Yu Mas Lukaot Gud Taem Yu Stap Prij
1. ?From wanem yu mas lukaot gud taem yu prij?
1 Taem ol man blong God oli stap prij, oli “olsem ol sipsip we oli go long medel blong ol wael dog.” Oli stap prij long ‘ol man we oli gat ol krangke fasin mo oli agens long evri samting.’ (Mat. 10:16; Fil. 2:15) Oltaem yumi harem nius blong ol man we oli maj long rod, ol stronghed grup we oli faet, mo ol man we oli holemtaet narafala blong askem mane long famle blong hem. Olgeta samting ya i soemaot se ol man nogud oli stap kam “mowas olgeta.” (2 Tim. 3:13) Taswe taem yu prij, yu mas lukaot gud mo yu mas “waes” blong luksave trabol. ?Wanem advaes blong Baebol we i save givhan long yu?—Mat. 10:16.
2. Maet yu mas aot long ples we yu prij long hem. ?From wanem?
2 Yu Mas Waes: Ol Proveb 22:3 i talem se man we i waes bambae i “ronwe” long trabol. Maet ples we yu prij long hem i sef nomo, be ol samting i save jenis hareap. !Yu mas wekap gud! Ating yu luk we plante polis oli stap kam, no yu luk we ol man oli stap hivap long rod. Samtaem wan man we yu prij long hem i givim woning long yu. I nogud yu wantem save moa, ale yu go klosap blong traem lukluk wanem trabol ya. I moa waes blong aot kwiktaem, mo blong go prij long wan narafala ples.—Prov. 17:14; Jon 8:59; 1 Tes. 4:11.
3. ?Wanem advaes long Prija 4:9 we yu save folem long wok blong prij?
3 Yu No Prij Yu Wan: Prija 4:9 i talem se, taem “tu man i stap joen wanples blong mekem wan wok, hem i moa gud, i winim we wan man nomo i stap wok.” Ating longtaem finis i kam yu stap prij yu wan nomo. ?Be i sef yet blong mekem olsem? Long sam ples i sef yet. Be long sam narafala ples, i no sef blong wan sista no wan yangfala i prij hem wan, antap moa long sapa. Ol samting we i hapen long ol yia we i pas i soemaot se i moa sef blong prij wetem narafala. (Pri. 4:10, 12) Taem yumi prij olsem wan grup, evriwan oli mas traem lukaot long narafala blong oli stap sef. Taem yu aot long ples blong prij, yu no mas foget blong talem long narafala long grup.
4. ?Yumi save mekem wanem, blong evriwan long kongregesen oli stap sef?
4 Ol elda ‘oli stap lukaot long Kristin laef blong yumi.’ Taswe oli givim ol advaes long yumi, we i stret blong winim ol trabol long ples blong yumi. (Hib. 13:17) Sipos tingting blong yumi i stap daon mo yumi obei long olgeta, Jehova bambae i blesem yumi. (Maeka 6:8; 1 Kor. 10:12) I gud ol man blong God oli gohed blong prij long olgeta man long ples blong olgeta, be oltaem oli mas lukaot gud.