Tinghae Long Nem Blong Jeova We i Naes Tumas
1 Setan i sakem doti long nem blong Jeova taem hem i pulum tufala faswan bubu blong yumi blong mekem sin. Hem i talem se Jeova i bin giaman long Adam. (Jen. 3:1-5) Nem blong God i laenap wetem fasin blong God blong holem promes blong hem oltaem. Taswe tok blong Setan i rili rabis bitim mak. Be, sloslou Jeova i mekem olgeta promes blong hem oli kamtru folem plan blong hem. Olsem ya nao, hem i klinimaot olgeta poen we Setan i sakem long nem blong hem. Yes, hem i mekem nem blong hem i naes.—Aes. 63:12-14.
2 Yumi nao ol man blong Jeova, we ‘hem i singaot olgeta blong oli holem nem blong hem.’ (Wok 15:14, 17) Taswe yumi soemaot we yumi gat strong tingting blong mekem nem blong hem i tabu. Long tingting blong yumi, nem blong Jeova i naes, from we hem i stret long wan man we i kaen, gud mo stret, mo we i gat sore, mo lav, bitim evriwan. Yumi ona long nem blong hem from we hem i rili hae mo antap tumas. (Sam 8:1; 99:3; 148:13) ?Filing ya i save pulum yumi blong mekem wanem?
3 Mekem Nem Blong God i Tabu: Nem blong God i tabu we i tabu, hem i no nidim yumi blong mekem hem i kam tabu moa. Be sipos laef blong yumi i klin mo yumi talemaot Kingdom, yumi soem we yumi tinghae tumas long nem blong Hem. I stret we yumi singaot bigwan, se: “!Yufala ol man, yufala i tangkiu long Jeova! Singaot long nem blong hem. Yufala i go talemaot ol fasin blong hem long ol man long olgeta nesen. Yufala i talem long olgeta we nem blong hem i hae we i hae.” (Aes. 12:4, NW) ?Yumi save mekem samting ya olsem wanem?
4 Yumi save yusum olgeta jans blong talemaot nem blong Jeova mo mining blong hem long ol man. Yumi save go long ol haos wanwan mo holem ol narafala jans blong prij long ol man long rod no long ol stoa, from we wok ya i stap leftemap nem blong Jeova. Taem yumi faenem wan man we i intres mo lesin long mesej ya, yumi putum wan dei blong kambak mo tijim olgeta long sam moa samting long saed blong Jeova. Yumi no mas mestem, yumi mas kambak stret long dei mo taem we yumi putum, mo yumi mas traehad blong statem wan Baebol stadi. Evri yia, plante handred taosen man oli kasem save long nem ya blong Jeova we i naes, nao oli givim ona long hem mo talem se hem i tabu.
5 Taem yumi joen fulwan long wok blong mekem nem blong God i tabu, yumi givim wan klia ansa long ol kwestin we bifo Setan i putum long Iden. Yumi no save mekem wan narafala wok we i gud mo stret olsem hemia. !Yes, yumi mas tinghae long nem blong Jeova mo holem strong tingting blong leftemap nem blong hem we i naes tumas!—1 Kron. 29:13.