Jehova i Halpem Mitufala Blong ‘Gru Gud Long Ples We Hem i Planem Mitufala Long Hem’

Brata mo Sista Kassholms i go long Skul Blong Gilead long 1979, mo blong plante yia, Jehova i “planem” tufala, o i sanem tufala, i go prij long Iran, Morisas, Mianma, Tansania, Uganda, mo Sair. Tufala i harem advaes ya long wan tija long Gilead, hemia Jack Redford. Mo advaes ya i halpem tufala evritaem we Jehova i “planem” tufala, i “pulumaot” tufala, mo i “planem tufala bakegen” long ol defdefren ples. I gud yumi letem tufala i eksplenem.

Plis yutufala i save talem olsem wanem yutufala i kasem trutok.

Mats: Papa blong mi i laef long Polan long taem blong Wol Wo II, mo hem i luk plante nogud samting we Katolik Jej i stap mekem. Be oltaem hem i se: “!Mi save se i mas gat wan trufala skul samples!” Samtaem biaen, mi luksave se hem i tru. Mi mi pem plante sekenhan buk, mo wan long olgeta hemia blu buk ya Trutok Blong Soemaot Rod Blong Itenel Laef. Taetel blong buk ya i pulum ae blong mi, mo long naet ya nomo mi ridim ful buk ya, mo mi save se mi faenem trutok.

Stat long Eprel 1972, mi ridim plante moa buk blong ol Witnes blong Jehova, mo mi kasem ansa blong ol kwestin we mi gat long saed blong Baebol. Mi harem olsem bisnesman ya long parabol blong Jisas we taem hem i faenem perel ya we i sas we i sas, hem i go salem evri samting blong hem blong i save pem perel ya. Ale, mi “salem” o lego plan blong mi blong go long yunivesiti blong kam wan dokta, blong mi save pem “perel” ya, hemia trutok we mi faenem. (Mat. 13:​45, 46) Mo mi baptaes long 10 Disemba 1972.

I no wan yia yet, perens blong mi mo smol brata blong mi, olgeta tu oli stadi Baebol mo oli baptaes. Long Julae 1973, mi stat blong mekem wok blong Jehova fultaem. I gat wan naesfala paenia sista long kongregesen blong mifala we i rili lavem Jehova, hemia Ann-Catrin. Mitufala i stat blong lavem mitufala, ale mitufala i mared long 1975, mo mitufala i spenem fo yia long taon ya Strömsund, hemia wan naes ples long Swiden we ol man oli glad blong harem trutok.

Ann-Catrin: Papa blong mi i kasem trutok klosap long en blong ol yia blong hem long yunivesiti long Stockholm. Long taem ya, mi gat tri manis nomo, be hem i stap tekem mi mi go long ol miting mo wok blong prij. Mama i no laekem nating, mo i traem blong pruvum se ol Witnes oli rong. Be hem i no win, ale sam taem afta, hem tu i baptaes. Mi mi baptaes taem mi gat 13 yia, mo taem mi gat 16 yia, mi stat blong paenia. Mi paenia long taon ya Umeå, we i nidim moa man blong prij, mo biaen mi kam wan spesel paenia.

Afta we mi mo Mats i mared, mitufala i glad blong halpem plante man blong oli save trutok. Wan long olgeta hemia Maivor. Hem i wan yang gel we i lego spot blong hem i save mekem moa long wok blong Jehova, mo i paenia wetem smol sista blong mi. Long 1984, tufala i go long Gilead, mo tufala i go long Ekwado olsem ol misinari.

Taem yutufala i misinari, ?olsem wanem yutufala i folem advaes ya blong ‘gru gud long ples we Jehova i planem yutufala long hem’?

Mats: Plante taem Jehova i “planem mitufala bakegen” long ol niufala ples. Be mitufala i wantem stap olsem wan tri we “rus” blong mitufala i fas strong long Jisas. I min se mitufala i mekem bes blong mitufala blong folem fasin blong hem blong gat tingting daon. (Kol. 2:​6, 7) Eksampol, taem ol brata mo sista oli mekem samting long fasin we i defren long wanem we mitufala i lan blong mekem, mitufala i no komplen, be mitufala i traem blong kasemsave long tingting mo kalja blong olgeta mo luk from wanem oli mekem olsem. Taem mitufala i traehad blong folem fasin blong Jisas, mitufala i harem olsem we oli ‘planem mitufala long saed blong wota we i stap ron,’ blong mitufala i save gru gud long ples we oli sanem mitufala i go long hem.—Sam 1:​2, 3.

Ann-Catrin: Taem oli sanem mitufala i go long wan niufala ples, mitufala i olsem wan tri we oli planem bakegen mo i nidim laet blong san blong i save gru gud. Oltaem Jehova i olsem “wan san” long mitufala. (Sam 84:11) Hem i givim ol gudfala brata mo sista long mitufala. Eksampol, ol brata mo sista long smol kongregesen blong mifala long Tehran, long Iran, oli folem gud eksampol blong ol man long Baebol, oli welkamem gud mitufala mo serem samting we oli gat long mitufala. Mitufala i laekem blong stap long Iran, be long Julae 1980, gavman i putum tabu long wok blong yumi, mo wan dei oli givim 48 aoa nomo long mitufala se mitufala i mas aot long kantri. Ale branj i sanem mitufala i go long Sair (naoia hem i Kongo) long Afrika.

Taem mi harem se bambae mitufala i go long Afrika, mi krae. Mi harem plante nius long saed blong ol snek mo ol sik long Afrika, taswe mi fraet. Be tu gudfala fren we i stap longtaem long Afrika, tufala i se: “!Yutufala i no fraet! !Yutufala i neva kam long Afrika! !Mitufala i save se sipos yutufala i kam, bae yutufala i laekem!” !Mo i tru, mitufala i laekem! Ol brata mo sista oli gat lav mo oli kaen. Sikis yia afta, taem mitufala i mas aot long Sair from we oli putum tabu long wok blong yumi, mi laf from we naoia mi stap prea long Jehova se: “Plis, mitufala i wantem stap long Afrika.”

?Wanem ol blesing we yutufala i kasem?

Mats: From we oli sanem mitufala i go long plante defren ples, mitufala i mitim plante misinari blong ol defren kantri, mo mifala i kam ol gudfala fren. Mo tu, sam ples we mitufala i stap long hem, mitufala wanwan i gat samwe long 20 Baebol stadi olsem, mo hemia i mekem mitufala i glad tumas. Mo samting we mi tingbaot moa, hemia gudfala fasin blong ol brata mo sista long Afrika. Long taem ya we mitufala i visitim ol kongregesen long Tansania, mitufala i slip nomo long trak, be ol brata mo sista oli givim evri samting we mitufala i nidim, nating se oli pua. (2 Kor. 8:3) I gat wan taem long dei we i rili spesel long mitufala, hemia long en blong dei. Mitufala i singaot taem ya se stori taem. Long taem ya, mi mo Ann-Catrin i sidaon mo tokbaot evri samting we i hapen long dei ya, mo mitufala i talem tangkiu long Jehova from we hem i lukaot gud long mitufala.

Ann-Catrin: Long mi, mi glad tumas se mi save plante brata mo sista we oli blong ol defdefren kantri. Mitufala i lanem sam niu lanwis olsem Farsi, Franis, Luganda, mo Swahili, mo mitufala i lan long plante defren kalja tu. Mitufala i halpem plante man blong oli kam ol niufala disaepol, mitufala i gat plante gudfala fren, mo mifala i wok gud tugeta we “solda blong wan i joen long solda blong narawan.”—Sef. 3:9.

Mo tu, mitufala i luk plante nambawan samting we Jehova i wokem. Evri taem we oli sanem mitufala i go long wan niufala ples, mitufala i harem olsem se Jehova nao i stap tekem mitufala i goraon blong soem ol ples long mitufala. Hem i tijim mitufala long plante samting, we sipos mitufala nomo i go long ol ples ya, bambae mitufala i neva lanem.

?Wanem ol hadtaem we yutufala i fesem? ?Mo wanem i givhan long yutufala?

Mats: Plante taem mitufala i kasem ol sik olsem malaria. Mo Ann-Catrin i kasem sam sik we mifala i mas karem hem kwiktaem i go long hospital blong kasem operesen. Mo mitufala i wari tu from ol perens blong mitufala we oli olfala, taswe mitufala i talem tangkiu long ol brata mo sista blong mitufala we oli wok had blong lukaot long olgeta. Oli mekem wok ya wetem lav, longfala tingting, mo glad. (1 Tim. 5:4) Mitufala tu i mekem sam samting blong sapotem olgeta nating se mitufala i stap longwe, be samtaem mitufala i harem se mitufala i sud mekem sam moa samting blong lukaot long olgeta.

Ann-Catrin: Long 1983, taem mitufala i misinari long Sair, mi kasem sik ya kolera we klosap mi ded from. Dokta i talem long Mats se: “!Tede nomo yu mas tekem hem i aot long kantri!” Ale long nekis dei, mitufala i jam long wan plen blong karem kago, from we hemia nomo wan plen we i flae long dei ya, mo mitufala i go long Swiden.

Mats: Long taem ya, mitufala i krae from mitufala i ting se bambae mitufala i no moa save mekem wok blong misinari. Dokta i ting se Ann-Catrin i no moa save kam gud, be nogat, hem i harem gud bakegen. Mo wan yia biaen, mitufala i gobak long Sair, be mitufala i joenem wan smol kongregesen long Lubumbashi we i toktok lanwis Swahili.

Ann-Catrin: Taem mitufala i stap long Lubumbashi, mi gat bel, be bebi i ded bifo we hem i bon. Nating se mitufala i no plan blong gat pikinini, be taem hem i ded, mi harem nogud bigwan. Be long taem ya, Jehova i givim wan nambawan presen long mitufala. Mitufala i statem plante moa Baebol stadi i bitim bifo. Mo i no wan yia yet, namba blong ol pablisa long kongregesen we hem i 35, i kam antap long 70. Mo bifo, 40 man nomo i stap kam long miting, be naoia 220 man i stap kam. Mitufala i bisi gud long wok blong prij, mo Jehova i rili blesem wok blong mitufala, mo hemia i mekem mi harem gud. Be plante taem, mitufala i stap tingbaot mo tokbaot smol bebi blong mitufala. Mitufala i stap wet blong luk olsem wanem Jehova bambae i hilim hat blong mitufala fulwan long fiuja.

Mats: Sam taem biaen, Ann-Catrin i stat blong harem se hem i taed mo i slak bitim mak. Long sem taem ya, mi faenemaot se mi gat kansa long gat blong mi we i stap long stej fo, mo mi mas kasem wan bigfala operesen. Be tede, mi oraet, mo Ann-Catrin i stap mekem bes blong hem long wok blong Jehova.

Mitufala i luksave se i no mitufala nomo we i stap fesem ol traem. Afta long bigfala faet ya long Ruwanda long 1994, mitufala i go visitim ol brata mo sista long ol refuji kamp. Taem mitufala i luk olsem wanem oli gat strong bilif, oli stanap strong, mo oli gohed blong serem wanem we oli gat wetem ol narafala, hemia i tijim mitufala se Jehova i gat paoa blong lukaot gud long ol man blong hem, nomata wanem trabol oli fesem.—Sam 55:22.

Ann-Catrin: Wan narafala nogud samting we i hapen, hemia long 2007 taem mitufala i go from dedikesen blong branj long Uganda. Afta long program, mitufala i jam long wan bas wetem wan grup blong ol misinari mo ol Betelaet blong go long Nairobi, long Kenia. Be bifo we mifala i kasem boda blong Kenia, wan bigfala trak i ron i kam stret long mifala mo i sperem bas blong mifala. Draeva wetem tu kapol mo wan brata oli ded stret long taem ya, mo wan sista i ded afta we oli karem hem i go long hospital. !Mitufala i stap wet long taem ya we bambae mitufala i luk olgeta bakegen!—Job 14:​13-15.

Mi tu, mi kasem sam kil, be samtaem afta, mi harem gud bakegen. Be mi wetem Mats mo sam narafala brata mo sista long bas ya, mifala i kasem sik ya post-traumatic stress disorder. Long mi, sik ya i mekem mi moa long naet, mi wari, mi fraet, hat blong mi i pam, mo mi harem olsem se bambae mi kasem hatatak. Hemia i mekem mi fraet tumas. Be from we mitufala i prea plante taem long Jehova mo mitufala i ridim mo tingting dip long sam vas we mitufala i laekem, hemia i givhan bigwan. Mo tu, mitufala i go luk ol dokta we oli save gud long sik ya, mo hemia tu i givhan long mitufala. Naoia mitufala i naf blong kontrolem tingting blong mitufala, blong mitufala i no wari bitim mak, mo mitufala i prea blong Jehova i givhan long mitufala blong halpem ol narafala tu we oli gat sem sik ya.

Yutufala i bin talem se Jehova i karem yutufala “olsem ol eg we oli no tan.” ?Be hemia i minim wanem?

Mats: Hemia wan toktok long lanwis Swahili, we i se: “Tumebebwa kama mayai mabichi,” o “Oli karem mifala olsem ol eg we oli no tan.” Taswe hemia wan toktok blong talem se Jehova i lukaot gud long mitufala long evri ples we mitufala i go long hem, olsem wan man we i holem gud ol eg we oli no tan, from hem i fraet se bambae oli brok. Yes, oltaem mitufala i gat ol samting we mitufala i nidim, mo samtaem hem i givim moa i bitim wanem we mitufala i nidim. Wan rod we mitufala i harem save se Jehova i lavem mitufala mo i sapotem mitufala, hemia tru long Hed Kampani we oli kaen long mitufala.

Ann-Catrin: Mi wantem tokbaot wan eksampol we i soemaot olsem wanem Jehova i sapotem mitufala. Wan dei, mi kasem wan fon kol we i se papa blong mi long Swiden i stap long hospital from i sik tumas. Long taem ya, Mats i slak yet from hem i bin kasem malaria. Mitufala i no gat naf mane blong pem tikit blong plen blong go, taswe mitufala i mekem desisen blong salem trak blong mitufala. Be afta, mitufala i kasem tu moa fon kol. Wan hemia wan kapol we i harem nius blong papa blong mi, mo i wantem pem wan tikit blong wan long mitufala. Mo narawan, hemia wan olfala sista we hem i bin sevem sam mane long wan bokis we hem i raetem long hem se, “Blong wan man we i gat nid.” !Yes, long sam minit nomo, Jehova i givhan long mitufala!—Hib. 13:6.

?Yutufala i lanem wanem long ol 50 yia ya we yutufala i mekem wok blong Jehova fultaem?

Ann-Catrin: Mi lanem se yumi kasem paoa taem yumi ‘stap kwaet mo soemaot se yumi trastem God.’ Taem yumi trastem Jehova, bambae hem i faet long bihaf blong yumi. (Aes. 30:15; 2 Kron. 20:​15, 17) Taem mitufala i mekem bes blong mitufala long wok blong Jehova, hem i blesem mitufala bigwan. Yes, i no gat wan narafala samting we mitufala i save mekem blong kasem ol blesing ya.

Mats: Bigfala lesen we mi lanem, hemia blong dipen long Jehova long evri trabol we mi fesem, mo luk olsem wanem bambae hem i tekem aksen long bihaf blong mi. (Sam 37:5) Hem i givhan long mi oltaem olsem we hem i promes. Mo mitufala i luk se Jehova i stap givhan yet long mitufala naoia we mitufala i stap wok long Betel long Mianma.

Mitufala i hop se plante yangfala we oli wantem mekem moa long wok blong Jehova, bambae oli luk tu olsem wanem Jehova i soemaot se i lavem olgeta oltaem, sem mak olsem we hem i mekem long mitufala. Bambae oli luksave samting ya, sipos oli letem Jehova i halpem olgeta blong gru gud long ples we hem i planem olgeta long hem.