Wan Hapi Hom We Tufala i Olsem Wan Nomo
SIPOS yu wantem bildim wan haos we i strong, sefgud, mo man i haremgud taem i stap insaed, ?bambae yu yusum wanem samting blong bildim? ?Wud? ?Brikis? ?Ston? Hemia nao wanem we buk blong Proveb long Baebol i talem: “From fasin waes, wan famle i save kam strong moa, mo from fasin luksave hem i save stanap strong. Mo from save ol rum insaed bambae oli fulap long ol sas mo gudfala samting we oli gat bigfala praes long olgeta.” (Proveb 24:3, 4) Yes, i nidim waes, fasin luksave, mo save blong bildim wan hapi hom.
?Hu nao i stap bildim? “Woman we i waes i stap bildimap haos blong hem, be wan krangke woman hem i stap brebrekemdaon haos blong hem wetem prapa han blong hem.” (Proveb 14:1) Samting ya i tru long saed blong wan waes man we i luksave se i stap long hem nao blong mekem mared blong hem i strong mo glad, no slak mo nogud olgeta. ?Wanem samting i save mekem se mared i gud no i nogud? Yumi intres tumas blong save se ol man blong givim advaes long saed blong mared oli talem samting we i kolosap sem mak long waes blong God we oli raetem plante taosen yia bifo mo hem i gud olwe.
Fasin blong lesin: Wan buk we i tokbaot mared i talem se: “Taem yu rili lesingud long wan man, hemia i nambawan rod blong soemaot respek long hem, mo samting ya i impoten blong bildim mo holemtaet wan dip fasin fren.” Proveb i talem se: “Sora blong olgeta we oli waes i traem blong faenem save.” (Proveb 18:15) From we man i no save luk ol sora we oli open olsem ol ae no maot we oli open, ?olsem wanem yu save soem long hasban no waef blong yu se yu stap lesin tru? Wan rod i blong talem sam toktok blong soem se yu stap folem toktok blong hem, no joen long storeyan taem yu stap lesin.—Luk bokis long pej 11.
Fasin blong no haedem wan samting mo dip fasin fren: Buk ya One to One—Understanding Personal Relationships i talem se: “Kastom blong yumi i agensem fasin blong no haedem wan samting. Taem yumi smol nomo oli tijim yumi blong no intres tumas long bisnes blong ol narafala man—blong no talemaot bisnes blong yumi long saed blong mane, tingting, ol filing, . . . eni samting we i blong yumi nomo. I no isi blong lego fasin ya, nating se ‘yumi laekem tumas wan man no wan woman.’ Be sipos yumi no traehad oltaem blong wokem fasin blong no haedem wan samting, dip fasin fren i no save kamaot.” Proveb i talem se: “Plan blong man i save foldaon sipos hem i no tokbaot wetem man we hem i trastemgud, man we bambae i no talemaot olbaot.” “Be long medel blong ol man we oli toktok wanples i gat fasin waes.” —Proveb 13:10; 15:22.
Fasin blong stap tru mo fasin tras: Hasban mo waef tufala i promes long fes blong God blong stap tru long tufala. Taem tufala we i mared oli trastem se wanwan long tufala i stap tru long narawan, fasin blong no trastem narafala, fasin flas, fasin blong traem winim narafala, tingting blong kasem samting we hem i ting se hem i gat raet blong kasem, i no save spolem lav.
Fasin blong serem: Fasin fren i kam dip moa taem tufala i stap serem ol ekspiryens long laef. Afta we taem i pas, i olsem we tufala i wivim wan sas mat, hemia histri blong tufala, we tufala wanwan i holemtaet long hat blong tufala. Blong seraotem fasin fren ya i wan samting we oli ting se i krangke olgeta. “I gat sam man we oli fasgud long ol fren blong olgeta moa, i bitim wan stret brata.”—Proveb 18:24.
Fasin kaen mo fasin kea: Ol samting we yumi mekem wetem fasin kaen oli mekem ol smosmol rao long laef i godaon mo oli mekem fasin flas i lus. Ol samting we yumi mekem from fasin kaen, sipos yumi mekem oltaem, oli no save lus, nating se ol filing oli kam antap taem tufala i no agri, ale oli mekem trabol we i save kamaot i smol nomo. Fasin blong kea i mekem wan gudfala filing i kamaot we lav i save gru long hem. Nating se i had moa long wan man blong soem se hem i rili kea, Baebol i talem se: “Man blong graon, sipos hem i kaengud, bambae ol man oli laekem tumas fasin ya blong hem.” (Proveb 19:22) Long saed blong wan gudfala waef, “loa blong lav we i kaengud i stap long tang blong hem.”—Proveb 31:26.
Tingting daon: Wan meresin blong blokem posen ya blong fasin flas, hem i tingting daon we i mekem se hasban no waef i rere blong talem sore kwiktaem from wan mastik mo oltaem talem ol tok blong talem tangkyu. ?Olsem wanem sipos i no fol blong yu, be narafala i blemem yu from wan samting? ?From wanem yu no jes talem wetem kwaet fasin se, “Mi sore we yu harem nogud”? Soemaot fasin blong tingbaot filing blong hasban no waef blong yu, ale yutufala i save luksave olsem wanem blong stretem rong ya. “Taem wan man i lego fasin blong rao, samting ya i leftemap nem blong hem.”—Proveb 20:3.
Soem Respek: “Bigfala samting we i mekem se tufala i save luksave ol defren fasin blong tufala wanwan mo stretem, hem i fasin blong soem respek. Wan samting we i impoten long wan long tufala, maet i no impoten sem mak long narafala. Nating se i olsem, ol man mo woman we oli mared oli save respektem tingting blong hasban no waef blong olgeta oltaem.” (Keeping Your Family Together When the World Is Falling Apart) “Man we i folem tingting blong hem nomo, hem i mekem faet i kamaot. Be long medel blong olgeta we oli toktokgud wanples, i gat fasin waes.”—Proveb 13:10.
Laf tugeta: Ol trabol we oli olsem ol blak klaod, oli save lus taem tufala i laf tugeta. Hem i mekem fasin lav i kam strong mo i tekemaot wari we i mekem se tufala i no save tingting klia. “Wan hat we i glad i mekem fes blong man i glad.”—Proveb 15:13.
Fasin blong Givim: Traehad blong lukaot ol fasin we yu laekem long hasban no waef blong yu mo talem plante gudfala toktok long hem. Ol tok ya we hem i wantem harem tumas, hem i save mekem hem i glad moa bitim wan presen olsem hanwaj no aelan dres. I tru, yu save gohed yet blong pem no mekem sam naesfala samting long hasban no waef blong yu. Be buk ya Lifeskills for Adult Children i talem se: “Nambawan presen we yu save givim, i no ol samting long saed blong bodi. Nambawan presen hemia ol tok blong soemaot lav mo fasin tangkyu blong yu, fasin blong yu blong leftemap tingting, mo help blong yu.” “Tok we wan man i talem long prapa taem blong hem, i olsem sam gol apol long wan plet selva.”—Proveb 25:11.
Sipos yumi talem se ol gudfala fasin ya oli olsem ol brikis blong bildim fasin fren insaed long mared, ale fasin blong toktok tugeta i olsem simen we yumi nidim blong joenem ol brikis wanples. Ale, ?wanem nao ol mared man mo woman oli save mekem taem oli no agri tugeta long wan samting? Buk ya Getting the Love You Want i talem se: “I nogud blong tingbaot ol defren tingting blong hasban no waef blong yu olsem wan stampa blong rao, . . . tingbaot olgeta olsem stampa blong save. . . . Olgeta smosmol samting we oli hapen long evridei laef oli save kam stampa blong plante impoten save.”
Ale tingbaot olgeta taem blong no agri, i no olsem wan samting we i pulum faet i kam, be olsem wan jans we i sas blong savegud tingting blong hemia we yu laekem. Tugeta yutufala i mas akseptem traem ya blong winim samting we yutufala i no agri long hem mo joengud bakegen olsem wan sip we i ron i go long haba we i kwaet, olsem ya nao, yutufala i save mekem fasin fren i kam strong moa, mekem lav ya we i mekem yutufala i kam wan, i dip moa.
Jeova God i ting se i naes tumas taem i gat fasin blong wokgud tugeta, taswe hem i putum fasin ya long ol samting we hem i wokem olgeta—fasin blong ol tri mo anamol blong givim mo tekem gas ya oksijen, fasin blong ol planet long skae blong goraon folem prapa rod blong olgeta, fasin joen blong ol smol bebet mo ol flaoa. Ale, long sem fasin, insaed long mared, i save gat fasin blong tufala blong wok tugeta, we hasban, long ol tok mo ol wok blong hem, i soem oltaem long waef blong hem se hem i laekem hem tumas, ale waef we i gat fasin tras mo lav, i glad nomo blong folem hasban blong hem we i stap lidim hem. Olsem nao, tufala i rili kam wan nomo, tufala i karem glad long wanwan long tufala mo long hemia we i stampa blong mared, Jeova God.
[Bokis blong pija long pej 11]
‘Lukaotgud Olsem Wanem Yu Stap Lesin.’—Luk 8:18
Fasin blong joen long storeyan taem yu stap lesin, i wan rod we i mekem se man we i stap toktok mo man we i lesin, tufala i stap kasem save long tufala. Samtaem oli kolem fasin ya se fasin blong lukluk long wan glas, from man we i stap lesin i stap traem blong talem bakegen ol tok we hem i harem mo mining we hem i kasem. Hemia sam stampa rod we yu save folem:
1. Lesingud; traem kasem ol impoten mesej.
2. Traem kasem ol filing we oli stap biaen long ol tok.
3. Talem bakegen long hemia we i stap tok, wanem we yu stap harem. Yu no jajem, daonem, no rao. Jes letem man i save nomo se yu kasem stret mesej we hem i wantem talem long yu. Soem se yu kasem save long filing blong hem.
4. Ating man we i stap tok bambae i agri no i stretem wanem yu talem mo maet hem i save tokbaot moa long poen ya.
5. Sipos yu no kasem stret mesej, traem bakegen.
Antap moa, fasin blong joen long storeyan taem yu stap lesin, i givhan blong daonem fasin blong harem nogud taem narafala i no agri wetem yu. Luksave trutok ya se plante taem fasin blong no agri wetem narafala i stanap long sam samting we oli tru. Maet oli talem long wan fasin we i mekem yu yu harem nogud, be i nogud blong givimbak blong daonem narafala blong protektem yu wan. I moa gud blong yusum fasin blong joen long storeyan taem yu stap lesin, blong mekem se i no kam wan rao. Talem se yu kasem save long filing blong narafala we i harem nogud from samting we hem i stap blemem yu from, mo traem luk olsem wanem blong stretem bisnes ya.
[Bokis blong pija long pej 12]
“Taem Wan Long Yufala i Gat Poen Agens Long Narawan Long Yufala.”—Kolosi 3:13
Taem yu gat wan poen agens long narawan, ?olsem wanem yu save yusum wan gud fasin blong talemaot, we yu no statem faet? Fastaem, putum long tingting blong yu se hasban no waef blong yu i no minim blong mekem yu yu harem nogud. Maet yu harem se hem i no tingbaot filing blong yu, i no tingtinggud, i raf, i no waes—be taem yu luk long bisnes ya fulwan, ating hem i no minim blong mekem i nogud long yu. Wetem kwaet fasin we yu no blemem hem, talemaot filing blong yu se: “Taem yu bin mekem samting ya, mi harem se . . . ” Long ol tok ya i no gat samting we i save mekem rao i kamaot. Yu jes talem nomo wanem filing blong yu, mo yu no blemem hasban no waef blong yu. From we ating narawan ya i no gat tingting blong mekem yu yu harem nogud, maet hem i talem se tok blong yu i no tru no i traem blong mekem eskyus from samting we hem i bin mekem. Be yu mas toktok long saed blong problem nomo, mo rere blong talem sam tingting blong traem winim.
[Tok pija long pej 10]
Taem yu rili lesingud long wan man, hemia i nambawan rod blong soemaot respek long hem.