Oli Handikap Long Bodi Be Oli Karem Frut
1 I gat plante Witnes blong Jeova lelebet we oli handikap long bodi. Sipos yu yu wan long olgeta ya, yu save karem frut yet long wok blong prij. Yes, samting ya we i givim trabol long yu i save givim sam spesel janis long yu blong prij long narafala mo leftemap tingting blong olgeta.
2 Ol Janis Blong Prij: Plante brata sista we oli laef wetem trabol long bodi blong olgeta oli stap joen fulwan long wok blong prij. Tingbaot eksampol blong wan sista. Afta we ol dokta oli katem hem, hem i no moa save wokbaot gud mo toktok gud. Be sista ya i luk se hem i save seremaot magasin sipos hasban blong hem i stopem trak long wan rod we plante man oli stap wokbaot long hem. !Wan taem hem i bin serem 80 magasin long tu aoa nomo! Mo tu, maet trabol we yu gat long bodi i openem rod long yu blong prij long sam man we samtaem ol narafala brata sista oli no save faenem olgeta long wok blong prij. From samting ya, i gud yu tingbaot ol man ya olsem spesel teritori blong yu.
3 !Yu yu save kasem gudfala risal long wok blong prij! Taem ol man oli luk strong tingting blong yu mo paoa we trutok blong Baebol i gat long laef blong yu, bambae oli intres long gud nius blong Kingdom. Mo tu, taem yu faenem sam man we oli harem nogud from sam trabol, ol samting we yu wan yu fesem long laef i mekem we yu yu naf gud blong leftemap tingting blong olgeta ya wetem Tok blong God.—2 Kor. 1:4.
4 Mekem Narafala i Strong: ?Yu yu tingbaot yet laef stori blong sista Laurel? Ating stori blong hem i bin leftemap tingting blong plante long yumi. Ful bodi blong hem i stap 37 yia insaed long wan mesin we i mekem wok blong waet leva blong hem. Nating se i olsem, hem i givhan long 17 man blong oli kasem stret save long ol trutok blong Baebol. Long sem fasin, gudfala eksampol blong yu i save pusum ol narafala brata sista blong oli traehad moa long wok blong Jeova.—w01 9/15 pej 17-18.
5 Maet trabol we yu yu gat long bodi i blokem yu blong yu no joen plante long wok blong prij olsem we yu yu wantem. Be nating se i olsem, yu save mekem narafala i strong. Wan brata i talem se: “Mi lanem finis se wan man we i handikap fulwan i save givhan bigwan long narafala. Mi mo woman blong mi, wanwan taem mitufala i olsem wan angka we i holemtaet sam brata no sista long kongregesen. From we laef blong mitufala i defren long narafala, mifala i stap oltaem, mifala i rere enitaem nomo blong givhan.” Be i tru se from we yu gat problem long bodi bambae yu no save mekem evri wok ya we yu yu wantem blong mekem. Be wetem help blong ol brata sista yu save joen oltaem long wok blong prij. Taswe, sipos yu nidim help yu no mas fraet no sem blong talemaot samting ya long ol elda no ol narafala insaed long kongregesen we oli save halpem yu.
6 Jeova i luk evri samting we yu mekem long wok blong hem, mo hem i glad long wok we yu mekem wetem olgeta hat mo tingting blong yu. (Sam 139:1-4) Taem yu dipen long hem, bambae hem i givim paoa we yu nidim blong joen oltaem mo karem frut long wok blong prij.—2 Kor. 12:7-10.