Taem Laef i No Isi

MI MI yangfala nomo, taem sik i mekem se mi mas fesem ol hadtaem long laef. Maet yu agri wetem mi se laef long wol naoia i no stret nating. I no stret long yumi evriwan. Yumi evriwan, yumi kasem sik. I tru, maet smol namba blong man nomo, oli kam olfala we oli no kasem bigfala sik, be biaen, yumi evriwan, yumi kasem ded.

Ating mi stap tingting moa long saed blong ded bitim we mi mas tingbaot. Be i gud mi eksplenem from wanem i olsem, mo tu, olsem wanem mi kasem blesing from hadtaem we mi kasem.

Taem Mi Gat Naen Yia

Mi mi bon long Septemba 1968, long Bruklin, Nyu Yok. Mi mi lasbon long faef pikinini. Papa i handikap, mo Mama i stap wok long wan stoa, blong kasem naf mane blong pem ol samting we mifala i nidim. Taem mi gat samwe long naen yia, Mama i faenem se wansaed bel blong mi i solap. Hem i tekem mi i go long wan hospital long ples ya. Dokta i filim se bel blong mi i solap bigwan, mo sam dei biaen, mi go slip long Kings Kaonti Hospital.

Afta we Mama i livim hospital, mi krae from we mi fraet. Long nekis dei, tu man we tufala i werem blu klos, tufala i pusum mi long bed we i gat wil, i go long rum blong katem man. Mi rimemba se laswan samting we mi luk bifo we mi wekap long rum blong wekap bakegen, hemia wan bigfala laet we i saen antap, mo wan samting we oli kavremap maot blong mi long hem. Ol dokta oli tekemaot samting ya we oli kolem soaa blong Wilms (wan kaen kansa). Mo tu, oli tekemaot wan kidni mo haf leva blong mi.

Mi spenem faef wik long wan rum we ol dokta mo nes oli givim spesel kea long mi. Evri dei, oli jenisim plasta long soa blong mi. Mi krae bigwan taem oli tekemaot plasta. Blong mekem se mi no harem i soa tumas, ol dokta oli askem wan man blong kam insaed, mo hem i traem blong pulum tingting blong mi long narafala samting. Mi rimemba se man ya i storeyan plante long saed blong ol frog.

Afta we mi kamaot long spesel rum ya, mi spenem fo wik bakegen long hospital. Long taem ya nao, oli stat blong yusum ol mesin we oli givim strongfala laet blong fiksimap sik (rediesen). Samting ya i mekem mi harem i soa tumas. I no from strongfala laet ya—be from we mi mas ledaon long bel blong mi, long saed we oli bin katem, we i stap soa yet. Evri dei, stat long Mande kasem Fraede, mi mas pas long strongfala laet ya.

Taem mi kamaot long hospital long en blong Novemba 1977, mi mi gohed blong pas long strongfala laet ya, nating se mi no moa slip long hospital. Taem mi finis long strongfala laet ya, mi stat blong kasem ol strongfala meresin we i gat kemikol long hem (kemoterapi). Evri dei, stat long Mande kasem Fraede, mi mas girap eli long moning mo go long hospital blong oli pinim mi wetem ol strong drag ya. Dokta i stikim pin i go long string blong blad blong mi, mo i putum meresin ya i go stret long blad. Mi fraet long ol pin mo mi krae, be Mama i talem long mi se mi mas kasem ol samting ya blong kamgud bakegen.

Ol strongfala meresin we oli pinim mi long hem, oli mekem mi mi harem nogud tumas long bodi blong mi. Oli mekem se bel blong mi i tantanem, mo plante taem mi traot. Namba blong ol sel long blad blong mi i godaon, mo ol hea blong mi oli folfoldaon evriwan.

Sik i Blokem Mi

Long taem ya we ol tri oli stat blong putum flaoa, long Ista Sande, taem mifala i stap rere blong go long jyos, blad i stat blong ron long nus blong mi, from we namba blong ol sel long blad blong mi i godaon tumas. Papa mama blong mi, tufala i mekem evri samting blong traem stopem blad, be tufala i no winim. Ol dokta oli putum plante koten long nos blong mi, nao blad i stop. Be biaen, blad i stat blong kamaot long maot blong mi. Mi no moa gat paoa from we mi lusum fulap blad, ale mi go slip long hospital. Blong mekem se mi no kasem sam narafala jem bakegen, olgeta we oli kam blong visitim mi, oli mas werem hanglaf, blokem fes blong olgeta, mo werem wan kaliko antap long klos we oli werem finis. Long wan wik, ol sel long blad blong mi oli kam plante bakegen, mekem se mi naf blong kamaot long hospital.

Kwiktaem, oli stat bakegen blong stikim mi long strong meresin ya we i gat kemikol long hem. Mi no save go long skul, mo mi rili sore from samting ya. Mi sore long ol fren blong mi mo mi sore we mi no moa save pleplei afsaed wetem olgeta. Wan woman i tijim mi long haos, from we ol dokta blong mi oli ting se mi no mas go long skul taem mi stap kasem ol strongfala meresin, no taem mi jes finis blong kasem.

Long hot taem ya, mi wantem visitim tufala bubu blong mi long Jojia, olsem we mi stap mekem oltaem. Be ol dokta oli no letem mi blong go. Nating se i olsem, hospital i mekem rod blong olgeta we oli gat kansa blong go long wan naesfala garen long Nyu Jese, wan ples we ol man oli stap go pleplei long hem. Mi gat wan gudfala taem, nating se biaen, mi mi taed tumas.

Long en blong 1978, mi finis blong kasem ol strongfala meresin we i gat kemikol long hem, be tijing blong mi long haos i gohed bitim tri yia. Taem mi gobak long skul long Janewari 1981, i no isi, from we mi bin kasem tijing long haos blong longtaem. Samtaem, mi lusum rod taem mi traem blong faenem klasrum blong mi. Be, mi rili laekem skul. Mi rili laekem myusek, taeping, mo klas ya we i stap mekem spesel eksasaes long masel. Sam long ol pikinini oli gat fasin frengud, be samfala oli jikim mi.

Wan Traem

Sam pikinini oli askem long mi se, “?Yu gat bel?” Oli talem olsem from we bel blong mi i solap. Dokta i talem long mi se mi no mas wari, bel blong mi i solap from we leva blong mi i stap kambak long stret saes blong hem. Be taem mi pas long dokta blong i jekemap mi long Maj, hem i putum mi long hospital. Mi stat blong krae—mi bin go long skul blong tu manis haf nomo.

Dokta i katem mi mo i tekemaot wan smol pis blong soa long leva blong mi. Taem mi wekap afta we hem i finisim wok ya, faswan man we mi luk, hemia Mama. Hem i stap krae. Hem i talem long mi se mi gat kansa bakegen, mo se hemia i bigwan tumas, oli no save tekemaot. Mo se oli mas pinim mi wetem meresin we i gat kemikol long hem, blong mekem soa ya i kam smol bakegen. Long taem ya, mi gat 12 yia nomo.

Hospital i lukaot long wok blong pinim mi wetem meresin ya, we i minim se afta we sam wik i pas, mi mas go long hospital tu no tri dei, mo mi mas mekem samting ya plante taem bakegen. Olsem oltaem, bel blong mi i tantanem mo mi traot. Mi no save testem ol gudfala tes blong kakae mo hea blong mi i folfoldaon evriwan. Oli gohed blong pinim mi wetem meresin we i gat kemikol long hem blong ful yia, 1981. Long sem taem, long Epril, mi stat bakegen blong skul long haos.

Long stat blong 1982, taem mi go long hospital blong oli katem mi, mi no gat paoa nating, mekem se ol nes oli mas halpem mi blong go antap long skel mo blong godaon bakegen. Meresin ya we i gat kemikol long hem i mekem se soa ya i kam smol. Ale ol dokta oli save tekemaot wetem wan narafala haf blong leva blong mi. Bakegen, mi go slip long hospital blong samwe long tu manis. Kolosap long medel blong 1982, oli stat bakegen blong pinim mi wetem meresin ya we i gat kemikol long hem, mo oli gohed go kasem stat blong 1983.

Long taem ya, mi harem nogud long filing blong mi from we mi no save go long skul. Be hea blong mi i gru bakegen, mo mi stat blong haremgud bakegen long bodi blong mi. Mi glad blong stap laef.

Mi Gobak Long Skul

Woman we i stap tijim mi long haos i mekem rod blong mi save kasem stefeket blong pas i go long hae skul, wetem klas ya we mi bin skul smoltaem wetem olgeta long 1981. Samting ya i mekem se mi haremgud tumas. I gud tumas blong luk ol fren blong mi mo blong faenem sam nyufala fren. Long Jun, 1984, dei ya we mifala i kasem stefeket, mi tekem foto blong ol fren mo ol tija, mo famle blong mi i tekem foto blong mi blong makem spesel taem ya.

Long hot taem ya, mi go visitim tufala bubu blong mi long Jojia, mo mi spenem bighaf blong hot taem ya wetem tufala. Taem mi kambak, long en blong Ogis, i taem nao blong rere blong gobak long skul. Yes, afta long wan longfala taem, naoia mi rere blong gobak long skul. !Mi haremgud tumas!

Intres Long Saed Blong Jyos

Dawn mo Craig, tufala i defren long ol narafala studen, mo samting ya i mekem se mi frengud wetem tufala. Be taem mi givim Krismas presen long tufala, tufala i talem se tufala i no bilif long holide ya. Mi askem se, “?Yufala i man Jyu?” Craig i eksplenem se, tufala i Wetnes blong Jeova mo se Krismas i no rili blong ol Kristin man. Hem i givim sam Wajtaoa mo Wekap! magasin long mi blong rid long poen ya.

Mi mi intres long skul blong tufala. I luk olsem se skul ya i defren long ol narafala skul. Taem mi go long jyos, bakegen mo bakegen, mifala i harem sem samting, se: ‘Bilif long Jisas Kraes, tekem baptaes, mo bambae yu go long heven.’ Be i luk olsem se samting ya i isi tumas. Mi mi bilif se taem ol samting long laef blong yu oli isi tumas, yu yu gat spesel save, sipos no, wan samting i rong. Mi save se mi no gat spesel save, taswe mi ting se i mas gat samting i rong wetem wanem we jyos i stap tijim.

Biaen, Craig i stat blong stadi Baebol wetem mi taem mifala i spel long medel dei. Wan dei, hem i askem mi blong go long wan asembli blong ol Wetnes blong Jeova, mo mi go. Mi faenem Craig mo mi sidaon wetem hem mo famle blong hem. Mi mi sapraes tumas long samting we mi luk—ol man blong defren kala oli stap joengud blong wosip tugeta—mo mi sapraes tu long ol tok we mi harem.

Taem mi mo Craig, mitufala i pas i go long nyufala klas, mitufala i no moa save stadi Baebol tugeta from we haoa blong mifala blong kakae long medel dei i no sem mak. Mama blong Craig i telefon long Mama blong mi blong askem sipos hem i save stadi wetem mi, be Mama i talem no. Afta, hem i letem mi blong go long ol Kristin miting. Ale mi telefon long Haos Kingdom we i stap long lis long buk blong telefon, mo mi faenemaot se miting i stat long 9 klok long Sande moning. Long Sarede blong hem, mi wokbaot bitim 30 yad blong go kasem Haos Kingdom blong mekem sua se mi save rod.

Long nekis moning, taem mi kasem Haos Kingdom, wan man i askem sipos mi kam long narafala Haos Kingdom. Mi talem long hem se hemia i faswan taem we mi kam long Haos Kingdom ya mo se mi bin stadi blong smoltaem. Wetem kaen fasin, hem i singaot mi blong go sidaon wetem hem mo waef blong hem. Ol miting ya oli defren olgeta long ol narafala jyos. Mi sapraes tumas blong luk olsem wanem plante oli stap givim ansa long haf ya we i gat kwestin mo ansa. Ol pikinini tu oli givim ansa. Mi leftemap han blong mi mo mi givim wan ansa tu. Stat long taem ya, mi gohed blong go long ol miting mo save blong mi long saed blong ol trutok blong Baebol i gohed blong gru.

Wan Narafala Hadtaem

Long Desemba 1986, we i laswan yia blong mi long haeskul, olsem oltaem, mi pas blong oli jekemap mi. Samting we dokta i faenem long raetsaed waet leva blong mi, i mekem hem i tingting. Ale oli talem long mi blong pas bakegen long x-rai.b Taem mi kasem save se ol tes ya oli soemaot se i rili gat wan samting i rong, mi stat blong krae.

Dokta i mas katem mi blong stadi long leva blong mi. Hem i yusum wan pin blong tekemaot wan pis blong soa long waet leva blong mi. Oli faenemaot se hem i kansa bakegen. Mo tu, i gat trifala soa, mo i gat wan we i bigwan, kolosap long ol bigfala string blong hat blong mi. Afta we mi toktok wetem dokta, mitufala i agri se bambae hem i testem tu strong meresin we i gat kemikol long hem blong mekem soa ya i kam smol bifo we oli katem mi. Olsem oltaem, samting ya i mekem mi mi harem nogud tumas—hea blong mi i folfoldaon evriwan, bel blong mi i tantanem, mi traot, mo namba blong sel long blad blong mi i godaon.

Fastaem, tingting blong mi i foldaon, be afta mi stat blong prea plante long Jeova, mo samting ya i givim paoa long mi. Kolosap sikis manis nomo i stap bifo long taem blong mi kasem stefeket long skul. Ol tija blong mi oli sore long mi mo oli kaen. Oli jes askem nomo blong mi karem wan leta long dokta i kam long olgeta, mo se mi save traehad blong gohed wetem skulwok blong mi.

Skul i No Isi

Antap long traem ya blong mekem skulwok blong mi taem mi sik tumas, hea blong mi i stat blong folfoldaon. Taem mi pem gyaman hea, ol fren long skul oli talem se hea blong mi i naes tumas—oli no luksave se hem i gyaman hea. Be wan boe i luksave. Evritaem, taem mi kam insaed long klasrum, hem i raetem tok ya “gyaman hea” long blakbod, mo hem wetem ol fren blong hem oli laf mo jikim mi. Fasin jiki blong olgeta i mekem se tingting blong mi i foldaon.

Nao, wan dei, insaed long wan rum we i fulap long ol studen, wan man we i stap biaen i holem gyaman hea ya mo i pulumaot long hed blong mi. Kwiktaem nomo mi tanraon, mo mi pikimap hea ya long graon. Be plante pikinini oli luk bolhed blong mi, mo mi harem nogud tumas. Mi go afsaed mo mi krae. Long nekis dei, taem mi luk fes blong sam studen, mi luksave se oli sore from samting we i hapen. Sam fren long klas, oli talem long mi se wan gel i pem wan boe blong pulumaot gyaman hea blong mi.

I No Isi Blong No Akseptem Blad

Taem oli stap pinim mi wetem meresin ya we i gat kemikol long hem, namba blong sel long blad blong mi i godaon bigwan. Ol samting oli go moa nogud. Blad i ron long nus blong mi, samtaem tu no tri taem long wan dei. Mi no baptaes yet, be mi stanap strong mo mi talem se mi mi wan Wetnes blong Jeova, mo mi no save akseptem blad. (Ol Wok 15:28, 29) Fasbon sista blong mi i talem long smol gel blong hem blong talem long mi se, hem i no wantem se bambae mi ded. Papa i harem nogud tumas, hem i wantem se mi mas tekem blad, mo Mama i stap gohed blong talem long mi se bambae God i fogivim mi sipos mi tekem blad transfyusen.

Long semtaem, ol dokta oli givim woning long mi se, mi save kasem hat atak no bambae tingting blong mi i lus, from mi lusum fulap sel long blad. From we mi gat strong tingting blong no akseptem blad, oli mekem mi saen long wan pepa blong soem se sipos mi mi ded, i no fol blong olgeta. Smoltaem biaen, mi kamgud bakegen, we mi naf blong gohom mo gobak long skul. Be, from we namba blong ol sel long blad blong mi i godaon bigwan, ol dokta oli mekem disisen se bambae mi pas long mesin ya we i gat strongfala laet bitim we oli pinim mi wetem meresin we i gat kemikol long hem. Evri dei afta long skul, stat long en blong Epril kasem stat blong Jun 1987, mi pas long mesin ya.

Kasem Stefeket, Mo Tekem Baptaes

Taem ya we mi kasem stefeket i wan spesel taem. Sista blong mi i halpem mi blong lukaot wan dres long stoa, mo mi pem wan nyufala gyaman hea. Mama mo tufala sista blong mi, trifala i kam long spesel taem ya, mo afta, mifala i go long wan kakae we mi no save fogetem samtaem.

Long taem ya, oli no moa pinim mi wetem meresin we i gat kemikol long hem mo mi no moa pas long mesin we i givim strongfala laet. Be sam wik biaen, ol dokta oli telefon long mi mo oli askem mi blong pas bakegen blong oli pinim mi bakegen wetem meresin ya we i gat kemikol long hem. Mi no wantem go, from we wan wik biaen, mi mas go long distrik asembli blong ol Wetnes blong Jeova long Yanki Stedium long Nyu Yok Siti. Be, Mama i talem long mi se i moagud blong go long hospital mo kasem meresin ya fastaem. Ale mi mekem olsem.

Mi haremgud tumas long asembli from we long Sarede, Julae 25, 1987, mi tekem baptaes. Wan polis i lidim mifala i go long Okad Bij, ples blong baptaes. Afta we mi tekem baptaes, mi gobak long stad mo mi stap blong ful dei ya. Long naet blong hem, mi harem se mi taed tumas, be long Sande moning, mi rere mo mi go long laswan dei blong asembli.

Fesem Traem Blong Blad Bakegen

Long aftenun, long nekis dei, mi go slip long hospital from we mi kasem wan fiva we i go antap kasem 39 digri, mo kidni blong mi i soa, mo namba blong ol sel long blad blong mi i godaon tumas. Dokta i talem strong long mi se sipos mi no saen long pepa long saed blong blad transfyusen, bambae hem i putum mi long kot mo i fosem mi blong tekem blad. Mi fraet we mi fraet. Famle blong mi i stap fosem mi blong tekem blad; mo tu, sista blong mi i talem se bambae hem i givim sam blad long mi, be mi talem se mi no wantem.

Mi prea plante long Jeova blong halpem mi blong stanap strong. Mi glad tumas taem namba blong sel long blad blong mi i stat blong kam antap bakegen, mo oli no moa fosem mi blong tekem blad. Mi nidim moa pin wetem meresin we i gat kemikol long hem, be dokta i no moa save faenem wan string blong blad we i stret. Ale wan dokta i katem mi smol long stampa blong nek blong mi mo i putum wan samting we meresin i save pas long hem.

Taem dokta i stap tokbaot olsem wanem blong tekemaot ol soa long waet leva blong mi, hem i talem se bambae hem i no yusum blad. Be bambae hem i yusum nomo sipos i nidim blad kwiktaem. Mama i talem long mi blong agri, ale mi agri. Be biaen mi harem nogud, from we, i olsem se mi agri blong akseptem blad. Ale, kwiktaem nomo mi stat blong lukaot wan dokta we i save promes se bambae i no yusum blad. Kolosap se mi no save faenem wan dokta, be biaen mi faenem wan, mo oli talem se bambae oli katem mi long Janewari 1988.

Dokta i no mekem promes se bambae mi laef. Mo tu, long naet bifo we hem i katem mi, hem i kam long rum blong mi mo i talem se: “Bambae mi traem blong mekem samting ya.” Mi mi fraet. Mi gat 19 yia nomo, mo mi no wantem ded. Be, hem i tekemaot trifala soa ya, mo tu, hem i tekemaot bighaf blong waet leva blong mi. I gud tumas we mi slip long hospital blong wan wik nomo. Long haos, afta we mi kamgud bakegen blong samwe long tu manis haf, oli stat bakegen blong pinim mi wetem meresin we i gat kemikol long hem, mo olsem oltaem, samting ya i mekem mi harem nogud tumas.

Samwe long taem ya, papa blong mi tu i kasem kansa. Mo wan naet, long sam manis biaen, Mama i faenem hem long rum blong slip, we hem i ded finis. Afta we Papa i ded, mi stat blong go long wan trening skul, mo mi tren blong kam olsem sekretari. Mi gohedgud long saed blong bodi, long saed blong trening mo long saed blong speret, mo tu mi stap wok olsem wan haftaem paenia (fultaem Kristin minista blong smoltaem).

Wan Narafala Traem Bakegen

Long Epril 1990, mi go long mared blong fasbon brata blong mi long Ogasta, Jojia. Taem mi stap long Ogasta, brata blong mi i talem se: “Leg blong yu i rili bigwan.”

Mi askem se: “?Yu ting se wanem i mekem?”

Hem i ansa se: “Mi no save.”

Mi talem se: “Ating hem i wan soa ya.”

Afta we mi gobak long Nyu Yok Siti, mi go luk dokta. Wan dokta long ples ya i mekem wan tes long mi mo i faenem se i gat wan narafala soa blong Wilms long lefsaed leg blong mi, daon. Ol tes oli soem se i no gat trabol long bun, be soa ya i bigwan tumas blong tekemaot. Ale olsem oltaem, dokta i gohed blong pinim mi wetem meresin we i gat kemikol long hem.

Smoltaem afta, mi stat blong traot we mi no save stop; gat blong mi i fas. Kwiktaem nomo, oli katem mi, nao mi kamgud bakegen. Be, gat blong mi i no stret, mo oli mas katem mi bakegen. Namba blong red sel long blad blong mi i kamdaon gogo kolosap i kasem fo, mo dokta i gohed blong talem se: “Yu mas tekem blad. Sipos no, bambae yu ded ya. Ating yu no save laef kasem tumora.” Long naet ya, mi luk ol nogud drim blong beregraon mo long saed blong ded.

Long Oktoba, mi kamgud naf blong oli save tekemaot soa. Oli tekemaot samwe long 70 pesen blong masel long leg blong mi tu. Oli no save sipos bambae mi save wokbaot long leg ya bakegen. Be mi mas wokbaot blong go long plante ples long Nyu Yok Siti. Ale wetem ol eksasaes mo strong tingting, mi stat blong wokbaot. Fastaem, wetem wan aean samting we mi lei long hem taem mi wokbaot, afta wetem tufala wud, afta wetem wan stik, mo biaen wetem wan samting we oli fasem long leg, we i mekem se mi save yusum han blong mi blong soem Baebol long Kristin minista wok long ol haos wanwan. Taem oli stap pinim mi wetem meresin we i gat kemikol long hem, kilo blong mi i godaon long 27. Longfala blong mi i kasem 155 sentimita mo taem mi no sik yet, kilo blong mi i kasem 54. Taem kilo blong mi i stap go antap mo leg blong mi i kam big moa, ol dokta oli mekem samting we oli fasem long leg blong mi i kam bigwan. Biaen, kilo blong mi i go antap kasem mak blong fastaem, ale nao oli wokem wan nyuwan.

Laef i No Isi Yet

Long hot taem blong 1992, i luk olsem se mi kamgud bakegen mo mi gat tingting blong mekem wok blong haftaem paenia. Long Novemba, mi kasem wan leta we i mekem mi glad tumas. Leta ya i talem se ekspiryens long laef blong mi i save leftemap tingting blong ol narafala, mo oli singaot mi blong raetem ekspiryens ya long Wekap! Wan wik biaen, glad blong mi i lus, mo mi harem nogud tumas.

Mi pas long eksre from jes blong mi, olsem mi stap mekem oltaem, mo oli faenem se i gat soa long waet leva blong mi, long saed ya we i no gat trabol long hem. Mi krae mo biaen mi krae bakegen. Oli tekemaot wan kidni blong mi finis, haf blong leva blong mi, bighaf blong lefsaed waet leva blong mi, haf blong leg blong mi, be i no gat wan man i save laef sipos hem i lusum tufala waet leva blong hem. Bakegen famle mo ol fren blong mi oli givhan long mi, mo bakegen, mi gat strong tingting blong faetem sik ya.

Dokta i stat pinim mi wetem meresin we i gat kemikol long hem blong mekem ol soa ya oli kam smol. Wan dokta i ting se maet oli save tekemaot ol soa ya nomo, be i livim waet leva. Long Maj 1993, mi go long rum blong katem man. Afta, oli talem long mi se oli jes lukluk nomo, afta, oli somap mi. Oli no save tekemaot ol soa sipos oli no tekemaot waet leva. Stat long taem ya, oli pinim mi wetem ol strong meresin we i gat kemikol long hem blong traem kilim ol soa ya.

?Yu kasem save nao from wanem ded i stap oltaem long tingting blong mi? ?Bambae mi tingting dip se from wanem yumi ded mo wanem hop long saed blong fyuja, sipos mi bin gat wan isi laef? Mi no save. Be, mi save se, samting we i rili impoten, i no se yumi laef no yumi ded naoia, be i blong kasem blesing blong Jeova God, Man we i save givim laef we i no save finis. Fasin ya blong tingbaot hop ya blong laef long nyufala wol, putum ol baden blong mi long Hem, mo stap kolosap long ol fren we oli gat sem hop olsem mi, i givhan long mi blong gohed.—Ol Sam 55:22; Revelesen 21:3, 4.

Mi glad se ol narafala yangfala oli gat gudfala helt. Mi hop se store ya bambae i pusum plante long olgeta blong yusum helt ya long waes fasin, blong mekem wok blong Jeova, i no blong ronem ol samting we oli blong lus. !Bambae i gud tumas blong haremgud foreva long gudfala helt long nyufala wol blong God! Long nyufala wol ya, bambae yumi no moa nidim ol dokta, ol hospital, ol pin, ol smol paep—i no gat wan samting we bambae i mekem yumi tingbaot olfala wol ya we ol man oli stap sik mo oli ded.—Olsem Kathy Roberson i talem.

[Ol Futnot]

[Tok pija long pej 21]

Mi pas i go long haeskul

[Tok pija long pej 23]

Mi stap givhan blong seremaot kakae long wan seket asembli long Nyu Yok