Wok Blong Prij—Wan Rod Blong Soemaot Trufala Lav
1 Wok blong prij i wan pruf se yumi obei long tufala loa we oli hae moa long ol narafala loa. (Mat. 22:37-39) Lav we yumi gat long Jeova i pusum yumi blong talem ol gudfala toktok long saed blong hem taem yumi storeyan wetem ol narafala. Lav we yumi gat long ol man raonabaot long yumi i pusum yumi blong traehad blong pulum olgeta, blong oli kasem save long ol samting we God i wantem, mo long stampa tingting blong Hem. Samting ya bambae i givhan long olgeta ya blong oli laekem Jeova olsem yumi, mo blong gat jans blong kasem laef blong olwe. Taswe, wok blong talemaot gud nyus i leftemap nem blong Jeova, mo tu i givim hop blong Kingdom, we i olsem wan sas samting, long ol man raonabaot long yumi. Tru, wok blong prij i wan rod blong soemaot trufala lav long God mo ol man.
2 Lav i pulum yumi blong tok wetem ol kaen man long ol defren ples. (1 Kor. 9:21-23) Yumi save tekem wan eksampel: Long wan plen, wan Kristin elda i stap sidaon kolosap long wan pris blong Katolik jyos. Elda ya i askem sam gudfala kwestin long pris ya blong traem faenemaot tingting blong hem, mo afta, hem i tokbaot Kingdom blong God. Taem pris ya i aot long plen, hem i karem tu buk blong yumi wetem hem. !Hemia i wan gudfala frut we i kamaot from we elda ya i soem trufala lav long man we i stap kolosap long hem!
3 Trufala Lav i Pusum Yumi Blong Go Prij: Olgeta we oli wok olsem haftaem paenia no fultaem paenia oli stap soem trufala lav long God mo long ol man we oli stap raonabaot long olgeta. Ol paenia oli givim taem mo paoa blong olgeta blong givhan long ol narafala long saed long trutok. ?Wanem i pusum olgeta ya blong mekem olsem? Wan paenia i talem se: “Mi save se lav i wan frut blong tabu speret. Taswe sipos i no gat lav ya, mi neva save kasem trutok, antap moa, mi neva save mekem gudfala wok blong paenia. Lav i givhan long mi blong soem intres long ol man, luksave samting we oli nidim, mo mi luk se oli rili glad taem yumi soemaot lav.” Jisas tu i soem se hem i laekem ol man. Wan taem hem, mo ol disaepol blong hem we oli taed, oli go long wan ples blong “spel smol,” be wan bigfala hif blong man oli gotru long ples ya fastaem. ?Jisas i mekem wanem? “Hem i sore tumas long olgeta,” ale hem i lego samting we hem i nidim, nao “i tijim olgeta long plante samting.”—Mak 6:30-34.
4 Nating se sam man oli no lesin long gud nyus we yumi talemaot, be taem yumi save se lav i pusum yumi blong mekem bes blong yumi blong givhan long olgeta blong kasem laef, ale yumi kasem glad we i dip. Taem Jisas bambae i jajem yumi evriwan, bambae yumi glad tumas we yumi bin ‘finisim olgeta wok ya we God i givim long yumi blong mekem.’ Mo long rod ya, yumi bin soemaot trufala lav.—2 Tim. 4:5.