!Pruf Blong Strong Bilif!
1. ?Wanem ol samting we Jisas i talem se bambae oli mekem man i trabol tumas?
1 Ol aposol oli bin lesingud long Jisas we hem i tokbaot taem we bambae hem i rul mo en blong olfala fasin blong laef long wol ya. Hem i talem se bambae i gat ol samting i hapen we oli mekem man i trabol tumas, olsem bigfala faet, kakae i sot, graon i seksek, mo ol sik. Biaen, Jisas i talem long ol man blong hem se bambae ol man long wol ya oli no laekem olgeta nating, oli mekem i nogud long olgeta, oli kilim olgeta i ded. Ol giaman profet bambae oli girap mo oli pulum plante man oli go krangke. Bighaf blong ol man bambae oli no moa lavem God.
2. ?From wanem i nambawan we yumi stap talemaot gud nius long olgeta ples long wol?
2 From samting ya, ating ol aposol oli sapraes taem Jisas i talem se bambae gud nius blong Kingdom blong God i go long olgeta ples long wol. (Mat. 24:3-14) Tede i nambawan blong luk se profet tok ya i stap kamtru fulwan. Nating se yumi laef long trabol taem, yumi ol Witnes blong Jeova yumi stap wok strong blong talemaot gud nius. Lav blong ol man long wol ya i stap kam moa kolkol, be lav blong yumi i olsem wan faea we i laet long hat blong yumi, i stap kam bigwan moa. I tru se “olgeta man” oli no laekem yumi nating, be yumi stap prij long klosap evri neson.
3. ?Yu yu luk wanem long ripot blong fulwol we i leftemap tingting blong yu?
3 I leftemap tingting blong yumi bigwan blong tingtingbak long ol wok we ol Witnes blong Jeova oli mekem long laswan sevis yia, olsem ripot long pej 3 kasem 6 i soem. Yia ya i namba 16 yia nao we yumi bitim wan bilian aoa long wok ya blong prij mo mekem disaepol. !Hemia wan pruf blong strong bilif! Namba blong ol paenia i kam antap 5.8 pesen, ol pablisa oli kam antap 3.1 pesen, mo ol Baebol stadi oli kam antap 4.4 pesen. Namba blong ol man we oli tekem baptaes i kam antap tu, hem i 20.1 pesen moa i bitim las yia. I nambawan tumas blong luk se naoia i gat klosap seven milian man we oli stap holemstrong long wok blong Jeova. !Hemia moa man i bitim eni narafala taem long histri blong man! ?Taem yu lukluk ripot ya, wanem samting i leftemap tingting blong yu?
4. ?Wanem ol traem we wan man i bin winim blong kasem mak blong baptaes?
4 I tru se ol namba ya oli gud tumas blong luk, be yumi no mas fogetem se ol namba ya oli minim ol man we oli givim pruf blong strong bilif. Tingbaot wan man we i gruap long Bolivia, nem blong hem Guillermo. Hem i bon long 1935, mo taem hem i gat naen yia hem i stat blong wok long wan plantesen blong koka, hemia ol smolsmol tri we oli wokem drag ya koken long hem. Stat taem Guillermo i pikinini nomo, hem i kakae lif blong koka blong mekem se hem i no moa harem nogud long bodi blong hem from hadwok we hem i mas mekem. Biaen, hem i dring alkol bitim mak mo i smok sigaret. Be taem Guillermo i stat blong stadi mo hem i lanem wanem we Jeova i wantem hem blong mekem, hem i lego fasin blong smok mo biaen hem i no moa dring bitim mak. Wanem we Guillermo i faenem se i wan bigfala traem long hem, hemia blong lego fasin blong kakae ol lif blong koka, we hem i bin mekem ful laef blong hem. Hem i prea strong long saed ya mo biaen, hem i winim. Afta we hem i fri long ol nogud samting ya, hem i tekem baptaes. Hem i talem se: “Naoia mi harem se mi mi klin mo mi glad tumas.”
5. ?Wanem samting we yu yu wantem?
5 Jeova i intres bigwan long ol man. Hem i wantem tumas we olgeta man oli tanem tingting blong olgeta. (2 Pita 3:9) Hemia samting we yumi wantem tu. I gud we hat blong yumi i pusum yumi blong givim bes blong yumi blong gohed blong halpem ol man we hat blong olgeta i stret, blong olgeta tu oli save Jeova mo lavem hem.