Mekem Ol Baebol Stadi We Oli Karem Gudfala Frut
1. ?Wanem wok we ol pablisa oli gat, taem oli mekem Baebol stadi?
1 I no gat man i save mekem wok blong God, sipos Jehova i no “pulum hem i kam.” (Jon 6:44) Nating se i olsem, ol pablisa we oli mekem Baebol stadi oli mas mekem wok blong olgeta blong givhan long ol man blong oli kam klosap long Papa blong olgeta long heven. (Jem. 4:8) Blong oli mekem olsem, oli mas rere gud. Fasin ya blong ridim wanwan haf mo askem kwestin we i stap, i gud be i no naf blong givhan long Baebol stadi blong kasem save long samting we hem i stap lanem mo i mekem hem i gohed gud.
2. ?Wanem gudfala frut we wan Baebol stadi bambae i kasem?
2 Ol pablisa oli mas givhan long ol Baebol stadi blong olgeta, blong mekem se ol Baebol stadi ya oli save karem ol gudfala frut. Oli mas givhan long olgeta blong oli: (1) kasem save long samting we Baebol i tijim, (2) agri long samting we Baebol i tijim, mo (3) folem ol samting we Baebol i tijim. (Jon 3:16; 17:3; Jem. 2:26) I save tekem plante manis blong givhan long wan man blong folem ol rod ya. Nating se i olsem, ol wanwan rod ya oli soemaot ol samting we Baebol stadi ya i mekem blong fren gud moa wetem Jehova, mo blong givim laef blong hem long Jehova.
3. ?From wanem wan gudfala tija i askem ol kwestin blong save tingting blong Baebol stadi?
3 ?Wanem Tingting Blong Baebol Stadi?: I gud we yumi letem Baebol stadi i talemaot ol tingting blong hem long taem blong stadi, i bitim we yumi nomo yumi stap toktok. Olsem nao, bambae yumi naf blong luksave sipos Baebol stadi ya, i kasemsave samting we hem i lanem mo i agri long samting ya. (Jem. 1:19) ?Hem i kasem save wanem we Baebol i talem long samting we yutufala i stap tokbaot? ?Hem i save eksplenem samting ya long prapa toktok blong hem? ?Hem i gat wanem filing long samting we hem i lanem? ?Hem i bilif se samting we Baebol i tijim i tru? (1 Tes. 2:13) ?Hem i kasem save se, samting we hem i stap lanem i mas jenisim fasin blong laef blong hem? (Kol. 3:10) Yumi save kasem ansa blong ol kwestin ya, sipos yumi askem ol gudfala kwestin we oli pulum tingting blong hem, mo biaen yumi lesin long hem.—Mat. 16:13-16.
4. Sipos i had long wan stadi blong kasemsave no folem wan rul blong Baebol, ?yumi mas mekem wanem?
4 Ol fasin we yumi stap mekem oltaem mo ol tingting blong yumi, plante taem i had blong yumi lego. (2 Kor. 10:5) ?Olsem wanem sipos stadi blong yumi i no agri mo i no folem ol samting we hem i lanem long laef blong hem? Yumi mas gat longfala tingting blong letem taem i pas blong Tok blong God, mo Tabu spirit i wok long hat blong stadi ya. (1 Kor. 3:6, 7; Hib. 4:12) Yumi no mas fosem wan Baebol stadi blong folem wan rul blong Baebol we maet i had long hem blong mekem, no maet i had long hem blong kasemsave. Long taem olsem, i moa gud we yumi jusum wan narafala topik blong tokbaot wetem stadi ya. Taem yumi gohed blong tijim hem wetem longfala tingting mo wetem lav, maet sloslo bambae hem i wantem jenisim ol fasin ya we fastaem, i had long hem blong mekem.