‘Oltaem Yufala i Mas Putum Sol Long Ol Toktok Blong Yufala Blong Mekem Oli Tesgud’
1. ?I minim wanem se yumi putum sol long ol toktok blong yumi blong mekem oli tesgud?
1 “Oltaem yufala i mas kaengud taem yufala i toktok long ol man, olsem we yufala i putum sol long kakae blong mekem i tesgud, nao bambae yufala i save givim wan ansa we i stret long evri man wanwan.” (Kol. 4:6, NW) Putum sol long toktok blong yumi blong mekem oli tesgud i minim se yumi jusum gud ol toktok we yumi talem mo yumi toktok long wan fasin we i save mekem olgeta we yumi storian wetem olgeta oli haremgud. I impoten tumas we yumi mas toktok gud olsem long wok blong prij.
2. ?Olsem wanem Jisas i gat janis blong prij long woman Sameria?
2 Eksampol Blong Jisas: Taem Jisas i stap spel klosap long wan wel, hem i tekem janis blong storian wetem wan woman Sameria we hem i kam blong karem wota. Taem tufala i stap storian, woman ya i tokbaot sam samting we i laenap wetem fasin ya we ol man Sameria oli badfren wetem ol man Jiu. Hem i talemaot bilif blong hem se ol man Sameria hemia olgeta we oli kamaot long laen blong Jekob, be ol man Jiu oli talem se ol man Sameria oli ol strenja. Jisas i no traem agiu wetem woman ya, be hem i mekem se ol storian blong hem oli stanap long samting we i gud. Frut blong samting ya se, Jisas i gat janis blong prij long hem mo ol toktok blong Jisas oli givhan long woman ya mo ol man long taon we hem i stap long hem.—Jon 4:7-15, 39.
3. ?Olsem wanem yumi save folem eksampol blong Jisas taem yumi stap long wok blong prij?
3 Taem yumi prij, oltaem yumi mas tingbaot mak blong yumi—hemia blong ‘talemaot gud nius long ol man.’ (Rom 10:15) Taem yumi toktok long ol man long haos wanwan, yumi wantem serem wan tingting blong Baebol we i pulum intres blong olgeta mo we i mekem i gud long olgeta. Yumi no wantem givim tingting long olgeta se yumi kam blong agensem ol bilif blong olgeta. Sipos oli talem wan tingting we i rong, yumi no mas hareap blong stretem rong tingting blong olgeta. ?I gat sam samting long storian blong olgeta we yumi save agri long hem mo talem ol gudfala toktok blong givhan long olgeta? Maet yumi save ridim wan vas blong Baebol long hem olgeta mo talem se, “?Yu bin ridim vas ya finis samtaem?”
4. ?Wanem samting we yumi mas mekem taem man blong haos i tok strong?
4 ?Yumi mas mekem wanem taem man blong haos i tok strong no maet hem i wantem agiu nomo? Yumi mas gohed blong soemaot tingting daon mo kwaet fasin taem yumi storian long hem. (2 Tim. 2:24, 25) Sipos man i no laekem mesej blong Kingdom, i no nid blong gohed blong storian, yumi save toktok kaen long man ya blong stopem storian mo yumi aot.—Mat. 7:6; 10:11-14.
5. ?Wanem gudfala frut we wan sista i kasem taem hem i ansa long kaen fasin?
5 Gudfala Frut: Wan sista i wantem go prij long wan woman we i stap klosap long haos blong hem, be woman ya i kros mo i stap sakem ol rabis tok long sista ya. Long kaen fasin, sista ya blong yumi i talem se: “Mi sore we yu harem nogud olsemia. Be plis, mi wantem we yu gat wan gudfala dei.” Tu wik afta, woman ya i go noknok long doa blong sista ya, i talem sore from ol rabis tok we hem i sakem, mo i talem long sista ya se naoia hem i wantem lesin long samting ya we sista i wantem talem. !Oltaem, i mas gat gudfala frut sipos yumi ansa long kaen fasin!—Prov. 15:1; 25:15.
6. ?From wanem i impoten blong putum sol long ol toktok blong yumi taem yumi prij?
6 Yumi mas traem putum sol long ol toktok blong yumi taem yumi talemaot gud nius. Ale, nating se man i no wantem lesin, maet bambae hem i glad blong lesin nekis taem we wan Witnes blong Jeova i gobak long haos blong hem.