Program Blong Nekis Spesel Dei Asembli

Plante save i kamaot tede blong soemaot olsem wanem man i save lukaotgud long hat blong hem blong i stap helti oltaem mo mekem se hem i save glad long laef mo gat wan longfala laef tu. Be samting we i impoten moa hemia hat blong yumi long saed blong spirit. Taswe stamba tok blong program blong spesel dei asembli we bambae i stap afta long Septemba 2003, hemia: “Mekem Wok Blong Jeova Wetem Olgeta Hat Blong Yu.” (1 Kron. 28⁠:9) ?Bambae yumi lanem wanem long taem ya?

Seket elda bambae i mekem tok ya, “Givhan Long Narafala Blong Mekem Wok Blong Jeova Wetem Tingting We i Glad.” Bambae i gat ol pleplei we i soemaot glad we man i kasem taem hem i givhan long man we i soem intres, mo taem hem i mekem Baebol stadi long ol man we oli wantem mekem wok blong Jeova. Evriwan we oli kam long taem ya bambae oli glad long faswan tok we brata we i visitim yumi bambae i mekem. Nem blong tok ya we bambae i mekem yumi haremgud mo i leftemap tingting blong yumi, hemia: “Lukaot Gud Long Hat Blong Yumi Long Wol Ya We i Fulap Long Trabol.” Program blong moning bambae i finis wetem tok blong baptaes.

Long aftenun, wan tok bambae i soem olsem wanem yumi save givhan long ol narafala, nem blong tok ya: “Givhan Long Ol Narafala.” ?Ol papa mama oli save mekem wanem blong lukaotgud long hat blong ol pikinini blong olgeta, blong ol nogud fasin oli no pulum olgeta? ?Olsem wanem oli save givhan long olgeta blong oli kam klosap long Jeova? Tok ya “Halpem Ol Pikinini Blong Yu Blong Oli Laekem Jeova Tumas,” bambae i givim ol gudfala advaes, mo bambae i soem olsem wanem blong mekem samting ya.

?Olsem wanem? ?Yumi yusum olgeta samting we Jeova i stap givim long yumi, blong mekem hat blong yumi long saed blong spirit i stap gud oltaem mo i strong? Las tok blong brata we i visitim yumi, hemia: “Holemtaet Fasin Blong Mekem Wok Blong Jeova Wetem Olgeta Hat Blong Yumi.” Bambae hem i tokbaot fo impoten samting we yumi mas mekem blong stap strong long saed blong spirit. ?Yumi traehad olsem wanem, mo yumi spenem hamas taem blong prea, stadi long Tok blong God, gohed strong long wok blong prij, mo joen wetem ol narafala Kristin? ?Olsem wanem? ?Yumi save kam moa gud long wan long ol samting ya?

Jeova i singaotem yumi se: “Yu mas lesin gud long tija blong yu oltaem, mo yu mas traehad blong lanem evri samting.” (Prov. 23⁠:12) I gud yu mekem plan naoia blong stap long spesel dei ya blong kasem ol gudfala advaes we i stanap long Baebol. Sipos yu mekem olsemia, asembli ya bambae i givhan long yu blong gohed blong mekem wok blong Jeova wetem olgeta hat blong yu mo wetem tingting we i glad.