Prea Blong Askem Help Long Jeova
1 Jisas i makem long tingting blong ol disaepol blong hem se, i nidim we Jeova i blesem minista wok blong olgeta. (Mat. 9:37, 38) Taem yumi prea strong long fulhat blong yumi blong presem Jeova, talem tangkiu mo askem samting long hem, yumi soemaot se yumi dipen fulwan long hem blong i givhan long yumi. (Fil. 4:6, 7) Baebol i pulum yumi blong prea oltaem mo ‘askem long God blong i givhan long yumi.’ Yes, samting ya i tru tu long saed blong ol prea we oli laenap wetem minista wok blong yumi.—Efes. 6:18.
2 Taem yumi prea, yumi save presem Jeova from ol nambawan fasin mo ol wok blong hem. Yumi presem hem tu from we hem i Man ya We i Givim gud nius we yumi stap talemaot. Yes, yumi mas presem hem from we hem nomo i mekem se minista wok blong yumi i karem frut.—Sam 127:1.
3 Ol prea we yumi mekem blong talem tangkiu, oli soemaot se yumi glad tumas from we Jeova i givim save long yumi long saed blong ol samting we hem i wantem yumi blong mekem mo stamba tingting blong hem. !Tru ya, i wan nambawan jans blong serem ol trutok blong Kingdom wetem ol narafala! Yumi talem bigfala tangkiu long Jeova from olgeta samting we yumi naf blong mekem long minista wok blong yumi.—Sam 107:8; Efes. 5:20.
4 Yes, i stret nomo we yumi askem Jeova blong i givhan long yumi blong faenem ol man we bambae oli akseptem Baebol stadi. I stret we yumi askem help long Jeova blong kasem hat blong ol man wetem trutok. Yes, ol prea olsem, oli soem se yumi luksave se God nomo i mekem minista wok blong yumi i karem frut.—1 Kor. 3:5-7.
5 Wan sista i ting se woman we hem i stap karem ol niufala Wajtaoa mo Wekap! i go oltaem long hem, i no stap ridim ol magasin ya. Sista ya i no wantem se ol nambawan magasin ya oli stap olsem nomo, we i no gat man i ridim. Taswe hem i askem strong long Jeova se, sipos woman ya i no stap ridim ol magasin ya, bambae hem i no mas akseptem ol niufala magasin. Long nekis visit we sista i mekem, hasban blong woman ya i talem long sista ya se: “Tangkiu tumas from ol magasin ya we yu stap karem i kam oltaem. Mi stap ridim olgeta ya mo mi rili laekem olgeta.”
6 Wetem tingting daon mo dip prea, yumi save askem strong long Jeova blong i halpem yumi blong winim fasin blong ol man we oli soem se oli no intres long trutok mo ol tok we oli talem blong jikim yumi. Mo tu, Jeova i save givhan long yumi blong winim fasin blong fraet long man, mo gohed strong blong givim witnes long ol narafala. (Wok 4:31) Sipos yumi prea oltaem blong ‘askem long God blong i givhan long yumi,’ taem yumi stap mekem tabu wok blong yumi wetem fasin obei, bambae yumi sua se Jeova i givhan long yumi.—1 Jon 3:22.