‘Gudfala Wok Blong Man We i Waes, i Soemaot We Waes Ya i Tru’

1. ?Wanem tingting we sam man oli gat long saed blong wok blong yumi?

¹ Samtaem, yumi mitim sam man long wok blong prij we oli agensem yumi, from we oli no kasem save long yumi, no oli harem sam giaman toktok we ol narafala oli talem long saed blong ol Witnes blong Jeova. Ating oli luk sam giaman ripot long saed blong yumi we oli kamaot long televisin no long niuspepa, ale oli gat nogud tingting long yumi. Long sam ples, ol man oli tokbaot yumi olsem “wan krangke skul we i denja.” Sipos yumi mitim sam man we oli tok nogud long yumi olsem, ?bambae yumi mekem wanem?

2. ?Wanem bambae i givhan blong tingting blong yumi i no foldaon, taem ol man oli tok nogud long saed blong yumi?

² Gat Gudfala Tingting: Long faswan handred yia, plante taem ol man oli gat rong tingting long Jisas mo ol narafala man blong wok blong God, mo oli tok nogud long olgeta. (Wok 28:22) Nating se i olsem, Jisas mo ol man blong God oli no letem samting ya i mekem se oli sem long wok blong prij. Jisas i talem se: “Ol gudfala wok blong ol man we oli stap folem waes blong God, oli stap soemaot we waes ya i tru.” (Mat. 11:18, 19) Jisas i gohed nomo blong mekem samting we Papa blong hem i wantem, mo hem i wok strong long wok ya. Hem i save se ol man we oli wantem tumas blong faenem trutok, bambae oli luksave se gud nius ya i save halpem olgeta. Yumi tu, yumi save blokem tingting blong yumi blong i no foldaon taem ol man oli tok nogud long saed blong yumi. Blong mekem olsem, yumi mas tingbaot se ol man oli tok nogud long Pikinini blong God tu.

3. ?From wanem yumi no mas sapraes taem ol man oli talem ol giaman toktok mo oli agensem yumi?

³ Jisas i soemaot se ol man blong wol ya bambae oli no laekem nating ol man blong hem, sem mak olsem we oli no laekem hem. (Jon 15:18-20) Taswe, yumi no mas sapraes taem ol man tede oli talem ol giaman toktok long saed blong yumi mo oli agensem yumi. Yumi mas save se moa we en i klosap, moa we Setan i kros. Taswe, bambae oli agensem yumi moa yet. (Rev. 12:12) Yumi mas glad from we samting ya i soemaot se klosap nao wol blong Setan i lus.

4. ?Sipos yumi mitim wan man we i agensem yumi, bambae yumi mekem wanem?

⁴ Toktok Gud Long Olgeta: Taem wan man i agensem yumi, oltaem yumi mas toktok gud long hem mo yumi mas mekem tingting blong yumi i stap daon. (Prov. 15:1; Kol. 4:5, 6) Sipos man ya i rere blong lesin, maet yumi save eksplenem long hem se i gat plante giaman toktok we ol man oli talem long saed blong ol Witnes blong Jeova. Sipos no, yumi save askem long hem from wanem hem i no glad long yumi. Taem yumi toktok kaen olsem, hemia i save pulum hem blong tingting se maet ol samting we hem i harem long saed blong ol Witnes blong Jeova, oli no tru. Ale bambae hem i lesin taem ol Witnes oli pas bakegen long haos blong hem. Be sipos man ya i kros tumas, i moa gud we yumi aot. Yumi save se nomata wanem tingting we ol narafala oli gat long saed blong yumi, be Jeova i tinghae long wok blong prij we yumi mekem.—Aes. 52:7.