Gobak Bakegen Long Rasia

WAN LONG OL BIGFALA JENIS WE I KAMAOT LONG PLES WE BIFO OLI KOLEM SOVIET YUNION, HEMIA SE NAOIA MAN I FRI BLONG TOKBAOT SKUL. PLANTE MAN RASIA OLI YUSUM FASIN FRI YA BLONG STADI LONG OL TIJING BLONG BAEBOL. RISAL BLONG SAMTING YA, HEM I OLSEM WAN MERIKEL LONG TAEM BLONG YUMI.

!LONG Julae 28, 1993, mi kasem wan sapraes, taem mi karem nyuspepa blong moning, New York Times! !Mi luk wan bigfala pija long faswan pej we i soem ol man we oli tekem baptaes long Mosko! Smol tok we i stap aninit long pija ya, i talem se: “Fasin ya we ol man Rasia oli fri blong folem eni skul, i mekem se wan bigfala hif blong man i kam blong tekem baptaes long Lokomotiv Stad long Mosko, from we oli wantem joen long skul blong ol Wetnes blong Jeova.”

Mi mo waef blong mi, mitufala i jes lego Rasia mo kambak wan dei bifo we mi ridim samting ya. Mitufala i bin stap long taem ya we ol 1,489 man ya oli tekem baptaes. Kristin lav we ol man Rasia ya oli soemaot, mo intres we oli gat long ol samting long saed blong speret, i rili mekem mitufala i haremgud. Wan ekspiryens we i kamaot long mitufala afta asembli ya i finis long Sande naet, i soemaot samting ya.

Taem mitufala i karem tren blong gobak long hotel we mitufala i stap long hem, mi sidaon kolosap long wan yangfala man we ating i gat 18 no 19 yia. Mi givim wan traket long hem we i tokbaot Baebol, long lanwis blong Rasia, nem blong traket ya ?Olsem Wanem Long Ol Fren Blong Yumi We Oli Ded?a Boe ya i lukluk kwiktaem long traket ya, ale hem i pasem i go long mama blong hem. Mi givim wan narawan long yangfala ya. Nao hem i poen i go long wan kwestin we i faswan tok insaed long traket, “?Sipos wan man i ded, hem i save laef bakegen?” Mo, long wan fasin we i soemaot se hem i no rili bilivim samting ya, hem i talem long Engglis se, “?Yu yu bilivim samting ya?”—Job 14:14, King James Version.

Mi tanem mi blong lukluk stret long ae blong hem. Nao wetem strong bilif, mi ansa se: “!Mi mi rili bilivim samting ya!” Kwiktaem biaen mi ademap se: “Tingbaot samting ya. Laef blong yumi olsem ol man we i gat waes, mo i save tingting, i olsem wan merikel. Wan Man we i Hae Moa i mas stampa blong olgeta loa we oli mekem se yumi kam ol laef man. Taswe mi mi bilif se Man ya we i Hae Olgeta, hem i naf blong wokem bakegen wan man we i ded tu, blong mekem se hem i save laef bakegen.”

Wantaem nomo, yangfala ya i stat blong ridim traket ya. Taem hem i finis, mi givim wan buklet long hem, long lanwis blong Rasia, nem blong hem ?God i Rili Kea Long Yumi?* Hem i wantem save moa, be mitufala i mas kamaot long tren long nekis ples we hem i stop long hem. Nating se yangfala ya mo mama blong hem oli mas tekem tren blong go long wan narafala ples long sem naet ya, oli kamdaon wetem mitufala blong storeyan sam menet moa. Afta we mi toktok smol long saed blong fasin blong mifala blong mekem Baebol stadi wetem ol man, mi soem wan adres long hem, we i stap long laswan pej blong buklet ya. Hem i save raet i go long adres ya blong save moa.

Long nekis dei, mitufala i lego kantri blong Rasia. Be ol man olsem, oli mekem se mitufala i no save fogetem ples ya.

Mitufala i Gohed Blong Tingbaot Rasia

Mi gohed blong tingbaot bigfala namba blong ol nyuwan we oli tekem baptaes afta we gavman blong ples ya we bifo oli kolem Soviet Yunion, i karemaot tabu long wok blong ol Wetnes blong Jeova, long manis Maj 1991. Kwiktaem nomo, oli mekem plan blong gat seven bigfala asembli long hot taem blong 1991, mo 7,820 oli tekem baptaes long wora. Biaen, long ol asembli long hot taem blong 1993—wetem hemia we mitufala i joen long hem long Mosko—11,238 oli tekem baptaes.

Plante man Rasia oli luksave strongfala tingting blong prij we ol Wetnes long Rasia oli soemaot. Taem yu tingbaot fasin blong ol man Rasia taem oli harem ol tijing blong Baebol, hem i olsem wan merikel nomo.

Mitufala i stap tingting se, ‘?Olsem wanem wok i save gru wantaem nomo olsem? ?Ol man Rasia ya, oli stap stanap strong long ol Kristin tijing?’

Wan man mo woman blong hem, we oli stap long Mosko, oli talem se bambae oli lukaotem wan ples blong mitufala i slip long hem sipos mitufala i visitim Rasia bakegen. Ale, mitufala i mekem plan blong gobak. Tingting blong mitufala blong go, i kam moa strong taem mitufala i kasem sam ripot we i soemaot bigfala intres we ol man Rasia oli gat long ol trutok blong Baebol.

Wan Famle Long Rasia We i Welkamem Mitufala

Long Julae 24, mitufala i kasem ples ya we bambae mitufala i stap long hem long Mosko, wetem ol basket long han blong mitufala—wan rum we i stap long seken floa blong wan haos. I tekem ten menet nomo blong wokbaot long ples ya i go kasem haos blong ol fren blong mitufala. Long haos blong famle we mitufala i mas stap wetem, Katia nomo we i gat 15 yia, i stap blong welkamem mitufala. Hem i Sande aftenun mo ol narafala memba blong famle oli stap yet long wok blong prij.

I no longtaem, ol narafala memba blong famle oli stat kambak—Galina, we hem i mama; Zhenia we i gat 13 yia blong hem, hem i yangfala gel blong famle; mo, laswan, Viktor, hemia papa. I no gat wan long olgeta we i save toktok Engglis, mo mitufala i no save wan wod long lanwis blong Rasia. Fasin blong storeyan tugeta i isi taem ol fren blong mitufala, we oli save toktok Engglis oli stap blong tanem ol tok blong mitufala i go long lanwis Rasia, be i kam had taem oli go. Mitufala i yusum wan diksonari we i gat ol tok long Engglis i go long lanwis blong Rasia, mo mitufala i yusum han blong mekem ol saen tu. Katia mo Zhenia oli savegud olsem wanem blong storeyan wetem mitufala, from we oli bin lanem blong yusum han blong mekem saen, olsem fasin blong toktok wetem ol man we sora blong olgeta i fas.

Fulwan famle ya oli baptaes long semtaem, tu yia bifo nomo. Viktor hem i wan man blong givhan long kongregesen, mo tufala gel oli yusum skul holide blong mekem moa long wok blong prij. Taem oli stap long skul, oli no fraet blong tokbaot bilif blong olgeta. Wok blong olgeta blong prij i pulum intres blong ol man blong gavman tu, afsaed long eria blong skul blong olgeta. !Mitufala i sapraes blong harem se famle ya i stap mekem 28 Baebol stadi evri wik wetem ol man we oli intres!

I klia se, evri memba blong famle ya oli tingbaot Baebol stadi mo wok blong prij fastaem long ol narafala samting, mo mitufala i luk se samting ya i mekem laef blong olgeta i rij long saed blong speret. Oli soemaot bigfala fasin glad oltaem.—Ol Wok 20:35.

Wan Strong Faondesen Long Saed Blong Baebol

Bifo we mifala i go slip long naet, mi askem sam kwestin long famle ya long saed blong ol vas blong Baebol. Fastaem mi askem se Revelesen 21:3, 4 i talem wanem. Wantaem nomo, tufala gel tugeta, oli talem stret toktok blong hem. Biaen, mi askem vas blong Aesea 2:4. Oli save hemia tu, oli yusum ol saen tu blong eksplenem fasin blong tanem ol naef blong faet i kam tul blong wokem garen.

Mi gohed wetem sam narafala vas long Aesea we oli tokbaot rul blong Kingdom mo ol blesing blong nyufala wol, olsem, Aesea 9:6, 7; 11:6-9; 25:8; 33:24; 35:5, 6; mo 65:21, 22. Famle ya i no lukluk nating long Baebol blong olgeta, be oli save talemaot ol tok we oli stap long ol wanwan vas ya. Samtaem, ol gel oli soem se oli save ol vas ya, taem oli mekem ol saen blong eksplenem, olsem saen blong soem wan pikinini we i stap lidim laeon.

Long wan narafala naet bakegen, mitufala i storeyan long sam vas we oli tokbaot God. Mitufala i tokbaot moa ol vas we oli soemaot se Jisas i stap daon moa long God, mo se God mo Jisas i no wan man, be tufala i gat wan tingting nomo. Famle ya i save talem ol tok we oli stap long ol vas olsem Jon 10:30, Jon 17:20, 21, mo 1 Korin 11:3. Mi mo waef blong mi, mitufala i sapraes blong luk olsem wanem we oli savegud Baebol blong olgeta.

Long Tusde moning, raonabaot twelef long mifala i mit wan ples mo tekem tren blong go long wan naesfala open ples we ol man oli kam long hem blong spel. Long ples ya mifala i spenem tu mo haf haoa blong storeyan wetem ol man long saed blong Baebol. Mifala i seraot mo wok tutu. Wan long olgeta we mi wok wetem hem, i Nadia, wan gel blong Rasia we i soemaot gud mo waes fasin taem hem i kam long ol man mo statem wan storeyan wetem olgeta. Hem i gat gudhan blong pulum ol man blong lukluk ol tingting blong God long Baebol. Mi talem long mi wan se, ‘Hemia wan gel we i bin wan pablisa longtaem finis.’ !Be, biaen mi sapraes bigwan blong faenemaot se gel ya i gat 17 yia nomo, mo hem i jes baptaes tu manis bifo!

Mitufala i gat plante ekspiryens olsem, we i makem long mitufala se wok long Rasia i defren long ol narafala ples. Stat long taem we rul blong Komunis i foldaon, ol man Rasia oli soemaot bigfala intres blong stadi long ol tijing blong Baebol. Kolosap olgeta evriwan oli skulgud, mo oli laekem tumas blong rid. Ol smol pikinini tu oli save rid mo kasem savegud. Mitufala i luk pruf blong samting ya, taem mitufala i visitim wan famle we oli blong Rasia nomo, we oli lanem ol trutok blong Baebol taem tabu i stap yet long wok blong ol Wetnes.

Smol boe long famle ya i wantem askem wan kwestin long mitufala. Tru long wan man we i save toktok Engglis, hem i talemaot wanem we hem i wantem. Samting we hem i askem i rili tajem mi, mekem se mi talem long hem se sipos hem i raetemdaon kwestin ya blong hem long wan leta, bambae mi mi save pasem leta ya i go long olgeta we oli stap prentem Wekap! magasin. Wantaem nomo, hem i sidaon mo raetem wan leta. Ol tok we oli kam biaen, hemia nao leta blong hem we oli tanem i kam Bislama. Wan pija blong leta ya i stap long pej 25.

“Serosha i stap long Rasia mo i raet i go long Watchtower Sosaeti. Mi mi gat seven yia, mo mi go prij finis wetem Papa mo Mama. Mi laekem tumas blong toktok wetem ol man long saed blong Kingdom blong God. Mi laekem tumas blong ridim Wekap! magasin tu. Hem i stap kamaot long lanwis blong Rasia wan taem nomo long wan manis, be long lanwis Engglis hem i stap kamaot tu taem wan manis. Mi mi wantem tumas blong gat magasin ya tu taem long wan manis, from we mi laekem, we mi laekem, we mi laekem hem tumas. Plis mekem olsem.”

I no isi blong lego olgeta long Mosko we mitufala i frengud wetem olgeta. Long smol taem ya nomo, mitufala i laekem olgeta tumas.

Skelem Wetem Ol Faswan Kristin

Mitufala i karem tren long naet taem, i go long Talin, Estonia. Long ples ya, mitufala i luk ol naesfala nyu haos we naoia oli hedkwota blong wok blong prij long ripablik ya we bifo oli kolem Soviet Yunion. Tri dei biaen, mitufala i tekem tren i go long Sen Pitasbeg. Long tufala ples ya, ol Kristin brata oli askem nyus long saed blong wok blong prij long Mosko. Mi ansa se, “Taem mi stap long ples ya mo luk olsem wanem wok i stap gru, samting ya i halpem mi blong kasem save moa long tok we i stap long stat blong Ol Wok 17 mo long ol leta blong Tesalonaeka.”

Oltaem mi sapraes, taem mi tingbaot se oli stanemap wan kongregesen long Tesalonaeka jes sam wik nomo afta we aposol Pol i mekem minista wok blong hem long ples ya. Wan narafala samting tu we mi sapraes long hem, se afta wan yia nomo, Pol i raetem tu leta i go long ol nyufala Kristin ya, long ol dip save long saed blong speret, olsem laef bakegen long ded mo fasin blong “go long klaod blong mitim Masta,” ‘dei blong Jeova,’ taem we bambae oli singaot ‘pis mo seftaem,’ mo ‘Dei blong Masta blong yumi, Jisas Kraes.’ (1 Tesalonaeka 4:13-17; 5:1-3; 2 Tesalonaeka 2:1, 2) Strong tingting we ol faswan Kristin ya oli soemaot long wok blong olgeta, i olsem wan merikel long faswan handred yia—long wan sot taem nomo, oli mekem wan intenasnal ogenaesesen blong ol man blong prij we oli bigman, mo strongman long saed blong speret. !Kolosap ten yia biaen, Pol i raet se “gud nyus ya,” ol man oli talemaot finis “long olgeta man long wol”!—Kolosi 1:23.

Long lukluk blong mi, samting we i stap kamaot long Rasia i sem mak long samting ya we i bin hapen long faswan handred yia.

Fasin Traehad Blong Lukaot Long Wok We i Stap Gru

Kantri blong Rasia i bigwan moa long ol narafala kantri long wol. Taswe, blong lidim ol taosen man we oli stap talemaot gud nyus blong Kingdom blong God long ples ya, hem i rili wan bigfala wok.—Matyu 24:14.

Baebol i talem long saed blong olgeta we oli harem Kristin bilif long faswan handred yia, se: ‘Paoa blong Jeova i stap long olgeta ya, mo plante man oli bilif long tok blong olgeta, nao oli tanem tingting blong olgeta, oli biaen long Masta blong yumi.’ (Ol Wok 11:21) !Mitufala i faenem se ol tok ya oli stret nomo long ol Kristin brata blong yumi long Rasia! Mitufala i hop se garen long saed blong speret long Rasia bambae i gohed blong givim fulap kakae, mo plante taosen moa bambae oli joen long nambawan jans ya blong halpem ol narafala blong folem rod we i go long laef.—Wan man i raetem store ya mo sanem i kam.

[Futnot]

[Tok Blong Pija Long Pej 20, 21]

Antap: Famle ya we mitufala i stap wetem olgeta. Antap mo long raetsaed: Wok blong prij long open ples. Daon long raetsaed: Serosha mo leta blong hem

[Tok Blong Pija Long Pej 22]

Ol nyufala haos blong Watch Tower, long Talin, Estonia