Ol Yangfala Oli Askem . . .

?From Wanem Papa i Ded?

PAPA blong Al i wan man we ol man oli savegud se hem i gat strong bodi mo gud helt. Taswe oli sapraes taem hem i go slip long hospital. Nating se i olsem, Al i bilif se, i no longtaem, bambae papa blong hem i kambak long haos. Be, wantaem nomo, sik blong hem i kam strong moa, nao hem i ded. Al i talem wetem sore se: “Mi no save bilif se wan man we i strong olsem i save ded.”

Papa blong Kim i wan Kristin man we i gat lav. Bifo, hem i bin go slip long hospital from wan sik we i stap kasem hem oltaem, be nao, i luk olsem se hem i stap kamgud. Ale wan dei, taem hem i stap long rum blong swim, hem i foldaon. Kim i talem se: “Taem mi luk hem, wantaem nomo mi save se hem i ded finis. Mama mo brata blong mi, tufala i rili traehad blong sevem hem wetem smol save blong olgeta long saed blong CPR.a Mi resis i go long rum blong mi mo mi prea se: ‘Jeova, yu no letem samting ya i hapen. !Plis yu sevem hem!’ Be neva Papa i pulum win bakegen.”

Ded i wan nogud samting we i stap kamaot oltaem long wol ya. Baebol i talem se: “Evri samting i gat prapa taem blong hem . . . wan taem we man i bon mo wan taem we man i ded.” (Eklesiastis 3:1, 2) Sipos yu bin gruap long wan Kristin famle, yu yu save ol tijing blong Baebol long saed ya se, from wanem man i ded, olsem wanem long man taem i ded, mo hop blong laef bakegen long ded.b

Be, maet yu harem nogud tumas taem papa no mama blong yu i ded. Hemia wan ekspiryens we i strong moa bitim ol narafala ekspiryens long laef. Ekspiryens ya i save mekem yu filim se yu stap yu wan, mo yu no sefgud. Yu stap gru yet long saed blong bodi mo long saed blong filing, mo nating se yu no moa dipen tumas long papa mama blong yu, yu nidim tufala yet long plante rod.c

Ale, yumi no sapraes we wan stadi i soem se bigfala fraet blong ol yangfala, hemia long saed blong ded blong papa no mama blong olgeta. Wan yangfala i talem se: “Plante taem, papa mo mama blong mi, tufala i rili mekem mi harem i soa, be yet, mi no wantem nating se wan samting i hapen long tufala. Mi wari long samting ya.”—The Private Life of the American Teenager.

Taswe, sipos papa no mama blong yu i ded, yu save harem nogud tumas long filing blong yu. Maet fastaem i olsem we ol filing blong yu oli ded, we i mekem se yu no save krae. Samting ya i hapen long plante man. Taem man blong raetem Ol Sam i harem nogud tumas, hem i talem se: “Mi mi slak we mi slak we mi flat olgeta.” (Ol Sam 38:8) Buk ya Death and Grief in the Family i talem se: “Taem wan man i kasem bigfala kil no i brekem wan bun blong hem, i olsem we samting ya i mekem bodi blong hem i sek bigwan. Fasin ya i protektem hem blong hem i no harem i soa fulwan [wantaem nomo]. Taem wan man i harem nogud from wan i ded, samting we i kamaot long hem i kolosap sem mak.” ?Be, wanem i save hapen afta we faswan filing ya i godaon?

‘Mi Harem Se Mi Kros Tumas’

Long Luk 8:52, yumi ridim se, afta we wan smol gel i ded, “olgeta man oli stap singaot bigfala, oli stap krae.” Yes, taem wan man we yumi laekem hem tumas i ded, i stret nomo blong gat ol strong filing, olsem sore, yu harem se yu gat fol, fraet—mo fasin kros tu.

?From wanem yumi save kros? From we papa mama blong yumi, oli mekem yumi filim se yumi sefgud, yumi no fraet. Taem wan long tufala i ded, i stret nomo blong harem se yumi fraet mo yumi stap yumi wan. Hemia i no minim se papa no mama blong yu i wantem lego yu. Be ded i enemi blong yumi. (1 Korin 15:26) Taem ded i winim wan we yumi laekem tumas, yumi harem se yumi rili lusum wan bigfala samting, mo yumi harem i soa tumas. Makemgud tok ya blong Wendy, we i gat 18 yia: “Afta we papa blong mi i ded, mi filim se mi stap mi wan nomo long wol ya, mo mi fraet tumas. Plante taem mi wantem se papa blong mi i stap wetem mi blong halpem mi.” Taem yu tingbaot ol samting we yu lusum—fasin lav, fasin sapot, tijing—maet yu kasem save from wanem yu kros.

Eksampel, yangfala Debbie i frengud wetem angkel blong hem. Afta we angkel blong hem i ded, Debbie i raetem se: “Mi harem se i no stret nating we wan man we i gud olsem, we ol narafala oli laekem hem tumas, mo we i laekem Jeova, i mas safa mo i ded long fasin we i soa olsem. Nating se mi gruap long wan Kristin famle, mo mi save from wanem ol man oli kam olfala mo oli ded mo from wanem ol gudfala man oli safa, be mi no rere blong kasem ol filing blong kros we mi kasem.”

Samfala oli kros tu long papa no mama blong olgeta we i ded. Yangfala Victoria i talem se: “Bubuman blong mi i ded las yia. Mi kros tumas long hem from we hem i ded, mo afta, taem mi no moa kros, mi sore we mi sore.” Tru ya, samfala oli tanem tingting i go long heven blong soemaot kros blong olgeta. Terri we i gat 14 yia, we papa blong hem i ded kwiktaem long wan hat atak, i talem se: “Mi kros long God. Mi laekem tumas Papa blong mi mo mi nidim hem tumas, taswe ?from wanem hem i mas ded?”

‘Naoia Mi Harem Se Mi Gat Fol’

Plante man oli harem se oli gat fol taem papa no mama blong olgeta i ded. Baebol i talem se: ‘Yumi evriwan yumi mekem nogud finis, mo yumi stap longwe long ol gudgudfala fasin blong God.’ (Rom 3:23) From samting ya, bighaf blong ol yangfala oli rao wetem papa mama blong olgeta samtaem. Be taem papa no mama blong olgeta i ded, oli tingbaot ol rao mo fasin agyu we oli bin kamaot wetem hemia we i ded, nao samting ya i save mekem olgeta oli harem nogud tumas.

Samting we i save halpem yumi se, yumi mas tingbaot we ol man we oli laeklaekem olgeta tumas, oli save rao bigwan samtaem. Yangfala Elisa i talem se: “Mi laekem mama blong mi tumas, mo mi save se hem i laekem mi tumas. Be sam manis bifo we hem i sik, mitufala i gat sam problem. Mi kros long hem from ol samting we long taem ya oli impoten long mi—be naoia, oli nating nomo. Wan taem, mi tingbaot we mi kros tumas long hem, ale mi go antap long rum blong mi mo mi stap tingting se i gud sipos hem i ded. Taem mama i sik mo i ded kwiktaem, mi tingbaot ol filing ya we mitufala i no bin stretem. Naoia mi filim se mi rili gat fol.” Nating se yu bin talem wanem tok no yu gat wanem filing, i no yu we i mekem se papa no mama blong yu i ded. I no fol blong yu.

Harem i Soa From Sore

Nating se i olsem, maet yu filim se yu sore tumas mo yu harem nogud tumas. I gud blong save se ol man mo woman blong bilif long taem blong Baebol, olgeta tu oli kasem ol filing olsem. Taem Josef i lusum papa blong hem we i laekem hem tumas, “Josef i sakem hem i stap slip antap long bodi blong papa blong hem, mo i stap krae bigwan long hem, mo i stap kis long hem.” (Jenesis 50:1) Mo tu, Jisas Kraes “i krae” taem fren blong hem Lasros, i ded.—Jon 11:35.

Yes, taem wan man i stap sore from papa no mama blong hem we i ded, i stret nomo we samtaem, sore blong hem i bitim mak. Taem man blong raetem Ol Sam i stap tokbaot we hem i harem nogud, hem i talem se hem i olsem wan man ‘we hed blong hem i hangdaon, from we i sore tumas, olsem we i sore taem mama blong hem i lus.’ (Ol Sam 35:14) Sipos sore i winim yu, maet ‘yu no save slipgud from we tingting blong yu i hevi tumas.’ (Ol Sam 119:28, NW) Maet yu no moa kakaegud. Maet yu faenem se i had blong tingting dip long skul. Maet tingting blong yu i foldaon tu.

Blong mekem ol samting oli kam moa had, maet sore i winim papa no mama blong yu we i no ded mo ol brata sista blong yu, mekem se oli no save halpem no sapotem yu. Kim i talem se: “Afta we mifala i berem papa blong mi, mifala i traem blong kambak long laef we mifala i gat bifo, taem papa i laef yet. Naoia Mama i hed blong famle. Be i gat sam taem we hem i no save holemtaet filing blong hem, ale hem i krae stret long medel blong famle Baebol stadi blong mifala. Long naet, mi harem krae blong hem, mo hem i stap singaot nem blong papa blong mi.”

Haremgud Bakegen

Bifo, profet Jeremaea i talem se: “Mi harem nogud we mi no save haremgud bakegen. Hat blong mi i sik.” (Jeremaea 8:18) Maet yu tu yu filim se neva yu save haremgud bakegen. Be makemgud ol tok blong aposol Pol se: “Yumi mas presem God ya . . . we i stap leftemap tingting blong yumi long olgeta trabol we yumi stap kasem.” (2 Korin 1:3, 4, NW) Bigfala rod we God i yusum blong leftemap tingting blong yumi, hemia Tok blong hem Baebol. Antap long samting ya, tabu speret blong hem i save pusum ol fren mo ol memba blong famle blong givim help mo sapot we yumi nidim.

Yu no mas letem fasin kros we i no stret i blokem yu blong lukaot help long God blong haremgud bakegen. Stret man ya Job i mekem mastik, taem i blemem God from olting we hem i lusum, we i mekem se hem i harem nogud tumas. Wetem fasin kros, hem i talem se: “Mi mi stap laef long pis, be God i jokem nek blong mi mo i kilim mi mo i smasemgud mi.” (Job 16:12, 13, Today’s English Version) Be Job i rong. Setan nao i stampa blong ol trabol blong Job, i no God. Yangfala Elaehu i mas mekem Job i tingbaot se “God i no save mekem wan samting we i no stret, mo Hemia we i Gat Olgeta Paoa, i no save jajem man long fasin we i no stret.” Biaen, Job i tanem tingting blong hem fulwan long ol tok ya we hem i talem, we i no tingtinggud long hem fastaem.—Job 34:12; 42:6.

Long sem fasin, maet yu nidim wan man blong halpem yu blong tingting long fasin we i moa stret. Kim i talem se: “Wan olfala Kristin elda i mekem mifala i tingbaot hop blong laef bakegen, mo hem i serem wetem mifala ol vas olsem Jon 5:28, 29 mo 1 Korin 15:20. Hem i talem se: ‘Bambae papa blong yu i laef bakegen, be yu mas holemstrong long God sipos yu wantem luk hem long Paradaes.’ !Mi no save fogetem tok ya! Hem i talem tu se, God i no mekem man blong i ded. Ale, mi luksave se i no God we i mekem papa blong mi i ded.”

I tru, fasin blong tingting dip long ol vas blong Baebol i no tekemaot fasin blong harem nogud blong Kim, wantaem nomo. Be hem i givhan long Kim blong stat blong haremgud bakegen. Yu tu, yu save stat blong winim soa mo sore blong yu. Nekis haf blong ‘Ol Yangfala Oli Askem,’ bambae i tokbaot olsem wanem yu save mekem olsem.

[Ol Futnot]

[Tok pija long pej 26]

Ded blong papa no mama i wan ekspiryens long laef we i had moa bitim ol narafala ekspiryens