Tingbaot Ol Olfala We Oli Holem Bilif
1 Ana i wan olfala wido woman we i gat 84 yia finis. Nating se i olsem, “oltaem nomo, hem i stap long haos blong God.” Yes, from we hem i strong long bilif, Jeova i givim wan nambawan blesing long hem. (Luk 2:36-38) Tede, plante brata mo sista oli soem semfala strong tingting olsem Ana, nating se oli fesem sam hadtaem long laef blong olgeta. Olgeta ya maet oli stap faet strong evri dei from ol problem blong helt mo from we oli no moa naf blong mekem plante samting. Maet samting ya i mekem we tingting blong olgeta i foldaon. I gud yumi tokbaot sam gudfala rod we yumi save folem blong leftemap tingting blong olgeta mo halpem olgeta blong stap strong oltaem long saed blong spirit.
2 Ol Miting Mo Wok Blong Prij: Taem ol brata sista oli rere blong yusum trak blong olgeta blong karem ol olfala oli go long ol Kristin miting, oli givhan long ol olfala ya blong stap long evri miting. Fasin ya i bildimap bilif blong ol olfala ya we oli mekem wok blong God longtaem, mo hem i bildimap kongregesen tu. ?Yu yu gat janis blong givhan long saed ya?—Hib. 13:16.
3 Man we i joen oltaem long wok blong prij hem i kasem trufala glad mo i harem gud long laef. Be olgeta we oli olfala no we oli sik, maet oli faenem i had blong mekem olsem. ?I gat rod we maet ol gudfala brata no sista ya oli save ‘joen long yu long wok’ blong prij? (Rom 16:3, 9, 21) Maet yu save singaot olgeta blong joen wetem yu sipos yu mekem wan visit no wan Baebol stadi. ?Sipos i gat wan long olgeta ya we i no save aot long haos, yu save mekem rod blong wan Baebol studen blong yu i kam long haos blong hem blong yufala i mekem stadi tugeta?
4 Stadi Mo Kampani Tugeta: Wanwan taem, sam brata sista oli tekem wan olfala no wan we i sik, i kam joen wetem olgeta long famle stadi blong olgeta, no maet oli go long haos blong hem blong mekem stadi ya. Wan mama i tekem tufala smol pikinini blong hem oli go long haos blong wan olfala sista blong oli mekem stadi tugeta long buk ya My Book of Bible Stories, mo samting ya i leftemap tingting blong olgeta evriwan. Olgeta ya oli glad tu sipos yumi singaot olgeta i kam kakae long haos wetem yumi, no sipos oli joen wetem yumi long sam spesel taem. Sipos wan we i sik bigwan i no gat naf paoa blong stap wekap mo storian longtaem wetem yumi, maet yumi save visitim hem blong sot taem nomo no ridim wan samting long hem, prea wetem hem, no serem wan naesfala ekspiriens wetem hem.—Rom 1:11, 12.
5 Jeova i tinghae tumas long ol olfala we oli holem strong long bilif. (Hib. 6:10, 11) Yumi save folem fasin blong Jeova sipos yumi soemaot se yumi tinghae long olgeta ya mo sipos yumi halpem olgeta blong folem rod blong trufala Kristin.