Ples We Man Mo Totel Oli Mit
Man blong !Wekap! long Ostrelya i raetem store ya
GUDFALA taem blong mit wetem wan totel blong solwora hemia taem we hem i stap putum ol eg long nyufala hol blong hem we hem i mekem long sanbij. ?Ale yu yu wantem kam wetem mi taem mifala i go visitim Mon Repos—wan sanbij we longfala blong hem i kasem 1.5 kilomita, long Queensland wan ples long Ostrelya we i gat gudfala san oltaem? Yu no wari se yu save kasem trabol from bambae hot san i bonem yu, from bambae yumi mekem visit ya long naet. Nambawan taem blong gudfala trep ya i stap bitwin 8 klok long sapa mo long 12 klok naet.
I moa gud blong go wetem wan man we i langud mo wan smol grup we i no bitim ten man, from we i gat sam samting we yumi save mekem mo i gat sam samting we yumi no mas mekem sipos yumi wantem luk mo tajem wan bigfala mama totel. Taem yumi wokbaot long sanbij long mak blong solwora we i kam soa, man we i lidim yumi i askem yumi blong no mekem ol toslaet blong yumi i laet from laet i mekem ol totel oli fraet. Mo mifala i sapraes blong lukluk gud rod blong wan totel long sanbij we bigwan blong hem i kasem wan mita nating se mifala i no putum ol laet.
Narafala samting, man we i lidim mifala i talem sam gudfala store long mifala long saed blong ol totel blong solwora long ples ya. I gat sikis defren kaen totel long solwora blong Ostrelya, be yumi faenem fo kaen nomo long ples ya, Mon Repos, we i nambawan ples blong karem eg folem poen blong Bundaberg. Blong save long olgeta, hemia nem blong ol fo kaen totel ya: ol logahed totel (Caretta caretta), ol flatbak totel (Natator depressa), ol grin totel (Chelonia mydas), mo ol letabak totel (Dermochelys coriacea).
Fastaem We Mifala i Stap Lukluk
Mifala i sapraes tumas taem mifala i kam kolosap long wan bigfala totel. Hem i wan long ol totel we i stap fastaem long lis blong mifala—wan logahed totel. Mifala i stanap kwaet mo mifala i luk taem hem i gohed blong wokbaot wetem fo han blong hem stat long mak blong solwora we i kam soa long sanbij. Biaen taem mifala i kam kolosap moa, mifala i luk se hem i bin digim wan raon hol we hem i karemaot ol sanbij mo ol smosmol tri we oli stap raonabaot long hem. Samting ya i blokem gras blong i no gru antap long hol ya blong blokem ol smosmol pikinini totel taem oli kamaot long 7 kasem 12 wik. Mo tu hem i finisim blong berem hol blong hem fulwan wetem wan narafala fasin blong digim mo sakem sanbij wetem ol han blong hem biaen—digim wetem raetsaed han mo sakem i go long lefsaed, digim wetem lefsaed han mo sakem i go long raetsaed. Olgeta samting ya i tekem kolosap 45 menet.
Kasem naoia, i isi blong hem i fraet mo i gobak long solwora, be taem hem i stat blong putum ol eg, mifala i save tajem hem nao. Woman we i lukaot long ples ya i mekem laet i go long hem, mo mifala i save tekem ol foto sipos mifala i wantem. Totel ya i stat blong putum ol eg long hol blong hem gogo 10 kasem 20 menet i pas, wetem wan klia wora, we i olsem glu lelebet we i blokem ol eg blong i no kam nogud mo blong bebet i no spolem taem i sidaon long hem. Long wan hol ol logahed totel oli putum kolosap 120 eg we i saes blong bol blong Ping-Pong—oli mekem bakegen afta 14 dei mo oli gohed long fasin ya gogo sisen i finis—mo i gat narafala sisen afta tu kasem fo yia i pas.
Taem we mifala i tajem totel ya, mifala i sapraes blong harem olsem wanem skin blong hem i sofsof—samting we i mekem ol man oli laekem tumas ol skin blong totel mo i mekem i denja tumas long ol totel blong stap laef. Ol smosmol pis i mekemap sel, no karapas blong hem, mo i kolosap sem mak long bun blong baksaed mo ol reb blong hem. Naoia hem i stat blong kavremap ol eg blong hem. Be from we hem i bin putum ol eg blong hem kolosap long mak we solwora i kam soa long hem, blong oli laef, mifala i mas tekemaot olgeta long ples ya. Tufala man blong mekem stadi long ol totel we oli joenem grup blong mifala nao bambae oli mekem samting ya.
Makem Ol Totel
Bambae mifala i putum mak long totel blong mifala long wan long tufala han blong hem long fored blong givhan long stadi long saed blong ol totel blong solwora. Hemia i no wan isi wok taem yu luk ol sanbij we hem i stap traehad blong sakem olbaot. Mifala i mekem ol mak ya wetem ol strong aean we oli no save rosta. I gat adres i stap long baksaed, mo hem i impoten long ol kampani blong stadi se taem ol man oli luk ol totel oli mas talemaot namba blong olgeta we i stap long aean we i makem olgeta. Nomo taem totel ya i ded oli save tekemaot namba blong hem mo sanem i kambak, wetem store blong ples we totel ya i stap long hem. Long fored blong mak ya i gat namba i stap blong soemaot se hem i wanem kaen totel. T54239 i namba blong totel blong mifala, be mifala i gat tingting blong kolem nem blong hem se Tabitha.
From we bifo mifala i no bin putum mak long Tabitha, i olsem se bifo hem i neva putum eg blong hem mo from samting ya hem i save givim sam impoten save blong givhan blong lukaot gud long ol totel mo ol eg blong olgeta long Saot Pasifik. !Naoia, blong kasem save ya, stret long ples ya long sanbij mifala i lukluk smol wok long saed blong katem totel! Plan ya, nem blong hem laparoskopi mo plante taem oli mekem samting ya long ol man tu. Sloslou oli tanem Tabitha i slip long baksaed blong hem mo mifala i putum hem i go antap long kat blong wan wilbara. Mifala i sore long hem mo mifala i kasem save se hem i harem gud taem mifala i stap rabem han blong mifala sloslou i goraon long nek blong hem. Samting we mifala i luk i no ol wora blong ae blong hem, be hem i solwora we i kamaot long bodi blong hem we hem i yusum blong wasemaot sanbij long ae blong hem mo i mekem se hem i lego ol sol long bodi blong hem we hem i kasem taem hem i dring tumas solwora. Hem i no harem nogud from ol samting ya. Mifala i brasem skin blong hem long baksaed kolosap long han blong hem biaen; ale mifala i putum wan paep long smol ples we mifala i katem, mo mifala i mekem smol win i go insaed. Taem ol man blong stadi oli stap lukluk insaed long bodi blong hem long ples we eg i stap kamaot long hem, oli faenemaot se hemia fastaem blong hem blong karem eg, mo hem i gat plante narafala eg we oli stap rere finis. Mifala i raetemdaon olgeta save ya; ale mifala i yusum paep ya blong tekemaot win bakegen, mo oli somap ples we mifala i katem.
Afta we mifala i tanem Tabitha i stap gud bakegen long sanbij, wantaem nomo hem i tanem i go long solwora. Solwora i brok antap long hem mo i karem Tabitha we i haremgud finis i goaot long solwora.
Tekemaot Bakegen Ol Eg i Go Narafala Ples
Taem mifala i lukluk kambak, mifala i luk se oli bin tekemaot ol eg ya finis long hol blong olgeta. Afta long fo haoa ol eg oli joen long sel insaed mo olgeta oli kam olsem smosmol string we oli karem blad. Sipos mifala i tanem olgeta stret long taem ya, bambae oli nogud. Long ples we ol man oli lukaot long ol eg we oli gat pikinini insaed, plante taem i tekem tu haoa nomo long wok blong karemaot ol eg, mo namba blong ol eg we oli karemaot we oli gud i bigwan tumas. Plan blong mifala blong mekem olsem i blong lukaotgud long hol mo ol eg blong wora i no spolem mo blong sanbij i no kamaot raonabaot long olgeta. Hot blong sanbij nao i makem se ol smol totel ya oli man no oli woman. Plante aelan oli gat sanbij we i kolkol moa mo plante taem oli karem ol man totel nomo, be olsem sanbij blong Mon Repos we i hot lelebet i karem woman totel plante taem.
Ol smosmol totel oli kamaot stat long Janewari kasem Maj. Oli skrasem sanbij we i stap kavremap olgeta, mekem se sanbij i foldaon insaed long hol blong olgeta mo i leftemap olgeta oli kam antap moa. Sipos sanbij i no hot tumas, oli gohed long rod ya blong kamaot long hol blong olgeta mo oli wokbaot hareap blong kasem solwora. Be hemia i jes stat nomo long rod blong olgeta. Ol man oli ting se i tekem fefte yia blong oli save karem eg. Smol namba blong olgeta nomo oli kasem mak ya.
Man i Mas Lan Blong Keagud
Sore tumas, ol man oli stap mekem plante samting we oli no kea mo oli no tingtinggud nating we i stap kilim i ded ol sikis defren kaen totel ya blong solwora. Plante taem ol plastik we ol man oli sakem long solwora ol totel oli ting se hemia ol nanggalat blong solwora ale oli kakae. Samting ya i blokem gat blong olgeta mo i mekem se oli no moa kakae mo oli ded. Ol narafala doti tu oli save jokem ol totel. Mo tu ol propela blong sip oli stap olsem bigfala denja sipos ol kapten oli no keagud. Antap long samting ya, ol doti oel mo ol doti we i gat posen long olgeta oli save kilim olgeta totel long wan ples long taem we oli bon. Mo from we wan totel i mas go antap evri 15 menet blong tekem win, ol net blong kasem fis oli save blokem wan totel mo i save mekem hem i draon.
Taem ol man oli luksave ol samting we oli save mekem trabol mo oli save rod blong keagud long win, wora mo graon, i tru se bambae i gat bigfala jans blong ol man mo ol totel oli mit—mo samting ya i save mekem man i sapraes mo oli glad blong luk wan moa samting we God i wokem mo nambawan fasin blong ol samting ya blong karem pikinini.
[Tok blong pija long pej 29]
Top, stat long lefsaed: smol ples we oli katem, i stap gobak long solwora, oli karem ol eg oli go long narafala ples, oli putum mak long han blong hem