Ansa Long Wan Kwestin

◼ ?From wanem yumi mas lukaotgud long fasin blong putum klos mo mekem hea blong yumi, taem yumi go long ofis blong Sosaeti long Bruklin, Pateson, mo Walkil long Nyu Yok, mo long ol narafala ofis blong Sosaeti long olgeta ples blong wol?

Olgeta Kristin oli mas folem ol gudfala fasin blong putum klos mo mekem hea. Oltaem, klos mo hea blong yumi i mas soemaot klin mo stret fasin blong ol man blong Jeova God. Samting ya i tru moa taem yumi visitim ofis blong Sosaeti long Nyu Yok mo ol narafala ples blong wol.

Long 1998, bambae i gat ol distrik mo intenasnal asembli long plante ples blong wol. Plante taosen brata mo sista blong ol defren kantri bambae oli visitim hedkwota blong Sosaeti long Nyu Yok mo ol ofis long ol narafala kantri tu. Taem yumi visitim ol ofis ya, mo long ol narafala taem tu, yumi mas ‘soemaot we yumi man blong wok blong God, long olgeta samting we yumi mekem,’ hemia long fasin blong yumi blong putum klos mo mekem hea tu.​—2 Kor. 6:3, 4.

Buk ya, Ol Rul Blong Mekem Minista Wok Blong Yumi, i tokbaot from wanem i impoten blong jenisgud mo komem hea blong yumi. Hem i talem se yumi mas klingud, putum ol stret klos, mo komem hea blong yumi, taem yumi joen long wok blong prij mo go long ol Kristin miting. Afta, long pej 124, haf 2, hem i talem se: “Yumi mas folem fasin ya taem yumi go visitim Betel long Bruklin no long wan narafala branj ofis blong Sosaeti. Yumi save tingbaot se nem ya Betel i minim ‘Haos blong God.’ Taswe klos, hea mo ol fasin blong yumi oli mas sem mak olsem taem yumi go wosipim Jeova long ol miting long Haos Kingdom.” Ol brata we oli stap kolosap long ol Betel oli mas folem fasin ya tu, olsem olgeta we oli stap longwe, taem oli kam luk mo joen wetem ol memba blong Betel, no oli visitim ol ofis blong Sosaeti.

Klos blong yumi oli mas givim gudfala tingting long ol narafala long saed blong trufala wosip blong Jeova. Be, i gat sam ripot we oli soemaot se sam brata mo sista we oli visitim ol ofis blong Sosaeti, oli putum ol klos blong spel mo pleplei nomo. Ol klos olsem oli no stret blong visitim Betel. Long bisnes ya, olsem long ol narafala samting long Kristin laef blong yumi, yumi wantem holem gudfala fasin we i makemaot ol man blong God se oli defren long ol man blong wol. Taswe, yumi mas mekem evri samting long fasin we i givim ona i go long God. (Rom 12:2; 1 Kor. 10:31) I gud tu blong storeyan wetem ol Baebol stadi blong yumi we oli wantem visitim Betel, mo mekem olgeta oli tingbaot from wanem i impoten blong putum gudfala klos mo komem hea blong yumi.

Taswe, taem yu visitim ofis blong Sosaeti, askem kwestin ya: ‘?Klos mo hea blong mi oli stret?’ (Skelem wetem Maeka 6:8.) ‘?Oli givim ona long God ya we mi mi wosip long hem? ?Klos mo hea blong mi oli save pulum ae blong narafala no mekem hem i harem nogud? ?Mi mi givim wan gudfala eksampel long ol narafala we oli stap visitim Betel blong faswan taem?’ Oltaem, klos mo hea blong yumi oli mas “leftemap tok blong God ya we i sevem yumi, long fes blong ol man.”​—Taet. 2:​10.