed blong wan nambawan fyuja, mo rod blong winim ol problem blong laef.” Nao yu save tokbaot sam spesel poen, olsem olgeta ya we oli stap long pej 9, 11-13, 161, mo 162 long Laef Foreva buk, blong makemgud nambawan fyuja we bambae i kam. Nao yu askem man blong karem buk blong 100 VT.
6 Ating yu save yusum japta 22 long Laef Foreva buk, “Makemaot Trufala Skul” mo talem se:
◼ “From we i gat plante skul, sam man oli no moa save sipos i gat wan skul we i rili trufala skul. Japta ya i soemaot olsem wanem Baebol i ansarem kwestin ya. . . .”
7 Bifo we yu go long wok blong prij, maet yu save tokbaot rod blong storeyan we yu jusum finis, wetem wan narafala pablisa, blong yu savegud long storeyan ya. Ating bambae yutufala i save serem ol gudfala poen, we bambae oli givhan long yutufala blong kam moa gud mo blong no moa fraet.
8 En blong wol ya i stap kam kolosap moa evri dei, taswe yumi mas traehad moa blong givhan long olgeta we oli gat gud hat, blong oli kamaot long Bigfala Babilon. (Rev. 18:4) Laef Foreva mo Trutok buk, tufala i impoten tumas long wok ya we neva bambae yumi save mekem bakegen. !Yumi talem tangkyu long Jeova from we i givim ol nambawan tul ya long yumi!