Ansa Long Wan Kwestin
◼ ?Ol papa mama oli mas lukaot long wanem taem oli go prij wetem ol yangfala pikinini blong olgeta?
I gud we ol papa mama oli go prij wetem ol pikinini blong olgeta. Olsem ya nao, oli save trenem olgeta blong talemaot gud nius blong Kingdom. Be taem oli mekem olsem, papa no mama i mas lukaotgud long ol pikinini, from we i save gat denja long sam ples we oli go prij long hem, mo long ol “sefples” tu. Plante moa man oli mekem nogud long saed blong seks long ol pikinini, from we yumi laef long wan taem we i “strong tumas,” wan taem we ol nogud fasin long saed blong seks oli stat kam antap. (2 Tim. 3:1-5) Ol papa mama oli mas lukaotgud long ol pikinini blong olgeta, blong sevem olgeta from ol rabis man. ?Oli save mekem wanem?
Baebol i givim waes advaes ya se yumi mas tingtinggud blong luksave ol trabol we maet oli save kam. (Prov. 22:3; Mat. 10:16) Mifala i no wantem mekem rul, be taem wan pikinini i go prij, i moa gud sipos papa no mama blong hem no wan narafala bigman, i joen wetem hem. Sipos tufala yangfala pablisa we yumi save trastem olgeta, tufala oli go prij tugeta, i gud we papa mama, no wan bigman i stap wajem olgeta oltaem. Be i tru se taem wan pikinini i stap gru blong kam bigman, maet papa mama oli mekem disisen se oli no moa nidim blong lukaot long pikinini ya oltaem.—Lukluk tu Ansa Long Wan Kwestin blong Kingdom Wok Blong Yumi blong Oktoba 1992.
Be i waes tu blong yu lukaotgud long olgeta taem yu stap long trak, no taem yu stap wokbaot nomo wetem olgeta. Sipos yu mekem olsem, bambae yu no gat aksiden. Be sipos no, maet yu save gat aksiden we yu save wari tumas long hem, no yu mas pem from hospital, no maet yu mas go long kot.
I gud we ol yangfala oli “presem nem blong Jeova.” (Sam 148:12, 13, NW) Ol gudfala toktok we i kamaot long hat blong ol yangfala mo ol gudfala fasin we oli soem taem oli go prij, samting ya i tajem hat blong ol narafala, mo i givim ona long Jeova. !Papa no mama, yu mas traehad blong halpem ol pikinini blong yu blong talemaot gud nius evri manis, mo long semtaem, yu mas lukaotgud long olgeta blong protektem olgeta from ol denja we oli save kam!