Han Blong Nawita

Ol saentis oli mekem wan robot we i save givhan long ol dokta, blong oli wok long ol smosmol samting insaed long bodi tru long wan smol hol we oli katem. Blong wokem robot ya, oli kopi long han blong nawita.

Tingbaot: Nawita i save pusum ol eit han blong hem i go long wan smol ples nomo, blong holemtaet mo skwisim wan samting. Nawita i save tantanem ol han blong hem olbaot, mo tu, i save mekem ol defdefren haf blong han blong hem oli kam strong taem i nidim.

Ol man we oli stadi long bisnes ya oli bilif se wan robot we i gat han olsem nawita bambae i givhan bigwan long ol dokta, taem oli wok long ol smosmol samting insaed long bodi tru long wan smol hol we oli katem. Tul ya i save mekem se ol bigbigfala operesen we dokta i mas mekem, bambae oli isi moa.

Yu luk olsem wanem nawita i save tantanem ol han blong hem

Oli wokem finis wan robot we i gat han olsem nawita, mo oli stap traem nao, blong luk sipos bambae i wok gud taem oli katem ol man. Han blong robot ya we i longfala olsem 135 milimita, i save leftemap mo holemtaet ol sofsof haf insaed long bodi we i no spolem, mo long semtaem, narafala haf blong han i katem. Dokta Tommaso Ranzani i wan long olgeta we i wokem tul ya, hem i talem se: “Mifala i bilif se long fiuja bambae i gat plante moa tul olsem, we evriwan bambae oli kamgud moa mo oli mekem plante moa wok.”

?Wanem tingting blong yu? ?Han blong nawita i kamaot olsem nomo o i gat wan Man we i wokem?