Talemaot Nem Blong Jeova Long Olgeta Ples Long Wol
1 Jisas i givim oda long ol disaepol blong hem se oli mas givim witnes gogo oli “finisim olgeta ples long wol.” Be bifo we hem i givim oda ya, hem i soem eksampel long olgeta blong oli folem. Long enitaem mo long eni ples we hem i faenem man long hem, hem i tekem jans blong talemaot stamba tingting blong God long ol man. Grup blong slef ya we oli gat bilif, oli folem eksampel blong Jisas. Oli yusum plante defren kaen rod blong mekem se “olgeta man blong ol narafala kantri” oli save long nem blong Jeova.—Aes. 12:4, 5.
2 Wanem Rod Yumi Yusum Long Ol Taem We Oli Pas: Long ol yia we oli pas, slef ya i putum toktok long saed blong Baebol i go long ol niuspepa; oli wokem “Photo-Drama of Creation” mo plante milyan man oli lukluk samting ya; oli yusum ol trak wetem bigfala maekrofon; mo oli yusum bigwan, ol fonograf, mo blong smoltaem tu, oli bin yusum radyo. Olgeta rod ya oli blong talemaot gud nius. Be, impoten samting we oli traem blong mekem, hemia blong toktok stret wetem olgeta man wanwan blong mekem i isi blong visitim bakegen olgeta we oli soem intres. Taswe, wok blong prij long ol haos wanwan i stap olsem beswan rod blong mekem ol man long olgeta ples oli save long nem blong Jeova.—Wok 5:42.
3 Wanem Rod Yumi Stap Yusum Long Taem Blong Yumi: Naoia, laef i jenis, ol man oli stap spid oltaem, mo long plante ples yumi no moa save faenem man long haos. I no gat plante man we oli laekem spenem taem blong ridim buk mo tingting dip long ol samting long saed blong spirit. From samting ya, yumi mas jenisim fasin blong yumi blong prij. Antap long fasin blong prij long ol haos wanwan, yumi mas go long ples we ol man oli stap long hem mo yumi mas stap ‘rere oltaem’ blong talemaot hop ya we i stap insaed long yumi. (1 Pita 3:15) Samting ya i minim se yumi mas traehad blong prij long ol man long ples blong wok blong yumi, long ol narafala pikinini long skul, long ol man we oli wokbaot long rod mo long ol ples blong spel no ol ples blong putum trak, long ol stoa wanwan, mo eniples bakegen we yumi save mitim man long hem. From we Jeova i stap biaenem yumi long wok ya, bambae yumi save kasem gudfala frut. ?Yu yu stap joen long wok ya blong kasem ol man long olgeta ples?
4 I gud sipos wanwan long yumi i no letem wan jans i pas blong mekem ol man long ples blong yumi oli save long nem blong Jeova. Yumi save kasem bigfala glad taem yumi mekem wok blong prij go kasem fulwan mak blong hem, mo long semtaem, yumi lukluk i go long Jeova blong pulum ol man we hat blong olgeta i stret oli kam long hem.—Jon 6:44.