?Yu Yu Bin Tingbaot Samtaem?

FROM we i gat plante handred defren skul, bilif, mo grup blong wosip, raonabaot long wol tede, ?olsem wanem yu save makemaot skul ya we God i agri long hem? Maet samting ya i olsem we yu stap traem blong faenem wan smol nidel long wan bigfala hif blong drae gras. ?Be yu ting se yu nidim blong luklukgud ol wanwan gras insaed long hif ya? No gat. Yu save yusum fasin ya blong sakemaot olgeta we oli nogud nomo. Tok blong God, Baebol, hem i olsem wan stil we i save pulum nidel ya i kamaot long ol gras ya. Baebol i save givhan long yu blong luksave ‘wan tok ya nomo we yumi mas bilif long hem.’—Efesas 4:5.

Long wan narafala Wekap! we i pas finis, long haf ya, “?Yu Yu Bin Tingbaot Samtaem?” (Janewari 8, 1994, pej 13, Engglis mo Franis), yumi bin tokbaot kwestin ya se sol i save ded no no gat. Tru long ol tok blong Baebol, yumi pruvum se man i no gat wan sol we i no save ded, mo we i stap kasem blesing no i stap safa afta ded. (Eklesiastis 9:5, 10; Esikel 18:4) From trutok ya we i klia nomo, yumi save sakemaot eni skul we i tijim se man i gat wan sol we i no save ded. Ale, taem yumi mekem olsem, i gat smol namba blong skul nomo i stap, blong traem faenem hemia we God i agri long hem. Taswe, i gud we yumi tingbaot sam narafala kwestin we oli save halpem yumi moa blong katemdaon namba blong ol skul ya we oli stap. Yumi save mekem olsem sipos yumi lukluk mo tingtinggud long ol vas we oli kam biaen.

1. ?Yu ting se trufala skul bambae i leftemap, presem bitim mak, mo givim ona we i olsem wosip, long ol lida blong jyos, mo tu, singaot olgeta long sam taetel we oli no stanap long Baebol?—Ol Sam 96:5-7; Matyu 23:6-12; 1 Korin 3:5-9.

2. ?I stret we trufala skul i wok olsem wan bisnes blong winim mane, blong bambae ol lida blong jyos oli save kam rij mo gat plante samting?—Matyu 6:19-21; Jemes 2:1-4; 5:1-3.

3. ?I stret we trufala skul i karem nem blong hem from wan stampa tijing nomo (olsem Baptis, mo Pentekostal), no from stampa ples we skul ya i stat long hem (olsem Roman, Saoten, Jyos Blong Engglan), from nem blong sinman ya we i stanemap skul ya (Luther, Calvin, Wesley) no from fasin blong rul we skul ya i stap folem (olsem Presbitirin, Episkopelian, Kongregesenal)?—Aesea 43:10, 12; Ol Wok 11:26.

4. ?Yu ting se trufala skul bambae i traem haedem no jenisim nem blong God, we i stap long Baebol?—Aesea 12:4, 5; Matyu 6:9; Jon 17:26.

5. (a) ?Trufala skul i mas gat wanem tingting long saed blong Baebol? (Ol Sam 119:105; Luk 24:44, 45; Rom 15:4; 2 Timote 3:14-16) (b) ?Hem i mas gat wanem tingting long olgeta tijing mo bilif we oli kamaot biaen long taem we oli raetem Baebol?—Galesia 1:8, 9.

6. ?Ol man blong trufala skul oli lukluk i go long wanem samting mo long hu blong sevem olgeta?—Ol Sam 27:1; Matyu 6:33; Rom 16:25-27; 1 Korin 15:27, 28; Revelesen 11:15.

7. ?Trufala skul i mas pulum ol man blong hem blong gat wanem fasin folem ol tijing blong hem?—Matyu 22:37-40; Efesas 4:23-29; skelem Galesia 5:19-21 wetem 5:22, 23.

8. ?Olgeta man raon long wol we oli mekem trufala wosip long God, oli stap joen long ol fasin we oli seraotem ol man, olsem politik mo fasin blong tinghae long wan kantri bitim ol narafala kantri?—Daniel 2:44; 7:14; Jon 18:36; Rom 16:17; 1 Korin 1:10.

9. ?Yu ting se ol man we oli wosip long fasin we God i agri long hem, oli stap joen long ol faet mo long ol rabis fasin blong kilim i ded ol man blong narafala kala no laen?—Eksodas 20:13; Aesea 2:2-4; Jon 13:34, 35.

10. ?Tede, hu ol man we oli stap soemaot trufala Kristin lav, long olgeta ples long wol? ?Hu ol man we oli no seraot from politik, kala blong man, no fasin blong tinghae long kantri blong olgeta bitim ol narafala kantri? ?Hu olgeta we oli no leftemap ol lida blong wol? ?Hu olgeta we oli no stilim mo spolem ol man blong kasem mane mo haeples? ?Hu olgeta we oli no joen long ol faet? ?Hu olgeta we oli tekem wan nem we i stanap long Baebol? ?Hu olgeta we oli talemaot rul blong Kingdom blong God olsem rod blong winim ol problem blong man blong olwe?—Aesea 43:10, 12.

?Yu Yu Bin Tingbaot Samtaem? Ol Ansa We Baebol i Givim

Hemia sam long ol vas we oli stap wetem ol kwestin long pej 20:

1. “Long taem blong lafet, olgeta oli laekem tumas blong go sidaon long ples blong haeman. Mo insaed long ol haos blong prea, oli wantem go sidaon long ol nambawan ples. Mo long open ples, oli wantem tumas blong ol man oli leftemap han long olgeta, mo blong oli singaot olgeta se ‘Tija.’ Be bambae yufala i no letem ol man oli singaot yufala se ‘Tija,’ from we yufala i gat wan tija nomo blong yufala, mo yufala evriwan i brata. Mo bambae yufala i no singaot man long wol ya se ‘Papa,’ from we yufala i gat wan Papa nomo blong yufala, we hem i stap long heven. Mo bambae yufala i no letem ol man oli singaot yufala se ‘Masta,’ from we yufala i gat wan Masta nomo blong yufala, we mi ya, mi Mesaea. Man we i haeman blong yufala, hem i mas kam man blong wok blong yufala. Man we hem nomo i leftemap hem blong i kam haeman, bambae God i mekem hem i stap daon. Be man we hem nomo i mekem hem i stap daon, bambae God i leftemap hem.”—Matyu 23:6-12.

2. “I nogud yufala i stap hivimap ol gudgudfala samting blong yufala long wol ya blong kam rijman. Long ples ya i gat kakros oli save kam kakae, mo rosta tu i save spolem ol samting. Mo i gat man blong stil we oli save brekem haos, blong oli stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting. Mo ol man blong stil oli no save kam brekem haos, blong oli stil. From we long ples ya we ol gudgudfala samting blong yu i stap, be tingting blong yu tu bambae i stap oltaem long ples ya.” (Matyu 6:19-21) “Ol rijman. Yufala tu i lesin long mi. I gud yufala i krae, i gud yufala i krakrae from ol trabol ya we bambae i kasem yufala. Long fes blong God, ol gudgudfala samting blong yufala, i olsem we oli rotin finis. Ol klos blong yufala, i olsem we ol kakros oli kakae finis. Ol mane blong yufala, ol gol mo selva ya, i olsem we oli rosta finis. Mo rosta ya bambae i olsem wan wetnes we i agensem yufala, we bambae i kakae bodi blong yufala olsem faea.”—Jemes 5:1-3.

3. “Tok blong Jeova i olsem: ‘Yufala i wetnes blong mi, yes, yufala i man blong wok blong mi we mi mi jusumaot, blong yufala i save, mo yufala i bilif long mi, mo yufala i kasem save we mi mi sem God ya.’ ” (Aesea 43:10) “Long ples ya Antiok, ol man afsaed oli givim wan nem long ol man blong Jisas, se oli Kristin man, mo hemia fastaem we nem ya i kamaot.”—Ol Wok 11:26.

4. “Yufala i talem tangkyu long Jeova. Yufala i singaot long nem blong hem. Yufala i talemaot ol wok blong hem long ol laen blong man. Yufala i talemaot samting ya: se ol man oli mas leftemap nem blong hem. . . . Samting ya, ol man oli talemaot long olgeta ples long wol.” (Aesea 12:4, 5) “Papa blong mifala we yu yu stap long heven, plis, yu mekem nem blong yu i tabu.”—Matyu 6:9, NW.

5. (a) “Taem yu pikinini yet, . . . yu savegud ol tok blong Baebol. Tok ya i save mekem yu yu waes, i save lidim yu long rod ya we God i stap yusum blong sevem olgeta we oli bilif long Jisas Kraes. Olgeta tok ya blong Baebol oli kamaot long God fastaem. . . . Ol tok ya i stret gud blong tijim ol man long ol trutok, mo blong blokem ol krangke tok. Mo i stretgud blong stretem ol krangke fasin, mo blong tijim ol man long ol stret fasin.” (2 Timote 3:15, 16) (b) “Sipos mifala, no wan enjel blong heven, no wanem man, bambae i talemaot wan gud nyus long yufala, we i narafala long hemia we mifala i talemaot finis long yufala bifo, be man ya i mas panis.”—Galesia 1:8.

6. “Yufala i mas gohed blong lukaot kingdom mo stret fasin blong hem fastaem. Ale, biaen bambae hem i givim olgeta narafala samting ya tu long yufala.” (Matyu 6:33, NW) “Ol kingdom blong wol ya oli kam aninit long paoa blong Hae God blong yumi, wetem Mesaea blong hem. Mo hem i holem nem blong king, we bambae i rul gogo i no save finis.”—Revelesen 11:15.

7. “ ‘Yu mas laekem Jeova we i God blong yu long olgeta tingting blong yu, mo long olgeta laef blong yu, mo long olgeta maen blong yu.’ Hemia loa ya we i hae moa long ol narafala loa, mo i nambawan blong folem. . . . ‘Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ . . . Tufala loa ya i stampa blong ol narafala Loa blong Moses, wetem ol tok blong ol profet tu.” (Matyu 22:37-40) “Frut blong speret, hemia lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem. Ol fasin olsem, i no gat loa we i save blokem olgeta.”—Galesia 5:22, 23, NW.

8. “Jisas i ansa, i se ‘Mi mi no king olsem ol king blong wol ya. Sipos mi king olsem ol king blong wol ya, bambae ol man blong mi oli save faet blong blokem olgeta ya we oli wantem putum mi long han blong ol lida ya blong ol man Isrel, be mi mi no king olsem.’ ”—Jon 18:36.

9. “Bambae yufala i no kilim man i ded.” (Eksodas 20:13) “Mi mi givim wan nyufala loa long yufala, se ‘Yufala i mas laeklaekem yufala.’ Olsem we mi mi laekem yufala, ale long sem fasin, yufala i mas laeklaekem yufala. Nao from we yufala i stap laeklaekem yufala, bambae olgeta man oli luksave se yufala i man blong mi.”—Jon 13:34, 35.

10. “Tok blong Jeova i olsem: ‘Yufala i wetnes blong mi, yes, yufala i man blong wok blong mi we mi mi jusumaot, blong yufala i save, mo yufala i bilif long mi, mo yufala i kasem save we mi mi sem God ya. . . . Taswe yufala i wetnes blong mi.’ Hemia nao toktok blong Jeova, ‘mo mi mi God.’ ”—Aesea 43:10, 12.