Reregud From Memoriol

!I wan bigfala glad mo blesing long ol man blong Kraes blong reregud from naet ya we bambae oli mekem lafet blong tingbaot bakegen ded blong Jisas Kraes! (Luk 22:19) ?Wanem sam samting we yumi save mekem blong reregud from Memoriol?

◼ Taem Mo Ples: Evriwan i mas save stret taem mo ples we bambae yumi mekem miting blong Memoriol. Sipos tu no tri kongregesen i mekem miting long semfala Haos Kingdom, i impoten we evriwan i kam long stret taem. Mo tu, from we i no gat tumas taem bitwin ol miting ya, i gud we evriwan i no tekem tumas taem blong aot long Haos Kingdom, blong mekem se ol narafala we oli kam biaen oli no let long miting blong olgeta. Evriwan i mas traehad blong mekem se man i no fasfas tumas long rod blong kam insaed long Haos Kingdom, long rum blong welkamem ol man, long saed blong rod we man i wokbaot long hem, mo long ples blong putum trak.

◼ Pepa Blong Singaot Ol Man: Ol pablisa wanwan oli mas gat inaf pepa blong singaot ol man mo oli mas savegud wanem we i stap insaed long pepa ya. ?Yu yu lanem fastaem long haos, olsem wanem blong seremaot pepa ya? ?Bambae yu givim pepa ya long hu? Yumi mas traehad blong seremaot olgeta pepa blong singaot ol man.

◼ Transpot: Maet sam man we oli intres mo sam brata sista tu, oli nidim transpot no maet samfala oli nidim we yumi givhan long olgeta. ?Wanem ol plan we kongregesen i mekem finis blong givhan long olgeta?

◼ Bred Mo Waen: Meksua se oli no pasem bred mo waen bifo we san i godaon. Mekem plan blong karem bred mo waen i go long ol tabu Kristin we oli sik mo we oli no save kam long miting ya. Meksua se yufala i pem stret flaoa blong mekem bred mo stret waen, mo mekem reregud tufala samting ya.—Lukluk Wajtaoa blong Februari 15, 2003, Wajtaoa, pej 14-15, haf 14, 17.

◼ Haos Kingdom: Haos kingdom i mas klingud bifo taem blong Memoriol. Bifo we miting i stat, oli mas putum rere finis ol plet, glas waen mo wan gudfala tebel mo kaliko blong hem. Sipos kongregesen i mekem miting ya long wan narafala haos, meksua se ol maekrofon bambae oli wokgud, blong mekem se olgeta we oli stap bambae oli save harem brata we i givim tok blong Memoriol. Ol elda oli mas jusum ol brata we bambae oli welkamem ol man mo pasem bred mo waen i goraon. Mo tu, sam dei bifo long Memoriol, oli mas talemaot long olgeta brata ya, wanem ol wok we bambae oli mekem long taem blong Memoriol, olsem wanem bambae oli mekem wok ya, mo se klos mo hea blong olgeta i mas klin.

Olsem kongregesen, yumi wanwan i wantem reregud from impoten lafet ya, Memoriol blong ded blong Jisas Kraes. I sua se Jeova bambae i blesem bigwan evriwan we oli soemaot tangkiu blong olgeta, from olgeta samting we Jeova i givim long ol man tru long ransom sakrefaes blong Pikinini blong hem we Hem i laekem hem tumas, hemia Jisas Kraes.