Ansa Long Wan Kwestin
◼ ?From wanem yumi mas skelemgud fasin ya blong lesin long ol miting blong kongregesen tru long telefon long haos blong yumi?
Plante kongregesen oli wokem wan rod blong givhan long ol brata sista wanwan we maet samtaem oli no save go long ol miting blong kongregesen long Haos Kingdom from sik no sam narafala problem we oli no save blokem. Rod ya hemia se oli save lesin long ol tok blong miting tru long telefon long haos blong olgeta. Hemia wan rod we i soem lav long ol brata sista long kongregesen. Be i impoten blong skelemgud mo lukaotgud long fasin blong yumi blong yusum rod ya, blong meksua se olgeta ya nomo we oli gat wan gudfala risen oli save yusum rod ya. From samting ya, elda we i lukaot long saed ya i mas mekem gud plan mo jekem oltaem se oli “mekem olgeta samting long fasin we i stret gud, we ol man oli glad long hem.”—1 Kor. 14:40.
Ol elda oli mas lukluk fastaem long ol pablisa long kongregesen blong olgeta we oli sik longtaem no oli handikap, no we oli mas stap long haos nomo from sam narafala risen, blong mekem se olgeta ya oli save lesin long tok blong miting tru long telefon. Wan pablisa we i sik smoltaem, no i no naf blong mekem wan samting, no wan Baebol studen we i gohed gud long stadi blong hem be i no save aot long haos blong hem, olgeta ya oli save yusum semfala rod ya tu mo kongregesen i save kaontem olgeta wetem ol man we oli kam long miting. Samtaem maet i gat plante man we oli mas lesin long tok blong miting tru long telefon, be ?olsem wanem sipos evriwan i no save lesin wantaem? Ol brata oli save yusum sam narafala rod blong givhan long samfala, olsem maet oli save rikodem ol tok blong miting long kaset mo givim long olgeta.
Be i tru se taem wanwan long yumi i stap long ol miting blong yumi, yumi save kasem plante moa gud samting. Taem yumi stap long Haos Kingdom wetem ol brata sista blong yumi samting ya i mekem se ‘bilif blong olgeta i save givhan long yumi, olsem we bilif blong yumi tu i save givhan long olgeta’ mo fasin ya i givhan long ol niuwan blong oli luksave se i impoten blong stap long miting. Taem yumi stap long ol miting blong yumi, yumi kasem moa samting taem yumi save wajem ol pleplei, ol elda oli save givhan long wanwan long yumi, mo yumi harem gud long lav we ol brata sista oli soemaot. Wan olfala sista i harem gud tumas taem hem i aot long Haos Kingdom blong gobak long haos nao wan narafala sista i putum han blong hem i goraon long hem. Olfala sista i talem se: “!Hemia i wan samting we yu no save kasem sipos yu lesin long miting tru long telefon!”—Rom 1:11, 12.
Olsem Ana we “oltaem nomo, hem i stap long haos blong God,” tede, plante long ol olfala brata sista blong yumi oli stap oltaem long ol Kristin miting taem oli harem se oli naf mo i no gat samting i blokem olgeta. (Luk 2:36, 37) Taem oli no naf blong kam long miting, oli lesin long ol tok blong miting long haos tru long telefon. Be oli no gat tingting ya se from we oli save lesin long miting long haos, ale oli no moa nid blong go long ol miting long Haos Kingdom. Oli givim gudfala eksampol long yumi blong folem. I gud we yumi wanwan i traehad blong stap oltaem long ol miting blong yumi blong wosip long Haefala God blong yumi, Jeova.—Sam 95:1-3, 6; 122:1.