Tri Rod Blong Dipen Long Jehova

Deved i winim Golaeat from we hem i dipen long Jehova. (1Sa 17:45) Jehova i wantem soemaot paoa blong hem blong givhan long ol man blong hem. (2Kr 16:9) ?Olsem wanem blong dipen long ol samting we Jehova i givim blong halpem yumi, be i no long gudhan mo ekspiriens we yumi gat? Hemia tri rod:

• Prea oltaem. Yumi no mas prea nomo blong God i fogivim ol mastik blong yumi, be yumi mas prea tu blong hem i givim paoa taem yumi fesem wan traem. (Mt 6:12, 13) Yumi no mas prea nomo blong God i blesem ol desisen we yumi mekem finis, be yumi mas prea tu blong God i lidim mo i givim waes, bifo we yumi mekem ol desisen.—Jem 1:5

• Gat wan gudfala program blong stadi mo ridim Baebol. Ridim Baebol evri dei. (Sam 1:2) Tingting dip long ol eksampol long Baebol, mo folem ol lesen we yu lanem. (Jem 1:23-25) Rerem gud fastok blong prij i bitim we yu dipen long gudhan we yu gat finis. Rerem gud ol miting blong yu, blong yu save kasem ol gudfala samting from.

• Wok gud wetem oganaesesen blong Jehova. Yumi mas save ol daereksen we i kam long oganaesesen mo yumi mas kwik blong folem. (Na 9:17) Lesin long ol elda taem oli givim advaes mo lidim yumi.—Hib 13:17

WAJEM VIDEO YA I NO NID BLONG FRAET TAEM I GAT FASIN AGENS, BIAEN ANSA LONG OL KWESTIN YA:

• ?Ol brata mo sista oli fraet long wanem?

• ?Wanem i halpem olgeta blong winim fraet blong olgeta?