Ol Yia We Tingting Blong Ol Yangfala i Olbaot

RAONABAOT long ol yangfala, plante samting oli stap tokbaot seks. Blong salem sus no ol traoses olsem jins, ol bisnesman oli yusum seks. Tede, ol myusek oli fulap long seks. Long video, oli soemaot ol bigman we oli gat haenem oli mekem nogud wetem plante man no woman. ?Olsem wanem? ?Samting ya i stret?

Long Amerika, wan nyuspepa we fulap man oli ridim i talem se “ol fasin blong seks oli fulap” long televisin long taem we plante man i lukluk hem. “Ol man oli folem wan nogud fasin blong mekem ol program long televisin.” Wan nyuspepa (The Journal of the American Medical Association) i kolem samting ya “fasin blong spolem ol yangfala wetem ol pleplei mo pablisiti.”

Yu mas sua se pikinini blong yu i save se i no evriwan we oli laef olsemia. Nating se stret haf blong ol gel blong Amerika we oli gat 17 yia oli mekem nogud finis wetem man, be narafala haf i no mekem olsem. Long Amerika wan man we i Sekretari blong Edukesen bifo, nem blong hem William J. Bennett, i talem se: “I no ‘evri man’ we i mekem samting ya. Mo yumi wantem sapotem mo givhan long ol yangfala ya, haf ya we i gat 17 yia we oli no mekem nogud fasin.”

Hem i tokbaot wan ripot we oli mekem long Atlanta, long Grady Memoriol Haospetal, Jorjia, Amerika. Ripot ya i talem se long 10 gel we oli no kasem 16 yia blong olgeta yet, i gat 9 we “oli wantem lanem olsem wanem blong talem ‘no.’ ” ?Olsem wanem sipos man i askem long pikinini blong yu blong mekem nogud wetem hem? ?Hem i no strong naf, i no sua gud long wanem hem i mas talem? ?Yu yu save givhan long hem blong tingting blong hem i strong blong talem no, mo bilif strong se ansa ya nomo i stret? ?Yu yu save halpem hem blong luksave se ol gudfala man bambae oli respektem hem from samting ya? Wan yangfala, nem blong hem Emili, i talem long wan nyuspepa blong Kalifonia, Amerika, se: “Ol man oli respektem moa olgeta we oli no mekem nogud long saed blong seks.”

Yu mas givhan long ol yangfala blong yu blong oli luksave se seks i wan bigfala paoa blong pulum man—paoa blong hem i bigwan tumas nao hem i wokem olgeta man long wol. Be samting ya i no min se man i no save kontrolem paoa ya. I olsem wan trak we i save spid. Man i mas draevem hem long gud fasin, hem i mas folem ol rul blong rod. Sipos hem i no folem ol rul ya taem hem i stap draev long wan hil we rod i gat fulap kona blong hem, trabol i save kamaot. Olsem nao, sipos man i no folem ol rul we God i givim long saed blong seks, trabol i save kamaot. ?Olsem wanem nao yu save halpem ol pikinini blong yu we yu yu laekem tumas, blong oli luksave samting ya?

Tijim Olgeta Se Ol Gudfala Fasin Oli Nambawan

Yu save tokbaot wetem yangfala blong yu nambawan eksampel long Baebol blong wan naesfala yangfala woman blong Sulam. Wetem flas fasin hem i save talem se: “Mi mi wan stonwol, mo ol titi blong mi oli olsem haos we i hae.” Fasin blong hem i olsem wan stonwol blong wan strong haos we man i no save klaem long hem, wetem ol haos we i hae we man i no save kasem. Mo long ae blong man we bambae i kam hasban blong hem, hem i olsem wan “we i faenem pis.” Yes, hem i no mekem nogud. From samting ya hem i gat pis long tingting blong hem. Hemia i wan rij blesing from we hem i holem gudfala fasin.—Sing blong Solomon 8:10.

?Be olsem wanem wan yangfala i save stap strong olsem wan stonwol? Bifo we samting ya i kamaot, yangfala blong yu i mas save se hem i mas blokem ol samting we i save lidim hem blong mekem nogud. Yu yu mas sua se hem i save ol samting ya from we plante taem ol samting olsem oli pulum man. Eksampel, oli save se man we i drong be i stap draevem trak, bambae i kasem trabol. Long sem fasin, taem wan yangfala i joen long wan pati blong ol yangfala we oli dring alkol, no i no gat wan bigman i stap wetem olgeta, ale trabol i save hapen.

Sem mak, halpem boe blong yu (no gel blong yu) blong luksave se sipos hem i stap hem wan long wan haos (no long wan rum) wetem wan yangfala gel (no boe), ale samting ya i save pulum hem blong mekem nogud. Ol yangfala oli mas save klia se i nogud blong letem man no woman we hem i no mared wetem, i putum han blong hem long ol tabu ples blong hem, mo long ol titi tu. Eksplenem long hem se plante taem, sipos man i wantem pulum narafala man blong mekem nogud wetem hem, hem i stat tajem bodi blong man ya long ol tabu ples ya.—Skelem wetem 1 Korin 7:1.

Yu mas givhan long ol pikinini blong yu we yu laekem tumas blong luksave se tru lav i no minim fasin long saed blong seks nomo. Hem i minim moa. Mo tu, hem i mas luksave se i rong blong slip wetem man no woman sipos tufala i no mared. Sam yangfala oli slip tugeta bifo we oli mared. Ating sam oli mekem nogud long saed blong seks wetem plante man no woman, taem oli no mared yet. Biaen, taem ol yia oli pas mo oli luksave se oli rili nidim wan man blong mared wetem, oli harem nogud from we oli stap olgeta nomo, mo i no gat man i wantem stap wetem olgeta. Tru ya, i no gat wan we i askem blong mared long olgeta, mo i no gat wan we i wantem mared long olgeta tu.

Ol boe mo ol dota blong yu oli mas save se taem oli no slip wetem man bifo we oli mared, hemia i wan nambawan samting. Hemia i no wan samting nating, hem i wan bigfala samting. Halpem pikinini blong yu blong luksave se hem i rili save harem gud long saed blong seks long mared nomo. Wetem naesfala toktok, Baebol i talem se: “Yu mas dring wora we i kamaot long wel blong yu nomo, mo smol wora we i ron i kamaot long medel blong wel blong yu nomo. ?Weswe yu save sakem springwora olbaot afsaed, mo ol smol reva blong yu olbaot long pablik ples? Letem maot blong wora blong yu i kasem blesing, mo stap glad wetem waef blong yu we i mared long yu taem yu yu yang yet.”—Proveb 5:15, 16, 18.

Olsem gudfala papa mama, yufala i mas traehad blong tijim ol samting ya long ol pikinini blong yufala. I tru se i hadwok blong mekem olsem tede from we plante gel oli gat bel taem oli no mared, be ol man oli no moa agensem olgeta. Wan nes, nem blong hem Lilian, i givhan blong bonem ol pikinini. Hem i talem se plante taem hem i luk fraet i stap long ae blong wan boe we i gat 15 yia. Hem i papa blong wan bebi we i jes bon we bubu i stap holem, ale i putum long han blong boe ya. Nes ya i no moa sapraes blong luk samting ya. Boe ya i no rere, i no wantem, mo hem i no naf blong akseptem nyufala bebi ya.

Wan man long televisin i makem se plante “gel we oli stap olgeta nomo mo oli yang tumas, oli gat pikinini be oli no gat hasban.” Plante taem oli no save finisim skul, oli no save wok, no oli no save trenem gud ol pikinini blong olgeta. Hem i talem se ol yangfala mama ya, i olsem we oli “stap kalabus long prapa trabol blong olgeta. . . . Plante taem oli no gat mane, nao samting ya i mekem trabol blong olgeta i bigwan moa we i no save finis.”

Prapa Eksampel Blong Yu

Prapa fasin blong laef blong yu i gat bigfala paoa long ol pikinini blong yu. Ating yu no tingbaot samting ya, be hemia i tru long plante samting. ?Wanem i hapen sipos wan papa i gat fasin blong lukluk ol woman? ?No olsem wanem taem wan mama i luk wan naes man i wokbaot nao i talem se, “Man, hemia wan naes man”? ?Ol papa mama olsem oli pulum ol yangfala blong olgeta blong oli save stap klin? ?Olsem wanem sipos yu yu tingbaot fastaem gudfala bodi no fes blong man no woman? Bambae yu no mas sapraes we pikinini blong yu i putum samting ya long fas ples long tingting blong hem. Bambae hem i no putum fasin kaen, tru lav, no fasin we man i givim laef blong hem i go long God oli stap long fas ples.

Ating yu no tingbaot bifo se tijim ol yangfala blong yu long ol samting we oli nidim blong save long saed blong seks i wan bigfala samting. Taem yu tijim olgeta, fasin blong yu, tingting we yu wokem long haos blong yu, sipos yu yu rere blong tijim ol pikinini blong yu taem oli yang nomo, mo eksampel blong yu tu, oli impoten. I tru, ol samting ya oli nidim taem mo yu mas traehad. !Be bambae yu kasem bigfala blesing from!

?YU YU NO TIJIM OLGETA YET?

?Be olsem wanem sipos pikinini blong yu kolosap i bigman finis, be yu yu no tijim hem yet long ol samting ya? Yu save talem olsem se: “Mi rili mekem wan mastik from we mi mi wet blong tokbaot ol samting ya long yu. Be mi mi wantem we yu yu gat wan gudfala laef, taswe mi mas toktok wetem yu naoia.”

Yes, i moa gud we yu tokbaot ol samting ya wetem pikinini blong yu nating se hem i olfala, i bitim we yu no tokbaot samting ya nating. I impoten tumas blong tijim ol gudfala fasin long ol pikinini blong yu. Hem i wan responsabiliti mo wan blesing tu. Wan man blong Yunivesiti blong Nyu Yok, Ron Moglia, i talem se: “Wan papa no wan mama we i no wantem toktok wetem pikinini blong hem long saed blong seks, hem i mestem wan nambawan ekspiryens long laef.”

Sipos yu yu jes stat blong laekem ol loa blong God mo ol pikinini blong yu oli save se yu no folem olgeta ya bifo, yu mas sua se oli save from wanem tingting blong yu i jenis. Ating yu save talem long olgeta se oli save ridim magasin ya mo biaen yu save tokbaot ol samting ya wetem olgeta. Yu no mas letem wan yangfala i daonem tingting blong yu taem hem i talem se: “!O, mi mi save ol samting ya finis!” Ol gyaman store long saed blong seks we ol yangfala oli lanem long ol pikinini long skul, no long ol narafala ples, oli no save tekem ples blong trening long ol gudfala fasin. Tru ya, sipos ol yangfala oli no save ol gudfala fasin ya, bambae oli save kasem bigfala trabol.

!I tru se i hadwok blong trenem ol pikinini blong yu, be bambae yu save kasem gudfala blesing from! Olsem Baebol i talem long wan klia mo isi fasin, se: “Wan stret man i stap wokbaot long stret fasin. Ol pikinini boe blong hem bambae oli hapi.”—Proveb 20:7.

[Tok Blong Pija Long Pej 9]

?Televisin i tijim wanem long saed blong seks?

[Tok Blong Pija Long Pej 10]

Man we i no folem ol rul blong draevem trak, plante taem i kasem bigfala trabol. I sem mak long olgeta we oli no wantem folem ol rul blong God