“Mi Mi Olsem Ae Blong Hem Mo Hem i Olsem Leg Blong Mi”
LONG Meksiko, tufala man ya José Luis Escobar mo Artemio Duran oli elda long wan Kristin kongregesen blong ol Wetnes blong Jeova. José Luis i blaen mo Artemio i no save wokbaot.
Taem José Luis i gat 16 yia blong hem, hem i laekem bokseng tumas. Wan dei, ol man oli askem long hem blong mekem bokseng. Wan dei, wan man blong bokseng i no save faet, taswe José Luis i tekem ples blong hem. Taem hem i faet agens long wan narafala man, tufala oli faet nogud, nao bodi blong tufala i karem bigfala kil. From samting ya, ol man oli stopem faet ya. Nating se José Luis i win, be hem i kam blaen from ol kil we hem i karem.
José Luis i go luk plante dokta mo ol kleva. Be oli no save givhan long hem. Hem i harem nogud tumas nao plante taem, hem i traem kilim hem bakegen. Samtaem biaen, ol Wetnes blong Jeova oli visitim hem. Hem i lanem ol trutok blong Baebol mo hem i givim laef blong hem i go long God. Long Ogis 1974, hem i tekem baptaes.
Long 1981, Artemio i gat akseden long trak mo hem i karem kil. Nating se hem i no gat raet blong stap long Yunaeted Stet, be long taem ya hem i stap wok long kantri ya. Long hospetal, ol lida blong defren skul oli kam visitim hem. Oli talem long hem se God i bin panisim hem from we hem i gat rabis fasin. Samtaem biaen, ol Wetnes blong Jeova oli visitim hem tu. Hem i stadi Baebol, hem i jenisim laef blong hem mo hem i tekem baptaes long Mei 1984.
Tede, tufala man ya oli stap long sem Kristin kongregesen mo tufala oli fren. Plante taem oli go prij tugeta long ol haos wanwan, oli go visitim ol man we oli intres long mesej blong Baebol. Oli go visitim tu ol memba blong kongregesen blong oli kam strong moa long saed blong speret. José Luis i pusum wil jea blong Artemio mo Artemio i lidim hem long ples we oli mas go long hem. Artemio i talem se tufala i olsem wan nomo. Hem i talem se: “Mi mi olsem ae blong hem mo hem i olsem leg blong mi.”