?Ol Witnes Blong Jehova Oli Prij Long Ol Haos Wanwan Blong God Bambae i Sevem Olgeta?

Nogat. Mifala i go prij oltaem long ol haos wanwan, be mifala i no ting se God i mas sevem mifala from wok ya, olsem we hem i givim pei long mifala. (Efesas 2:8) ?Mifala i talem olsem from wanem?

Yu traem tingbaot se wan gudfala man i promes blong givim wan sas presen long ol man, sipos oli go mitim hem long wan ples mo long wan stret taem. Sipos yu bilivim promes blong man ya,?bambae yu go? !Yes! Mo ating bambae yu talemaot tu long ol fren mo famle, blong olgeta tu oli save kasem presen ya. ?Be yu ting se man ya i givim presen from we yu folem tok blong hem nomo, olsem we hem i givim pei long yu? Nogat. Hemia wan presen nomo.

Long sem fasin, ol Witnes blong Jehova oli bilif long promes ya se ol man we oli obei long God, bambae oli kasem laef we i no save finis. (Rom 6:23) Mifala i traehad blong talemaot bilif blong mifala long olgeta man, blong bambae olgeta tu oli save kasem promes ya blong God. Be mifala i no bilif se bambae mifala i mas kasem laef ya from we mifala i stap prij nomo, olsem we God i givim pei from wok ya. (Rom 1:17; 3:28) I no gat man i save mekem wan bigfala wok we i naf blong hem i kasem laef from. “[God] i sevem yumi from we hem i sore long yumi, be i no from ol gudfala samting we yumi mekem.”—Taetas 3:5, Contemporary English Version.