Yusum Gud ‘Presen Ya We i Kam Long God’

Yumi glad taem yumi spenem taem wetem ol Kristin brata mo sista blong yumi. Be sipos yumi wantem leftemap tingting blong olgeta, yumi mas mekem sam moa samting. Baebol i talem se fasin ya we yumi wanwan i naf blong mekem bilif blong narafala i kam strong, i olsem wan “presen we i kam long God.” (Rom 1:​11, 12) ?Olsem wanem yumi save yusum gud presen ya?

Talem ol toktok blong leftemap tingting. Eksampol, long ol ansa we yumi givim long miting, yumi no wantem tokbaot tumas ol tingting blong yumi wan, be yumi wantem tokbaot ol samting we yumi lanem long Jehova, Baebol, mo ol gudfala man blong hem. Mo long ol storian blong yumi, yumi wantem tokbaot ol samting we i mekem bilif blong narafala i strong.

Leftemap tingting blong narafala tru long ol aksen mo desisen blong yu. Eksampol, maet yu fesem ol trabol, be yu gohed blong mekem wok blong Jehova fultaem, o maet yu bisi long wok o yu kasem wan strong sik, be yu kam oltaem long ol miting blong medel wik. Taem ol narafala oli luk samting ya, hemia i save leftemap tingting blong olgeta.

?Ol toktok mo aksen blong yu i stap leftemap tingting blong ol brata mo sista? ?Mo yu yu luksave traehad we olgeta oli mekem blong leftemap tingting blong yu?