Speret Blong Jeova i Stap Wetem Yumi
1 Ol Wetnes blong Jeova oli gat wan bigfala wok blong mekem. Jisas i talem se: “Gud nyus ya i mas go long olgeta man long wol fastaem.” (Mak 13:10) Sipos wok ya i dipen long paoa blong yumi nomo, ating neva yumi save finisim wok ya. Be i no olsemia, from we paoa we i strong moa long ol narafala paoa long heven mo wol, i stap sapotem yumi. Hemia tabu speret blong God.—Mat. 19:26.
2 Pruf Long Faswan Handred Yia: Jisas i joenem profet tok blong Aesea wetem laef blong hem wan, i talem se: ‘Speret blong Jeova i stap long mi . . . blong mi talemaot gud nyus.’ (Luk 4:17, 18) Bifo we hem i go antap long heven, hem i talem long ol aposol blong hem se, bambae oli kasem paoa blong tabu speret blong oli save wetnes ‘gogo oli finisim olgeta ples long wol.’ Afta, tabu speret i lidim Filip blong i go prij long wan man Itiopia we i wan haeman. Semfala speret ya i sanem Pita i go luk wan kapten blong ami blong ol man Rom, mo i sanem Pol i go prij long ol hiten man. ?Hu i save tingbaot se sam man blong ol hiten ples, oli save bilif long trutok? Be, yes oli bilif.—Ol Wok 1:8; 8:29-38; 10:19, 20, 44-48; 13:2-4, 46-48.
3 Pruf Long Taem Blong Yumi: Buk blong Revelesen i soemaot klia se tabu speret i stap givhan long wok blong prij tede tu, i talem se: “Tabu speret wetem hemia we i olsem Woman blong Kraes, tufala i talem se ‘Yu kam . . . Yufala we i wantem, yufala i kam tekem wora ya blong laef, we i olsem presen blong yufala.’” (Rev. 22:17) Tabu speret ya i stap pusum grup ya we i olsem woman blong Kraes mo ol fren blong olgeta, hemia ol “narafala sipsip,” blong oli talemaot gud nyus long olgeta man. (Jon 10:16) Yumi mas soemaot strong tingting long wok blong prij, yumi no mas fraet blong tok wetem ol defren kaen man. Oltaem yumi mas bilif se tabu speret blong God bambae i givhan long yumi. 1998 Yearbook i givim strong pruf se tabu speret blong God i stap gohed blong givhan long ol man blong God. !Traem tingbaot frut we i stap kamaot! Long tu laswan sevis yia, bitim 1,000 man oli tekem baptaes evri dei.
4 Yumi save sua se tabu speret blong God bambae i gohed blong stap wetem yumi taem yumi talemaot gud nyus blong Kingdom, gogo kasem mak we Jeova i wantem. Save ya i mas leftemap tingting blong yumi mo pusum yumi blong gohed blong traehad oltaem, long wok ya blong Kingdom we i impoten tumas.—1 Tim. 4:10.