Baebol i Talem Wanem

?Bambae Wol i Save Lus From Wan Sta We i Foldaon Long Skae?

LONG Maj 12, 1998, ol bigfala toktok long niuspepa, televisin mo Internet oli talem wan nius we i mekem ol man oli fraet, se: “Wan asteroida we i bigfala olsem 1.5 kilometa bambae i pas klosap long Wol, mo maet hem i bangem wol ya.” Ol man blong sayens mo plante narafala man oli wokhad blong traem save sipos samting ya bambae i rili hapen. Smoltaem biaen, ol man blong lukluk ol sta oli talem se oli mestem, oli se asteroid ya bambae i no bangem wol.

I gat plante tumas toktok long saed blong stori ya, we i mekem yumi luksave wan samting long saed blong ol man. Niuspepa ya, U. S. News & World Report, i talem se: “Mifala i sapraes blong luk se, nating sipos nius ya i minim bigfala denja long ol man, be i olsem se plante man oli no bin sapraes long hem i bitim mak. Ten yia bifo, ol man oli neva tingting blong luk sipos wan asteroid i save foldaon long Wol. Mo oli neva tingbaot tu, blong mekem plan blong stap sef sipos wan samting olsem i kamaot. Be tede, ol man blong sayens mo sam man blong politik oli tingbaot samting ya olsem wan denja we i rili save hapen, nating se maet i no sua tumas.”

Sam man blong lukluk ol sta oli bilif se i gat raonabaot 2,000 bigfala ston long skae we oli bigwan inaf blong spolemgud wol. Ol ston ya oli stap pas klosap long wol mo ating sam oli save bangem hem. Ol man blong sayens oli talem se sipos wan long ol ston ya i bangem wol, nating sipos hem i smol nomo, be paoa blong hem bambae i sem mak olsem we plante nyuklia bom oli bosta wantaem nomo. Risal blong samting ya bambae i nogud bitim mak, i save mekem se olgeta man mo olgeta anamol oli ded.

Plante taem, ol man we oli talemaot sam nogud trabol olsem oli no tingbaot tingting blong Man we i Wokem wol, Jeova God. (Ol Sam 8:3; Ol Proveb 8:27) Baebol i talem klia wanem stamba tingting mo plan blong God long saed blong wol mo ol man. ?God i save letem sam ston we oli foldaon long skae oli spolem wol blong yumi?

God i Bos Long Heven Mo Wol

Jeova i Bigfala Man we i Wokem wol mo ol sta, taswe i stret nomo blong talem se hem i bos long paoa we i mekem se ol sta oli muf long skae. Waes King Solomon i talem se ‘wetem fasin luksave, God i putum skae long prapa ples blong hem.’ (Ol Proveb 3:19) Profet Jeremaea tu i talem se God, “long save blong hem, hem i putum skae long ples blong hem.”—Jeremaea 51:15.

Jeova i stanemap ol loa mo ol paoa we oli mekem se ol samting long skae olsem ol sta, ol planet, ol komet mo ol asteroid oli save muf. (Aesea 40:26) Be, hem i letem ol sta mo ol planet oli bon mo oli gru long prapa rod blong olgeta, mo hem i no nid blong stap wajem olgeta oltaem blong stretem rod blong olgeta. Samting ya i minim se samtaem, i gat sam bigfala aksiden long skae, we oli save mekem se man i fraet tumas. Wan aksiden olsem i kamaot i no longtaem i pas, long Julae 1994. Long taem ya, sam pis ston blong wan komet we nem blong hem Shoemaker-Levy 9, oli bangem planet ya Jupita.

I gat sam pruf long graon we oli soem se, long taem we man i no stap yet long wol, sam bigbigfala ston oli bin foldaon long skae, oli bangem wol. Be, ?wan aksiden olsem i save kamaot long planet blong yumi we i gat plante man long hem? ?Bambae wanem samting i hapen sipos wan asteroid we i bigfala olsem 1.5 kilometa, i bangem wol? Jack Hills, wan man blong lukluk ol sta, i talem se sipos ston ya i foldaon, bambae hem i bosta wetem wan paoa we i antap plante milyan taem long paoa blong nyuklia bom we i bosta long Hirosima. Sipos asteroid i foldaon long solwota, ale sam bigbigfala wef bambae oli kavremap olgeta graon klosap long solwota. Hills i talem se: “Long ples we bifo i gat ol taon, bambae i gat sofmad nomo.” Tingting we i moa nogud, i bitim ol narafala, hemia tingting se wan aksiden olsem i save kilim i ded olgeta man long wol. ?Olsem wanem nogud fiuja ya we ol man oli talemaot i joen wetem stamba tingting blong Man ya we i wokem yumi? Baebol i soem se wol blong yumi i gat wan spesel ples long stamba tingting blong Jeova.

God i Wantem Se Wol Blong Yumi i Folem Wan Plan

Long saed blong planet blong yumi, man blong raetem Ol Sam i talem se: “Heven i ples blong Hae God nomo, be wol ya, hem i givim long man.” (Ol Sam 115:16) Aesea i tokbaot Jeova olsem “[Man] we i mekem wol ya, mo i mekem i strong, blong i save stap longtaem. Taem hem i mekem, hem i no mekem blong i ples nating nomo, hem i mekem blong man i save stap long hem.” (Aesea 45:18) Wol, hemia presen we Jeova i mekem long ol man. Man blong wokem yumi i gat tingting se ol man we oli obei long hem bambae oli laef gogo i no save finis, taswe wol tu bambae i stap olsem haos blong ol man gogo i no save finis. Ol Sam 104:5, i givim promes ya long yumi se: “[Jeova i] putum wol ya i stap strong long fandesen blong hem, we bambae hem i no save muf nating.”

I tru se, God i letem sam bigfala disasta oli kamaot long wol blong yumi, mo bigfala namba blong man oli ded from ol samting ya. Ating sam long ol disasta ya,—olsem ol faet, sot long kakae, strongfala sik—oli kamaot from fasin griri, krangke fasin mo raf fasin blong ol man nomo. (Prija 8:9) Sam narafala disasta, olsem ol etkwek, volkeno i faerap, wota i ron bigwan, mo ol hariken, oli kamaot from weta we plante taem ol man oli no rili kasem save long hem. Fastaem, long plan blong God, ol man oli stret olgeta. Be naoia, oli sinman, oli no moa stret olgeta. From samting ya, yumi no save tingting se God bambae i protektem olgeta man wanwan taem i gat sam disasta olsem.

Be nating, Jeova i neva letem wan disasta i spolem ol man go kasem we klosap evri man i lus olgeta. Stat long taem we God i wokem ol man i kam kasem naoia, histri i no tokbaot eni trabol no eni disasta we i putum laef blong olgeta man long wol i stap long denja.b

God i Promes Se Famle Blong Man Bambae i No Save Lus Evriwan

Taem God i wokem faswan man, hem i wantem se oli ‘stap long olgeta ples long wol, mo oli mekem evri samting long wol ya i stap aninit long han blong olgeta.’ (Jenesis 1:28; 9:1) Hem i promes se “ol stret man bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:9, 11, 22, 29) Long saed blong ol promes ya, Jeova i talem bakegen se: ‘Tok blong mi bambae i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.’—Aesea 46:10; 55:11; Ol Sam 135:6.

Baebol i no talem se bambae i neva gat wan aksiden long skae we i karem sam trabol long wol. Be, yumi save stap sua se Jeova bambae i no letem disasta olsem i spolem ol plan blong hem long saed blong wol mo famle blong ol man. !From ol promes blong Baebol, yumi save bilif fulwan se ol man bambae oli laef long wol ya gogo i no save finis!—Prija 1:4; 2 Pita 3:13.

[Futnot]