Ol Yangfala Oli Askem . . .

?I Gud Sipos Mi Joen Long Wan Tim Blong Spot?

WAN buk, nem blong hem Seventeen, i askem se: “?From wanem i gud blong joen long wan tim?” Buk ya i givim ansa long kwestin ya se: “Yu wok tugeta wetem samfala we oli gat semkaen tingting olsem yu, mo yufala i kam gudfala fren. Mo tu, yu lanem blong wok wetem narafala man, olsem fasin blong winim wan problem tugeta, rere blong jenisim tingting mo tingbaot narafala, mo olsem wanem blong agri wetem tingting blong narafala.”

Taswe i luk olsem se, taem ol yangfala oli plei long spot tugeta, i gat sam gudfala samting we i save kamaot from, olsem, oli haremgud mo oli mekem eksasaes.a Samfala oli talem tu se taem oli joen long tim blong plei spot, samting ya i mekem fasin blong olgeta i kam moa gud. Taswe, wan grup blong ol yangfala we oli plei besbol, oli yusum tok ya olsem stampa tingting blong olgeta se, “Gudfala Fasin, Strong Tingting, Stap Tru Long Narafala.”

Be, problem i stap se, plante taem i no gat ol gudfala fasin insaed long ol tim blong spot. Buk ya Kidsports i talem se: “Long sam spot, ol yangfala oli lanem blong tok swea, gyaman, faet, mekem narafala i fraet, mo spolem narafala.”

?Strong Blong Win Oltaem?

Buk ya Seventeen i talem stret se: “I gat wan saed blong spot we i nogud, hemia taem ol man oli traehad blong winim narafala oltaem.” Samting ya i go stret agensem tok blong Baebol se: “I nogud yumi tinghae tumas long yumi, no yumi traem agensem ol narafala blong winim olgeta long sam samting, no yumi stap jelas long narafala man.” (Galesia 5:​26, NW) I tru se tingting ya blong winim narafala long wan fasin we tufala i frengud mo we i no bitim mak, hem i save mekem wan pleplei i laef mo ol man oli glad. Be, wan tingting we i strong tumas blong win i save mekem fasin agens i kamaot, mo i save spolem gudfala fasin blong haremgud long pleplei.

Jon, wan yangfala we i bin plei futbol long haeskul bifo, i tingtingbak se: “Tija blong mifala long spot, hem i strong tumas; oltaem hem i stap singaot mo tok strong long mifala . . . Mi no moa wantem go tren nating. . . . Mi harem olsem se mi stap long wan rabis kalabus.” I tru se, i no olgeta tija blong spot we oli tok strong, be plante oli strong blong pulum ol yangfala blong traem winim narafala oltaem. Wan man blong raetem buk i talem se: “Plante man blong spot . . . oli kasem mak we glad we oli gat taem oli plei spot i jenis i kam wan tingting we oli mas win, we i olsem wan hevi baden long olgeta.” ?Wanem i save kamaot from?

Science News i givim ripot blong wan stadi we i soemaot se long wan tim blong futbol mo basketbol long skul, “12 pesen blong ol yangfala oli kasem tu long ol faef problem ya: tingting i trabol, problem long bodi, hadtaem blong blokem drag mo alkol, narafala i spolem olgeta long saed blong tingting mo bodi, mo oli no gat gud mak long skul.” Buk ya On the Mark, i tokbaot sem samting ya, i se: “Kolosap evri man we oli joen long ol tim blong spot, oli agri se i gat bigfala problem long saed blong drag long olgeta kaen spot.”

Brekem Ol Gudfala Fasin

Taem narafala i strong oltaem long wan yangfala blong fosem hem blong win long spot, samting ya i save mekem se hem i lego ol gudfala rul blong stretfasin mo fasin blong no gyaman. Buk ya Your Child in Sports i makem se: “Long olgeta spot tede, i no gat tingting nomo se i gud blong win, be stampa samting ya nao se yu mas win. Fasin blong lus i nogud, be i no hemia nomo, hem i nogud olgeta we man i no save fogivim yu from.”

Wan narafala samting we i stap kamaot hemia: Plante taem ol tija blong spot oli fosem ol yangfala we oli plei spot blong givim kil long ol narafala we oli plei agensem olgeta. Buk ya Psychology Today i talem se: “Blong pleigud long spot, yu mas gat raf fasin. Hemia nao tingting blong plante man blong spot, tija blong spot, mo ol man we oli kam lukluk spot.” Wan jampion blong futbol i tokbaot prapa fasin blong hem wan se, hem i “no stap tok strong, hem i tingbaot narafala, mo i gat fasin blong frengud wetem ol narafala.” Be taem hem i go plei, fasin blong hem i jenis fulwan. Hem i tokbaot fasin blong hem taem hem i stap plei, i se: “Mi raf mo mi nogud . . . mi no kaen mo mi no tingbaot narafala nating. Mi no moa kea nating long man we mi kilim hem.” Plante taem ol tija blong spot oli pusum ol man blong spot blong oli gat strongfala fasin olsem.

Baebol i pulum ol Kristin se: “Yufala i mas putum nyufala laef ya blong yufala olsem prapa klos blong yufala. Yufala i mas gat sore long ol man. Yufala i mas mekem i gud long ol man. Tingting blong yufala i mas stap daon. Yufala i mas kwaet man. Mo tingting blong yufala i mas longfala.” (Kolosi 3:​12) ?Yu ting se yu save gat ol fasin ya sipos oltaem wan man i tok strong long yu se yu mas mekem i soa, spolem, mo kilim narafala we i plei agensem yu? Wan yangfala we i gat 16 yia, nem blong hem Robert, i talem se: “Mi plei finis long ol tim blong spot. Long ol taem olsem, yu no kea nating se yu givim kil long narafala, tingting blong yu i strong blong win nomo.” Naoia we hem i wan Kristin we i baptaes finis, tingting blong hem i jenis. Hem i talem se: “Bambae mi neva gobak bakegen long samting ya.”

?Trenem Bodi No Kilim Bodi?

Yumi no mas fogetem wan narafala samting tu, hemia ol kil long bodi. I tru se, yumi save kasem kil taem yumi plei spot blong haremgud nomo wetem ol fren blong yumi. Be, ol denja oli kam moa nogud taem ol tija oli traem fosem ol yangfala blong plei olsem ol jampion blong spot.

Buk ya Your Child in Sports i talem se: “Ol jampion blong spot, oli save kasem kil tu. Be, olgeta ya oli gat gudhan blong plei, bodi blong olgeta i tren finis, mo oli bigman we oli rere blong kasem kil from we oli kasem mane blong mekem olsem. Antap moa, oli kasem beswan, spesel kaen trening, oli gat ol spesel samting we oli nidim blong plei, mo tu, oli kasem spesel kea blong dokta mo spesel meresin. . . . Ol pikinini long skul oli no gat ol samting ya.” Baebol i talem long ol Kristin se oli mas ‘givim bodi blong olgeta i go olsem wan sakrifaes we i laef, i tabu, mo we God i glad long hem.’ (Rom 12:⁠1) !Ating i moagud we yu tingtinggud fastaem bifo we yu kasem kil long bodi blong yu blong nating nomo!

Sam Narafala Samting Blong Tingbaot

Ating yumi gat tingting ya se spot we yumi joen long hem i no mekem tumas problem long bodi blong yumi. Nating se i olsem, hem i stap karem fulap taem blong yumi. Olgeta taem we yu stap tren i mekem se yu no moa stap joen plante wetem famle blong yu, be tu, i mekem se yu no moa spenem tumas taem long stadi mo homwok blong yu. Buk ya Science News, i mekem ripot ya se ol yangfala long skul we oli joen long spot, “oli no kasem gudfala mak long skul wok blong olgeta” olsem ol studen we oli joen long ol narafala samting afta long skul. Samting we i impoten moa, maet yu faenem se taem yu plei long wan tim i hadwok blong folem ol samting we Baebol i talem se “oli impoten moa”​—hemia ol samting long saed blong speret. (Filipae 1:​10) Askem long yu wan se, ‘?Sipos mi joen long wan tim bambae mi gat jans yet blong go long olgeta miting, mo bambae mi gohed blong mekemgud wok blong mi blong prij?’

Skelemgud tu, wanem samting i save kamaot sipos yu spenem tumas taem wetem ol yangfala mo ol bigman we oli no gat sem tingting olsem yu long saed blong stret fasin, klin toktok, mo fasin blong winim narafala. Yes, Baebol i talem finis se: “Ol rabis fren oli save spolem ol gudfala fasin.” (1 Korin 15:​33, NW) Eksampel, tingbaot smol toktok we i stap long nyuspepa ya The New York Times: “Rum blong jenis blong ol man blong plei spot . . . i ples we ol man oli tokbaot bodi blong ol woman wetem sam rabis pija long saed blong seks, mo oli tok flas blong soemaot se oli winim plante woman, mo oli tokplei long saed blong ol fasin blong kilim woman.” Sipos yu jusum blong stap long wan ples olsem, ?bambae yu save stap strong long saed blong speret?​—Skelem wetem Jemes 3:⁠18.

Mekem Wan Waes Disisen

?Yu gat tingting ya blong joen long wan tim blong spot? Ating ol samting we yumi tokbaot finis, oli save halpem yu blong tingtinggud bifo we yu mekem wan disisen. Tingbaot sipos disisen blong yu bambae i spolem tingting blong sam narafala. (1 Korin 10:​24, 29, 32) I tru se, yumi no save putumap sam strongfala rul long saed ya, from we laef blong ol man i no sem mak long olgeta ples blong wol. Long samfala ples, ol studen oli mas joen long spot. Be, sipos tingting blong yu i hafhaf long saed ya, toktok wetem papa mama blong yu no wetem wan narafala Kristin we i bigman finis.

Plante Kristin yangfala oli mekem disisen ya blong no plei nating long wan tim blong spot. !Samting ya i no isi sipos yu yu gud long spot mo yu laekem spot tu! Maet ol tija long skul, ol tija blong spot, mo papa mama oli pusum yu blong joen, mo samting ya tu i save mekem yu yu harem nogud. Yangfala Jimmy i talem se: “Mi faenem se mi mas fosem mi oltaem blong no plei. Papa blong mi, we i no stap long trutok, hem i wan jampion blong spot taem hem i stap long haeskul bifo. Samtaem i hadwok long mi blong no joen long wan tim.” Nating se i olsem, ol papa mama we oli stap long trutok mo sam narafala olfala Kristin long kongregesen,b oli save givhan bigwan long yu blong folem disisen we yu bin mekem. Jimmy i talem se: “Mi tangkyu bigwan long mama blong mi. Samtaem tingting blong mi i foldaon from ol toktok we man i talem blong pusum mi blong joen long spot. Be, oltaem mama i stap blong mekem mi mi tingbaot ol trufala mak we mi wantem kasem long laef blong mi.”

I tru se, taem yu joen long wan tim blong spot, samting ya i save halpem yu blong wok tugeta wetem narafala mo lan blong winim sam problem tugeta. Be, i gat fulap jans blong lanem ol samting ya taem yu wok wetem ol narafala insaed long Kristin kongregesen. (Skelem wetem Efesas 4:​16.) Maet ol tim blong spot oli mekem yumi glad, be yumi no nid blong joen long wan tim olsem blong haremgud. I gat samfala spot we yumi save pleplei wetem ol narafala Kristin fren long haos blong olgeta, no long sanbij. Taem famle i goaot tugeta, hemia wan jans tu blong plei tugeta. Greg, we i gat 16 yia i talem se: “I moagud taem yu pleplei wetem ol man long kongregesen blong yu. !Yufala i jes plei tugeta nomo blong haremgud, mo tu, yu stap wetem ol fren blong yu!”

I tru se, taem yu plei spot long haos nomo no long sanbij, maet yu no kasem sem filing we yu kasem taem yu plei long wan tim we i win. Be, no fogetem se “sipos yu stap mekem bodi blong yu i strong, hemia i gud lelebet. Be sipos yu stap traehad oltaem blong mekem ol fasin we God i wantem, hemia i gud tumas.” (1 Timote 4:⁠8) !Sipos yu stap onagud long God, long tingting blong God yu yu rili wan man blong win ya!

[Ol Futnot]

[Tok Blong Makem Poen Long Pej 24]

“Mifala i gat wan tija blong spot we i gat strong fasin. Oltaem nomo hem i stap singaot mo tok strong long mifala . . . Mi no moa wantem blong go tren.”

[Tok Blong Pija Long Pej 25]

Plante taem, ol tija blong spot oli pusum ol yangfala blong win —nating se oli givim kil long narafala