Rerem Hat Blong Yu

Taem yumi stadi long Baebol, yumi wantem se ol samting we yumi lanem oli mas gat paoa long hat, tingting, mo filing blong yumi. Esra i soemaot wan gudfala eksampol long saed ya, taem hem i “rerem hat blong hem blong stadi long Loa blong Jehova.” (Esra 7:10) ?Be olsem wanem yumi save rerem hat blong yumi?

Prea. Bifo we yu stat blong stadi, i gud yu prea, mo yu askem long Jehova blong i halpem yu blong kasemsave mo folem samting we yu lanem.—Sam 119:​18, 34.

Gat tingting daon. God i haedem trutok long ol praod man we oli dipen long prapa save blong olgeta nomo. (Luk 10:21) No mekem risej from yu wantem soem yu nomo long ol narafala. Sipos yu stadi nao yu luksave se tingting blong yu i no laenap wetem tingting blong God, i gud yu gat tingting daon mo yu jenisim tingting blong yu.

Traem lesin long wan singsing blong Kingdom. Miusik i save tajem moa hat blong yumi, mo i rerem tingting blong yumi blong mekem wosip. Taswe sipos yu lesin long wan singsing blong Kingdom bifo we yu stat blong stadi, hemia bambae i halpem yu blong rerem hat blong yu.