Paradaes We i No Moa Gat Trabol Long Hem—?I Wan Drim Nomo?

WAN man we i wokbaot blong lukluk ol ples i talem se: “!Ples ya i kwaetgud!” I tru, naesfala bus antap long Lugun blong Redfis long Aedao, Yunaeted Stet, i kwaet we i kwaet. Man ya i gohed i se: “Hemia paradaes long tingting blong mi.”

Bigfala san i mekem solwora i saengud long saot blong aelan blong Saepras, long Mediterenian Si. Ol smosmol wef oli stap kamsoa. Antap long wan bigfala ston kolosap long solwora ya, wan man i stap sidaon long wan restoron, mo i stap lukluk ples ya. Hem i talem se: “!Hemia nao paradaes!”

Plante blong yumi i haremgud blong tingbaot sam naesfala ples olsem, we yumi bin luk olgeta. Be ol man we oli laef long ol ples ya we oli luk olsem paradaes, oli save se ol ples ya tu oli stap kasem plante hadtaem mo trabol: ol bus faea long ol bigfala Hil blong Roki, ol man oli sakem doti long solwora, we i spolem ol fis mo ol man tu. Antap long ol samting ya, i gat ol rao mo faet we oli stap kamaot bitwin long ol kantri, mo bitwin long ol velej.

?Paradaes i Olsem Wanem?

Taem yu harem tok ya paradaes, ?yu yu tingbaot wanem? Faswan mining blong tok ya we The New Shorter Oxford English Dictionary i talem, hemia se: “Garen blong Iden we Jen[esis] 2, 3 i tokbaot.” Faswan buk blong Baebol i eksplenem se God i putum faswan man, Adam, long ples ya. Long faswan paradaes ya, i gat fulap tri we “oli gud tumas blong luk, mo ol frut blong olgeta oli gud tumas blong kakae.”—Jenesis 2:9.

Namba tu mining we diksonari ya i givim long “paradaes,” hemia, “Heven, we ol Kristin mo Muslim oli bilif long hem.” Be hem i gohed, i se: “Hemia i no wan trufala samting, hem i wan samting we ol naesfala vas nomo oli tokbaot.” Be, long tingting blong tufala man ya antap we oli wokbaot blong lukluk ol ples, paradaes i olsem namba tri mining we diksonari ya i talem, hemia se, “wan ples we i naes tumas mo i mekem man i haremgud.”

Wan haeman blong gavman long Engglan afta long yia 1500, Masta Thomas More, i raetem wan buk we nem blong hem se, Utopia. Long buk ya, hem i tokbaot wan kantri we i stap long tingting blong hem nomo. Ol loa blong kantri ya, gavman blong hem, mo ol fasin blong ol man blong hem, oli stretgud olgeta. Ol tok long buk ya oli longwe tumas long samting we i tru, taswe Webster’s New Collegiate Dictionary i talem wan mining blong “Utopia” se, “wan plan blong mekem laef blong ol man i kamgud, be plan ya i no wok.”

Ol man blong Pipols Tempel, wan narakaen grup we oli folem man ya, Jim Jones, oli bin tingting se Utopia i wan klia ples long dakbus blong Gyana. Sore tumas, long 1978, 900 blong olgeta oli ded, long ples ya we oli bin tingting blong mekem i kam paradaes. !Hemia i olsem wan rabis drim nomo! From samting ya, ol man oli joenem tingting long saed blong paradaes wetem ol krangke grup blong skul, we ol fasin blong olgeta oli mekem ol man oli sek mo wari.

Long wol ya we i fulap long raf fasin mo fasin blong brekem loa, we ol bigfala sik oli kasem ol bigman mo ol pikinini tu, mo we ol man oli seraot from oli no laeklaekem olgeta mo from oli blong ol defren skul, plante ples we oli naes tumas oli fulap long ol nogud fasin. !Yumi no sapraes we ol man oli ting se paradaes i wan drim nomo! Be sam man oli gohed yet blong traem faenem no mekem wan paradaes blong olgeta nomo. ?Olsem wanem? ?Oli bin faenem paradaes?