?Yu Yu Mas Kam Wanem Kaen Man?

¹ Taem i stap kam kolosap we ol man oli mas talemaot ol fasin blong olgeta long fes blong God. Baebol i kolem taem ya se ‘dei blong Jeova.’ Hemia taem we God bambae i mekem jajmen i kamtru long ol rabis man. Mo tu, bambae hem i sevem ol man we oli mekem stretfasin. Olgeta man we oli laef long taem ya, bambae oli mas talemaot long fes blong God, fasin we oli bin yusum laef blong olgeta long hem. Wetem tingting ya, yumi save tingting dip long impoten kwestin ya we Pita i stanemap se: ‘?Yu yu mas kam wanem kaen man?’ Hem i tokbaot se i impoten we ‘yumi mas mekem ol fasin blong ol tabu man, ol wok we oli givim dip ona long God, mo yumi mas tingbaot dei blong Jeova oltaem.’ Mo tu, yumi mas mekem ‘laef blong yumi i klingud, i no gat poen i stap long yumi, mo yumi gat pis.’​—⁠2 Pita 3:​11-14.

² Ol Tabu Fasin Mo Ol Wok Blong Givim Ona Long God: Ol tabu fasin i minim ol nambawan fasin we oli soem respek long ol rul blong Baebol. (Taet. 2:​7, 8) Wan Kristin i mas stap longwe long ol fasin blong wol, we oli stanap long ol samting we bodi nomo i wantem, mo fasin blong tingbaot yumi wan nomo.​—⁠Rom 13:​11, 14.

³ ‘Dip ona long God’ i minim se “yumi wanwan i fasgud long God, mo hat we i gat bigfala tangkyu long ol nambawan fasin blong hem i pusum yumi blong mekem olsem.” Wok strong long wok blong prij, hemia wan nambawan rod blong soemaot fasin ya. Tingting we i pusum yumi blong prij, i no jes we yumi harem se yumi mas prij. Bigfala lav long Jeova we i stap dip long hat blong yumi, i mas pusum yumi. (Mak 12:​29, 30) Sipos lav ya i pusum yumi, bambae yumi tingbaot wok blong prij olsem wan nambawan rod blong soemaot dip ona long God. From we yumi mas gohed blong givim ona long God oltaem, yumi mas joen long wok blong prij oltaem tu. Hem i mas stap olsem wan impoten haf blong program blong yumi evri wik.​—⁠Hib. 13:⁠15.

⁴ Taem yumi ‘tingbaot dei blong Jeova oltaem,’ hemia i min se evri dei hem i stap olsem impoten samting long tingting blong yumi. Yumi neva putum long wan ples we i no impoten, biaen long ol narafala samting. Hemia i min se yumi mas putum ol samting long saed blong Kingdom oli stap long fasples long laef blong yumi.​—⁠Mat. 6:⁠33.

⁵ Klingud, No Gat Poen, Mo Gat Pis: Yumi ol man blong bigfala kampani, yumi ‘wasem klos blong yumi finis blong mekem oli waet long blad blong Smol Sipsip ya we i ded.’ (Rev. 7:14) Taswe, blong stap ‘klingud,’ yumi mas lukaot se klin laef blong yumi, we yumi givim i go long Jeova finis, i no kasem ol mak from ol doti blong wol. ‘Yumi no gat poen,’ taem yumi stap longwe long ol fasin we oli no stret wetem ol loa blong God, mo ol fasin blong ronem ol sas samting blong wol, we oli save spolem Kristin fasin blong yumi. (Jem. 1:27; 1 Jon 2:​15-17) Yumi soem se yumi ‘gat pis,’ taem yumi soemaot “pis we God i save putum” long ol fasin we yumi mekem long ol narafala.​—⁠Fil. 4:⁠7; Rom 12:18; 14:⁠19.

⁶ Sipos yumi blokem ol doti blong wol, bambae yumi neva tekem “fasin blong ol man long wol,” we Jeova i jajem finis. Defren nao, ol gudfala wok blong yumi bambae oli halpem ol narafala blong luk “wanem nao i stap mekem man we i mekem wok blong God i defren long man we i no mekem.”​—⁠Rom 12:2; Mal. 3:⁠18.

⁷ Long Desemba, bambae yumi joen long Distrik Asembli, “Ol Hapi Man Blong Presem God.” Ol gudfala kakae long saed blong speret bambae i mekem se yumi wantem moa blong soemaot dip ona long God. Plante we oli jes stat blong joen wetem yumi, oli wantem mekem samting ya. Yumi save kam olsem wan blesing long olgeta, sipos yumi givhan long olgeta blong joen long wok blong prij long Ogis.

⁸ Taem yumi traehad blong mekem “ol gudfala wok” oltaem, samting ya i mekem nem blong Jeova i hae moa, i mekem kongregesen i strong, mo i givhan long ol narafala. (1 Pita 2:12) I gud se oltaem yumi kaen man olsem.