Yumi Tangkiu Long God We i Soem Sore Long Yumi
1 Bifo we aposol Pol i kam wan Kristin, hem i wok strong blong agensem mo blokem Kristin skul. Be, Pol i no save se samting we hem i stap mekem i nogud, taswe Jeova i soem sore long hem. Ale, Jeova i mekem i gud long Pol long gladhat blong hem, mo i givim wan spesel wok long hem, hemia wok blong prij. Pol i rili tinghae long wok ya we hem i kasem. (Wok 26:9-18; 1 Tim. 1:12-14) Hem i tangkiu long Jeova we i soem sore long hem, ale hem i yusum ful paoa blong hem blong finisim wok ya we hem i kasem.—2 Kor. 12:15.
2 God i soem sore long yumi tu, mo from samting ya, hem i putum wok blong prij tu long han blong yumi. (2 Kor. 4:1) Yumi save soemaot tangkiu long God from sore we hem i soem long yumi, sipos yumi mekem olsem Pol mo yumi traem bes blong yumi blong halpem ol narafala blong oli gru long saed blong spirit. Wan wei blong mekem samting ya, hemia blong statem mo mekemgud ol Baebol stadi.
3 Statem Ol Baebol Stadi: Wan gudfala rod blong statem ol Baebol stadi hemia blong faenem ol man we oli wantem karem ol magasin evri taem. Taem yumi visitim ol man ya oltaem, bambae yumi stat blong save gud ol samting we oli intres long hem. Wan dei, maet i gat wan stori long magasin we yu save yusum blong pulum intres blong man i go long buklet ya Wanem mo statem wan Baebol stadi. Long ol nekis visit we yu mekem blong karem magasin i go long hem, yu save gohed blong storian long buklet Wanem.
4 Yumi Mas Prea Mo Wokhad: Yumi save kamgud moa long wok blong prij sipos yumi prea mo yumi wokhad. Wan paenia sista we i gat wan Baebol stadi nomo, i prea long Jeova blong i halpem hem blong faenem moa stadi. Hem i wok tu folem samting we hem i askem long ol prea blong hem. Hem i jekemapgud fasin blong hem blong prij mo hem i luksave se hem i no stap askem ol visit blong hem blong oli stadi Baebol. Ale, hem i stat mekem olsem, mo i no longtaem hem i statem tu moa Baebol stadi.
5 !Hem i wan blesing blong joen long wok blong “talemaot gud nius ya we God i lavem yumi tumas, mo i stap mekem i gud tumas long yumi”! (Wok 20:24) Yumi tangkiu long God from we hem i soem sore long yumi, ale, samting ya i mas pulum yumi blong wokhad blong givhan long ol man blong olgeta tu oli kasem blesing from kaen fasin we Jeova i soem.