?Yu Yu Wan Fultaem Wetnes?
1 ?Yu yu talem yes blong ansa long kwestin ya? I tru se sam man nomo we oli givim laef blong olgeta i go long Jeova oli stap prij fultaem. Be, ?i stret we yumi evriwan i tingbaot yumi wanwan olsem ol fultaem Wetnes? Yes, yumi mas.
2 Wan man i no save stap olsem wan haftaem Kristin. Jisas i talem se: “Oltaem, mi stap mekem ol samting we hem i wantem.” (Jon 8:29) Pol, we i gat semfala tingting, i talem long yumi blong ‘leftemap nem blong God oltaem.’ (1 Kor. 10:31) From samting ya, yumi evriwan i mas tingbaot oltaem se yumi ol fultaem Wetnes blong Jeova. Tingting olsemia bambae i pulum yumi blong mekem bes blong yumi long evri samting we yumi mekem.
3 Tingbaot Ol Pruf: Klos, hea, toktok, mo fasin blong yumi i save soemaot long ol narafala man se yumi ol trufala Wetnes blong Jeova. Yumi save se long wok blong prij mo long ol Kristin miting, yumi mas putum ol klos we oli stret mo klin, toktok long gudfala fasin, mo mekem ol stret fasin. Be, long skul, wok, mo taem yumi stap pleplei tu, olgeta samting we yumi mekem i mas soem se yumi stap folem ol stret rul blong Jeova long laef blong yumi.
4 Jisas i talem se: “Taem ol man oli wokem velej blong olgeta antap long wan hil, oli no save haedem velej ya. . . . Yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.” (Mat. 5:14-16) Yumi mas folem tok ya long evri samting we yumi mekem. Sipos yumi luk se yumi fraet blong givim wan wetnes long wan ples we yumi stap long hem no long wok, yumi mas askem se: “?Mi mi stap wosip long Jeova haftaem no fultaem?” Yumi neva mas mestem wan jans blong tokbaot gud nyus blong Kingdom blong God long ol narafala man.
5 Rimemba se, yumi givim ona long Jeova mo mekem Hem i glad taem yumi talem bigfala “!Yes!” long kwestin ya “?Yu yu wan fultaem Wetnes?”