Program Blong Nekis Seket Asembli
1 Masta blong yumi, Jisas, i talemaot se ol man bambae oli mekem trabol long ol disaepol blong hem. (Mat. 24:9) ?Wanem tingting we yumi mas gat long saed ya? ?Wanem bambae i givhan long yumi blong stanap strong long taem blong trabol? Program blong seket asembli blong sevis yia 2004, bambae i ansa long tufala kwestin ya. Stamba tok blong asembli ya, ‘Haremgud Long Hop Blong Yumi. Stanap Strong Long Taem Blong Trabol.’—Rom 12:12, NW.
2 Tufala Tok We i Gat Tri Haf Long Olgeta: Faswan tok we i gat tri haf blong hem, hemia “Stanap Strong Mo Karem Frut.” Tok ya bambae i soem olsem wanem yumi stap karem frut. Bambae brata i askem kwestin long sam pablisa, olsem wanem oli holem tingting ya se yumi mas wok hareap blong prij mo blong tijim ol man from we en i klosap. Ol papa mama bambae oli lesingud long tok ya “Taem Jeova i Stretem Yumi,” we bambae i tokbaot olsem wanem ol papa mama oli save tijim ol pikinini blong olgeta blong yusum tingting blong olgeta mo skelem ol samting. Namba tri haf bambae i tokbaot wanem we yumi mas mekem blong no letem wol ya i gat paoa long yumi nao yumi no moa karem frut.—Mak 4:19.
3 Namba tu tok we i gat tri haf blong hem, hemia “Mekem Tingting Blong Yumi i Strong Blong Ron Long Resis Ya.” Tok ya bambae i soemaot se laef blong yumi i olsem wan resis. ?From wanem yumi mas folem ol rul blong resis ya? ?Olsem wanem yumi save lego ol hevi samting mo no kam slak long resis ya? Ol gudfala advaes blong Baebol we yumi harem, bambae i givhan long yumi evriwan blong mekem tingting blong yumi i strong blong ron long resis ya.
4 Fasin Blong Stanap Strong i Mekem God i Glad: Sipos yumi lesingud long ol tok blong seket mo distrik elda mo mekem ol advaes ya i wok long laef blong yumi, bambae bilif blong yumi i kam strong moa. Distrik elda bambae i givim tok ya, “Fasin Blong Stanap Strong i Mekem God i Glad.” Pablik tok bambae i ansarem ol kwestin ya: ?Ol nesen oli mas putum tingting blong olgeta i stap strong long nem blong hu, mo olsem wanem oli save mekem samting ya? Laswan tok ya, “Fasin Blong Stanap Strong Bambae i Sevem Laef Blong Yu,” bambae i soemaot olsem wanem Jisas i naf blong stanap strong tru long hadtaem ya we ol man oli mekem long hem, mo i no kam kros nating.
5 Yu mas tingbaot blong karem buk ya Ministry School, mo Wajtaoa we bambae yumi stadi long hem long wik blong asembli ya. Raetem ol smosmol not blong givhan long yu blong putum tingting blong yu i stap nomo long ol tok, mo blong luklukbak long olgeta afta long asembli. Long wan miting blong kongregesen, bambae yumi mekem tingtingbak long asembli ya.
6 Jeova nao i rerem bigfala lafet ya long saed blong spirit. !Yufala i kam! !Yufala i kakae! Bambae yumi singsing wetem glad, sipos yumi stap long fulwan asembli ya blong kasem ol nambawan tok we i kamaot.—Aes. 65:14.