Todd Aki/Moment Open via Getty Images
?I GAT WAN MAN WE I WOKEM OL SAMTING YA?
Filta Blong Manta Ray
Manta ray i wan animol blong solwota we i klosap sem mak long wan stingre, be hem i bigwan moa. Ol manta ray oli kakae plankton, hemia ol smosmol laef samting we oli stap long solwota. Taem wan manta ray i openem maot blong hem blong i kakae, wota mo plankton i go insaed, mo i go long wan filta. Filta ya i seraotem wota mo plankton, nao i mekem se plankton i go long trot blong manta ray, be wota i kamaot i go long solwota. Nating se sam long ol plankton ya oli smol moa mo oli save pastru long filta ya, be oli no kamaot i go long solwota. Ed Yong we i stap raetem ol buk blong sayens, i talem se filta blong manta ray “i wan samting we yumi sapraes tumas long hem.”
Tingbaot: Insaed long filta blong manta ray, i gat ol samting we oli olsem ol tut blong wan kom, we sam long ol tut ya oli ben i go long fored mo sam oli ben i gobak biaen. Taem wota i go insaed long maot blong manta ray, sam wota i pas bitwin long ol tut ya i gobak long solwota, be sam wota i pas antap long ol tut ya, mo hemia i mekem se i gat ol smosmol taed blong wota long filta blong manta ray.
Taem ol plankton oli go long filta blong manta ray mo oli kasem ol tut ya, ol smosmol taed ya oli pulum ol plankton i go stret long trot blong manta ray, nao hem i solemdaon. Hemia i sem mak tu long ol plankton we oli smol moa. Nating se oli naf blong pas bitwin long ol tut ya, be ol smosmol taed ya oli pulum olgeta i go stret long trot blong manta ray, blong oli no kamaot i go long solwota. Filta blong manta ray i mekem se hem i save kakae ol smosmol plankton ya tu.
Mo tu, nating sipos manta ray i swim kwik mo i gat plante plankton long solwota, be ol plankton ya oli no blokem filta blong manta ray from we filta ya i naf blong klinim hem wan.
Ol man we oli stadi long filta blong manta ray, oli wantem yusum ol save we oli faenem blong wokem ol filta we i naf blong klinim doti wota, mo tekemaot ol smosmol doti blong plastik we i stap long wota.
?Wanem tingting blong yu?: ?Filta blong manta ray i kamaot olsem nomo, o i gat wan Man we i wokem?