God i Putum Gud Nius Long Han Blong Yumi
1 Yumi glad tumas we God i jusum yumi blong karem gud nius blong hem. !Hemia wan blesing ya! (1 Tes. 2:4) Sam man bambae oli no wantem mesej ya we i strong. Be ol man we hat blong olgeta i tru, bambae oli harem se gud nius ya i gud, i olsem wan gudfala senta we i pulum olgeta. (2 Kor. 2:14-16) Ol man we oli lesin mo obei long gud nius, oli save kasem laef. (Rom. 1:16) ?Yumi mas mekem wanem wetem gud nius ya we God i putum long han blong yumi?
2 Jisas Mo Ol Aposol: Jisas i putum wok blong talemaot gud nius long fasples long laef blong hem. (Luk 4:18, 43) Hem i lavem ol man mo i luksave se gud nius ya i impoten. Taswe, nating se hem i taed mo i hanggri, hem i serem gud nius ya long olgeta. (Mak 6:30-34) Long toktok blong hem, mo long fasin blong hem, hem i soemaot gud long ol disaepol blong hem se wok blong talemaot Kingdom i impoten tumas.—Mat. 28:18-20; Mak 13:10.
3 Folem fasin blong Jisas, ol aposol oli bin wok strong blong talemaot gud nius blong Kingdom. Nating se ol man oli kilim olgeta mo tok strong long olgeta blong oli stop blong prij, be oli no kam slak blong ‘tijim ol man, mo talemaot gud nius.’ (Wok 5:40-42) Aposol Pol i neva taed long wok ya. (1 Kor. 15:9, 10; Kol. 1:29) Hem i talem se janis ya we hem i gat blong talemaot gud nius i olsem wan wok blong pem kaon we hem i gat long ol man. Taswe hem i rere blong lego plante gudfala samting blong laef, from we hem i wantem finisim gud wok ya.—Wok 20:24; Rom 1:14-16.
4 Bigfala Blesing Blong Yumi Tede: Sipos yumi tingbaot se God nao i putum wok blong prij long han blong yumi bambae yumi lukaot rod blong joen moa long wok ya. (Rom 15:16) Edward i no save wokbaot from we haf bodi blong hem i ded. Oltaem hem i sidaon long wiljea blong hem, fored long wan hotel, mo i serem bilif blong hem wetem ol man we oli kam stap long hotel ya. Be hem i wantem mekem moa. Ale hem i askem sam man blong oli wokem wan smol haos blong hem biaen long wan trak. Nao, wetem spesel trak ya, hem i mekem wok blong paenia blong plante yia. Hem i ron blong plante taosen kilometa long trak ya, blong prij. Tede, plante brata sista oli mekem olsem Edward. Oli stretem sam samting long laef blong olgeta blong joen moa long wok blong talemaot gud nius.
5 Olsem Jisas mo ol aposol, i gud we yumi tu yumi tingbaot wok blong prij olsem impoten samting long laef blong yumi. Taem yumi mekem olsem, yumi soemaot se yumi lavem ol man mo yumi soemaot se yumi tinghae long gud nius ya we God i putum long han blong yumi.