Leta Blong Hed Kampani
Ol Brata Mo Sista:
“Oltaem mitrifala i stap talem tangkiu long God from yufala evriwan. Mo oltaem mifala i stap tingbaot yufala long ol prea blong mifala. Oltaem, long fes blong God we i Papa blong yumi, mifala i stap tingbaot we fasin blong yufala i soemaotgud bilif blong yufala, mo hadwok blong yufala i soemaot we yufala i lavem God tumas. Mo mifala i stap tingbaot we yufala i stap stanap strong yet from we tingting blong yufala i stap strong long Jisas Kraes, Masta blong yumi.” (1 Tes. 1:2, 3) !Ol gudfala tok ya oli soemaot sem filing we mifala i gat long yufala! Mifala i talem tangkiu long Jehova from yufala mo ol gudfala wok we yufala i stap mekem. ?From wanem?
Long ol yia we i pas, yufala i bisi blong mekem ol wok we i “soemaotgud bilif blong yufala,” mo “hadwok blong yufala i soemaot we yufala i lavem God tumas.” Ol wok ya oli joen wetem wok blong Kingdom. Plante oli traehad blong mekem moa long wok blong prij. Samfala oli go long wan narafala ples no kantri we i nidim moa man blong talemaot gud nius. Sam narafala oli prij long ol pablik ples. Plante oli mekem wok blong haftaem paenia long ol manis klosap long Memoriol, no long taem blong visit blong eria elda, no long taem blong spesel wok long manis Ogis 2014. Nating se laef blong yufala i no sem mak, be mifala i luk we yufala i mekem wok blong Jehova long fulhat blong yufala, mo mifala i glad tumas long yufala. (Kol. 3:23, 24) !Ol wok ya we i “soemaotgud bilif blong yufala” i wan risen blong mifala i talem tangkiu long Jehova!
Mifala i talem tangkiu tu long yufala from ol ‘hadwok blong yufala we i soemaot se yufala i lavem God tumas,’ taem yufala i joen long wok blong bildim ol defdefren haos we oli blong sapotem wok blong Kingdom long fulwol. Yumi nidim tumas ol haos ya from we namba blong ol man blong Jehova i stap kam antap bigwan. (Aes. 60:22) Long las yia, namba blong ol pablisa hem i 8,201,545, mo evri manis namba blong ol Baebol stadi hem i 9,499,933. Taswe i nidim blong wokem sam moa branj ofis, no mekem oli kam bigwan moa. !Be yumi nidim sam moa Haos Kingdom tu! Yumi mas wokem sam moa translesen ofis long plante narafala ples, olsem nao olgeta we oli transletem ol buk mo magasin i go long wan lanwis, oli save stap mo wok nomo long ples we ol man oli toktok lanwis ya.
Taswe i gud yumi askem se: ‘?Mi save mekem wanem blong sapotem wok blong bildim ol haos ya?’ Samfala oli joen long wok blong bildim ol haos. Mo nating se yumi gat save blong wokem ol haos no yumi no gat, yumi evriwan i gat janis blong givim ol nambawan samting we yumi gat blong sapotem wok ya. (Prov. 3:9, 10) Taem ol man Isrel oli stap wokem haos tapolen, oli glad blong givim plante samting blong sapotem wok ya, nao Moses i mas sanem toktok i go long olgeta blong blokem olgeta blong oli no moa givim ol samting. (Eks. 36:5-7) Stori ya i gud tumas mo i pulum yumi blong yumi mekem sem mak. !Taem yufala i joen long wok ya, ol ‘hadwok blong yufala we i soemaot se yufala i lavem God tumas’ i givim wan narafala risen bakegen blong mifala i talem tangkiu long Jehova!
Yumi glad tumas taem yumi luk ol Kristin brata mo sista oli stanap strong. Yu traem tingbaot ol brata long Saot Koria. Stat long yia 1950, oli putum ol yangfala brata long kalabus blong plante yia, from we oli no wantem joen long faet. Sem trabol ya i hapen long plante brata, be oli stanap strong. !Eksampol blong olgeta i mekem bilif blong yumi i strong!
Long Eritrea, 3 brata oli stap bitim 20 yia long kalabus. Mo oli putum sam narafala brata, wetem sam sista tu mo ol pikinini blong olgeta, long kalabus blong smoltaem. Ol brata oli traehad bigwan blong faenem wan rod blong mekem se ol brata mo sista ya oli aot long kalabus, be i no gat rod nating. Nating se i olsem, ol brata mo sista ya oli no lego Jehova. Oli stanap strong long ol hadtaem ya. Yumi mas prea from olgeta.—Rom 1:8, 9.
I tru se plante long yufala i no go long kalabus from bilif blong yufala. Be plante long yufala i olfala, i sik, famle i no stap long trutok, maet man no woman, i agensem yufala, no yufala i fesem sam narafala trabol bakegen. !Be nating se i olsem, yufala i stap gohed blong mekem wok blong Jehova! (Jem. 1:12) Mifala i glad tumas long yufala. !Fasin blong yufala blong stanap strong longtaem blong mekem wok blong Jehova, i wan narafala risen blong mifala i talem tangkiu long Jehova!
Yes, ol gudfala wok we i soemaotgud bilif blong yufala, ol hadwok we i soemaot se yufala i lavem God tumas, mo fasin blong stanap strong longtaem, oli ol nambawan risen blong mifala i ‘talem tangkiu long Jehova from we hem i gud.’ (Sam 106:1) Mifala i lavem yufala tumas, mo mifala i prea se Jehova bambae i givim paoa long yufala, i mekem yufala i stanap strong oltaem, mo i blesem yufala blong yufala i save mekem wok blong hem blong olwe.
Ol brata blong yufala,
Hed Kampani Blong Ol Witnes Blong Jehova