!Mi Kalabus Long Saebiria!

VASILY KALIN I TALEM STORI YA

Traem tingbaot stori ya. I gat plante bom oli stap foldaon raonabaot long yu, be yu luk wan man i stap kwaet, we i ridim Baebol nomo. Ating yu wantem save, ?weswe man ya i stap kwaet olsemia? I gat 56 yia i pas finis, papa blong mi i bin luk samting ya.

SAMTING ya i hapen long Yukren long Julae 1942, taem Nambatu Bigfala Faet Blong Wol i stap kasem big blong hem. Ol ami blong Jemani oli pastru long vilej blong papa blong mi, Vilshanitsa, taswe hem i stap long haos blong wan olfala man. Ol bom oli stap foldaon raonabaot, be olfala man ya i stap klosap long faea, i kukum sam kon, mo i stap ridim Baebol.

Mi mi bon faef yia biaen, klosap long naesfala taon ya blong Ivano-Frankivs’k, long Wes Yukren. Long taem ya, hem i wan haf blong Soviet Yunion. Biaen, papa blong mi i storebaot dei ya we hem i mitim wan Witnes blong Jeova. Mo tu, hem i talemaot ol rabis samting we oli kamaot long taem blong faet. Ol man oli taed tumas, mo oli no save from wanem faet ya i kamaot, nao plante oli askem se, ‘?From wanem i no gat stret fasin? ?From wanem plante taosen man oli ded from faet ya? ?From wanem God i letem samting ya i hapen? ?From wanem? ?From wanem? ?From wanem?’

Hemia olkaen kwestin we Papa i bin tokbaot wetem olfala man ya. Ale, man ya i openem Baebol, i ridim plante defren vas, mo i givim wan ansa long evri kwestin we Papa i trabol long hem. Man ya i eksplenem se God i gat wan plan, mo long dei ya we hem i makem finis, bambae hem i stopem ol faet, mo i mekem wol i kam wan naesfala paradaes.—Ol Sam 46:9; Aesea 2:4; Revelesen 21:3, 4.

Kwiktaem nomo Papa i kambak long haos, i se: “!Man, wan taem nomo mi storeyan wetem wan Witnes blong Jeova, nao hem i openem tufala ae blong mi! !Mi mi faenemaot trutok!” Papa i talem se, nating se oltaem bifo hem i stap go long Katolik Jos, be ol pris oli neva save ansa long ol kwestin we hem i askem. Ale, Papa i stat stadi long Baebol, mo mama tu wantaem. Mo tu, tufala i stap tijim trifala pikinini blong tufala—sista blong mi, we i gat 2 yia, mo tufala brata blong mi, we oli gat 7 mo 11 yia. Sot taem biaen, wan bom i spolem haos blong olgeta. I gat wan rum nomo i stap, mo oli stap laef long rum ya.

Long famle blong hem, mama i gat sikis sista, mo wan brata. Mama i nambatri long olgeta. Papa blong hem i wan rijman we i gat paoa mo haenem, mo hem i flas from. Taswe, taem mama i stat stadi, ol memba blong famle oli agensem niufala bilif blong tufala. Be biaen, plante man blong famle ya we bifo oli agens, nao oli no moa wosip long ol tabu pija we oli kolem ikon, mo oli akseptem trutok blong Baebol.

Ol pris oli pulum ol man blong agensem ol Witnes. Taswe, ol man blong ples ya oli kam smasem ol windo blong haos, mo oli talem se bambae oli mekem nogud long olgeta. Be papa mama oli gohed blong stadi long Baebol. Mekem se taem mi mi bon long 1947, ful famle blong mi i stap wosip long Jeova wetem spirit mo trutok.—Jon 4:24, NW.

Mifala i Go Kalabus

Long Epril 8, 1951, mi gat fo yia nomo, be ol samting we oli hapen oli stapgud long memori blong mi. Ol soldia wetem ol dog blong olgeta oli kam long haos blong mifala. Oli soem wan leta we i givim oda blong tekemaot mifala i go farawe long kalabus, mo oli stat lukluk olbaot long haos blong mifala. Ol soldia wetem bigfala masket mo ol dog oli stap long fored blong doa. Sam narafala oli sidaon, oli stap wet long mifala. Mifala i hareap from we mifala i gat tu aoa nomo blong mekemrere bifo we mifala i livim ples. Mi no kasem save wanem i stap hapen, ale mi krae.

Oli givim wan pepa long papa mama blong tufala i saenem hem. Sipos tufala i saen, oli minim se oli no moa Witnes blong Jeova, mo bambae oli neva joen long skul ya bakegen. Nao bambae oli letem tufala i stap laef long haos mo kantri blong olgeta. Nao papa i talem klia, se: “Mi trastem fulwan God blong mifala. Long wanem ples we yufala i tekem mifala i go, bambae Jeova God i stap wetem mifala.”

Haeman blong ami i talem se: “Tingbaot famle blong yu, yu gat pikinini. Long ples ya we yu go long hem, i no blong mekem turis. Yu go farawe long not, long wan ples we sno i stap oltaem, ol bea oli stap wokbaot long rod.”

Long taem ya, tok ya “Saebiria” i wan defren tok we i mekem ol man oli fraet. Be mifala i gat lav mo strong bilif long Jeova, mo filing ya i bitim fraet we mifala i gat. Oli putum olting blong mifala long wan kat mo oli tekem mifala i go long taon. Noa oli putum mifala i go long wan bigfala tren blong karem kago, wetem 20 no 30 narafala famle. Ale, mifala i statem trip ya blong go long dip “taiga,” long bigfala wael ples ya blong Saebiria.

Long ol stesen long rod, mifala i save luk ol saen we i gat long narafala tren, se: “Tren Blong Ol Witnes Blong Jeova.” Hemia i wan fasin blong givim wan witnes, from we plante man nao oli save se gavman i sanemaot plante taosen famle blong Witnes i go long ol ples long not mo is blong kantri.

Plante man oli sagevud se long Epril 1951, oli holem ol Witnes blong Jeova mo oli sakemaot olgeta long kantri. Walter Kolarz, wan man blong raetem histri, i tokbaot samting ya long buk blong hem Religion in the Soviet Union, i se: “Hemia i no minim en blong ol “Witnes” long Rasia, be long histri blong olgeta oli statem wan niufala fasin blong prij long ol narafala man. Taem oli stop smol long ol stesen long rod blong kalabus, oli traehad blong talemaot bilif blong olgeta. Taem Soviet Gavman i sakemaot olgeta i go farawe, hem i givhan bigwan long olgeta blong talemaot bilif blong olgeta long evri ples. Bifo ol “Witnes” oli no gat raet blong aot long smol vilej blong olgeta, be afta oli save talemaot bilif ya long ol ples we oli muf i go long hem, ol rabis kalabus ya we oli go wok long hem.”

Laki se famle blong mi i save karem sam kakae—flaoa, kon, mo bin. Mo tu, oli letem bubu blong mi i kilim wan pig i ded, mekem se mifala i serem sam kakae wetem sam narafala Witnes. Taem tren ya i stap go, mifala i stap singsing wetem fulhat blong mifala. Jeova i givim paoa long mifala blong fesem traem ya.—Ol Proveb 18:10.

Mifala i mekem wan trep blong tri wik tru long Rasia, blong kam long Saebiria. Ples ya i kolkol mo i gat wanwan man nomo long hem. Oli karem mifala i go long Toreya stesen, long eria blong Chunsk, distrik blong Irkutsk. Biaen, oli karem mifala i go dip insaed long flat ples ya “taiga,” go kasem wan smol vilej. Ol pepa we oli givim long mifala oli talem se mifala i mas “stap long ples ya long ful laef” blong mifala. Olting blong 15 famle oli naf blong stap long wan smol kat blong glis long sno, mo wan trakta i pulum hem tru long sofmad, go kasem ol barak. Wan barak i olsem wan longfala rum we i no gat wol blong seraotem hem, mo i gat klosap 20 famle we oli stap long olgeta barak ya. Bifo we mifala i kam, gavman i talem long olgeta man blong ples ya se ol Witnes blong Jeova oli gat raf fasin. Taswe, ol man ya oli fraet long mifala, mo oli no wantem mitim mifala.

Wok Long Kalabus

Ol Witnes blong Jeova oli katem tri, be wok ya i had we i had. Mifala i mas mekem evri samting wetem han blong mifala nomo—katem ol pis wud wetem wan so, pulum olgeta long wan kat we hos i pulum, mo biaen, karem olgeta i go long wan tren. Mo tu i gat fulap smol flae we oli mekem se wok ya i had bitim mak. Papa blong mi i safa tumas. Bodi blong hem i solap, mo hem i stap prea dip long Jeova blong i save fesem hadtaem ya. Be nating se i had tumas, klosap evri Witnes blong Jeova i stanap strong long bilif blong hem.

I no longtaem, mifala i muf i go long wan taon we bifo i wan kalabus, nem blong hem Irkutsk. Long taon ya, mifala i wok long wan faktri blong wokem brik. Wetem prapa han blong mifala, mifala i mas tekemaot ol brik long oven we i hot tumas. Mo oltaem, oli givim oda long mifala blong wokem plante moa brik, mekem se ol pikinini oli mas givhan long papa mama blong kasem mak ya. Mifala i stap tingbaot ol man Isrel we oli wok kalabus long Ijip blong bifo.—Eksodas 5:9-16.

Nao i klia se ol Witnes oli wokhad mo oli stret man, oli no “enemi blong ol man,” olsem oli bin talem. Ol man oli luksave finis se i no gat wan Witnes we i tok nogud long gavman, mo i no gat wan Witnes we i faet agensem ol disisen we ol man we oli gat paoa oli mekem. Biaen, plante man oli laekem ol bilif blong mifala tu.

Laef Blong Mifala Long Saed Blong Spirit

Plante taem bakegen, oli jekem olgeta samting we ol Witnes oli gat—bifo we oli go long kalabus, long rod, mo long ples blong kalabus tu. Be nating, plante blong mifala i haedem ol magasin ya Wajtaoa mo sam Baebol tu. Biaen, oli mekem kopi blong buk ya long han, mo long narafala rod tu. Evri taem, ol Kristin oli mekem miting blong olgeta long wan barak. Taem komanda blong barak ya i kam mo i harem we mifala i stap singsing, hem i givim oda blong no moa singsing. Ale, mifala i stop. Be taem hem i go long nekis barak, mifala i stat singsing bakegen. Oli no save blokem mifala.

Mifala i neva stop blong prij tu. Ol Witnes oli stap toktok wetem evri man, long evri ples. Plante taem, ol brata blong mi mo papa mama blong mi, olgeta oli talem long mi olsem wanem oli bin serem trutok blong Baebol wetem ol narafala. Long rod ya, trutok blong Baebol i tajem hat blong plante man we oli stret. Nao, long ol yia afta 1950, oli stap talemaot Kingdom blong God long Irkutsk mo raonabaot long taon ya.

Fastaem, ol man oli tokbaot ol Witnes olsem enemi blong politik blong gavman. Be biaen, oli talem klia se mifala i wan skul nomo. Nomata, oli traehad blong blokem wok blong mifala. Taswe, blong stadi Baebol long fasin haed, mifala i joen wetem tu no tri famle nomo. Be wan dei long Febuwari 1952, long eli moning, oli faenemaot mifala. Ale, oli holem ten Witnes long kalabus, mo oli sanem ol narafala i go long defdefren ples. Oli sanem famle blong mi i go long vilej ya Iskra, we i gat raonabaot wan handred man oli stap laef long hem. Vilej ya i stap 30 kilometa longwe long taon ya Irkutsk.

Stanap Strong Taem Ol Samting Oli Jenis

Mifala i sapraes blong luk se ol man we oli lidim vilej ya oli glad blong welkamem mifala. Olgeta man blong vilej ya oli kaen mo oli gat gudfala fasin—plante blong olgeta oli kamaot long haos blong olgeta blong halpem mifala. Mifala i nambatri famle we i stap long smol rum ya, wan rum we evri saed i longfala olsem 17 mita. Mifala i yusum karsin laet nomo.

Long nekis moning, i gat wan vot. Papa mama blong mi oli talem se oli bin vot finis, long Kingdom blong God. Be ol man oli no kasem save mining blong samting ya. Ale, olgeta oli holem ol bigfala man blong famle blong mi long fuldei. Biaen, taem plante man oli askem kwestin long saed blong bilif blong mifala, famle blong mi i gat jans blong talemaot se Kingdom blong God i wan hop nomo we ol man oli gat.

Long fo yia we mifala i stap laef long vilej ya Iskra, i no gat narafala Witnes we mifala i save joen wetem olgeta. Blong livim vilej ya, mifala i mas kasem wan spesel pepa we i kamaot long komanda. Be i no hapen plante taem, from we hemia stamba risen from wanem oli sanem mifala i go farawe olsem: mifala i no mas joen wetem ol narafala. Be oltaem, ol Witnes oli traehad blong mitim ol narafala Witnes, blong serem evri niufala kakae long saed blong spirit we oli kasem wetem olgeta.

Afta we Stalin i ded long 1953, ol Witnes we oli mas stap 25 yia long kalabus, oli mekem panis ya i kamdaon long 10 yia nomo. Ol presina long Saebiria oli no moa nidim wan spesel pepa blong go aotsaed long vilej. Be gavman i stat bakegen blong holem evri Witnes we i gat wan Baebol mo sam buk blong eksplenem Baebol. Oli wokem sam spesel kamp blong ol Witnes, mo i gat raonabaot 400 brata mo 200 sista we oli stap long ol kamp ya, klosap long Irkutsk.

Olgeta Witnes blong Jeova long fulwol oli save se long Soviet Yunion bifo, gavman i agensem strong mifala. Ale, bitwin medel blong 1956 mo Febuwari 1957, long fulwol ol brata blong ol 199 distrik asembli oli mekem wan petisen, mekem se 462,936 man oli agri blong saenem mo sanem petisen ya i go long praem minista blong Soviet, Nikolay A. Bulganin. Hemia nao sam samting we mifala i askem long petisen ya: blong mifala i stap fri mo blong “oli letem mifala i prentem magasin ya Wajtaoa long ol lanwis blong Rasia, Yukren mo ol narafala lanwis we mifala i nidim, mo tu ol narafala buk blong eksplenem Baebol we ol witnes blong Jeova oli stap yusum raonabaot long wol.”

Long semtaem, oli sanem famle blong mi i go long vilej ya Khudyakovo, klosap 20 kilometa longwe long Irkutsk. Mifala i laef long ples ya seven yia. Nao long 1960, brata blong mi Fyodor i go stap long Irkutsk, mo nekis yia, bigfala brata blong mi i mared, mo sista blong mi tu i muf i go. Biaen, long 1962, oli holem Fyodor i go long kalabus from we hem i stap prij.

Gruap Long Saed Blong Spirit

Taem mifala i aot long vilej ya Khudyakovo, mifala i mas wokbaot samwe long 20 kilometa blong mitim sam narafala man blong stadi Baebol wetem olgeta. Taswe, mifala i plan blong muf i go long Irkutsk, blong stap klosap long ol narafala Witnes. Be, jif blong vilej ya we mifala i laef long hem, hem i traehad blong blokem mifala. Ale, taem i pas, gogo man ya i kam moa kaen long mifala, i no moa agensem mifala, mo i letem mifala i go laef long vilej ya Pivovarikha, we i stap ten kilometa longwe long Irkutsk. I gat wan kongregesena blong ol Witnes blong Jeova long ples ya. Mi statem wan niufala laef. Long Pivovarikha, i gat Buk Stadi blong Kongregesen mo ol brata oli stap lukaot long ol wok long saed blong spirit. !Mi haremgud tumas!

Long taem ya mi stap lavem tumas trutok blong Baebol, mo mi wantem tekem baptaes. Ale, long Ogis 1965, mi tekem baptaes long smol Olkhe Reva, we plante niufala Witnes oli baptaes long hem long taem ya. Long lukluk blong ol man we oli jes pas, i luk olsem se mifala i mekem wan smol kakae, mo i swim long reva. Smoltaem biaen, mi kasem faswan wok blong mi long kongregesen, olsem elda we i lukaot long Tiokratik Skul. Biaen, long Novemba 1965, mifala i glad tumas taem Fyodor i kamaot long kalabus.

Olsem Wanem Wok i Gohedgud

Long 1965, oli joenem olgeta presina tugeta, mo oli talem long olgeta se naoia, oli fri, oli save go long eniples. Nao taem blong “stap long ples ya long ful laef” blong mifala, hem i finis. !Mifala i haremgud tumas! Mifala plante i lego ples ya, be sam oli tekem disisen blong stap long ples ya, from we Jeova i bin blesem mifala, mo i bin sapotem wok blong mifala long ples ya long saed blong spirit. Plante blong olgeta oli gat pikinini, mo oli gat smol bubu blong olgeta we oli stap laef yet long ples ya Saebiria kasem naoia. Naoia ples ya i no moa mekem olgeta i fraet tumas.

Long 1967, mi mitim Maria, wan gel we famle blong hem tu i mas lego Yukren blong go long kalabus long Saebiria. Taem mitufala i yang yet, mitufala i bin laef long Vilshanitsa long Yukren. Mitufala i mared long 1968, mo mitufala i gat wan pikinini boe, Yaroslav, mo biaen wan pikinini gel, nem blong hem Oksana.

Mifala i stap yusum taem blong berem dedman, mo mared, blong kampani wetem olgeta we oli laekem ol samting long saed blong spirit. Hemia wan jans tu blong eksplenem ol trutok blong Baebol long famle mo ol fren we oli joen wetem mifala. Plante taem, i gat sam haeman blong polis we oli stap long miting ya. Mifala i talemaot klia hop ya we Baebol i givim blong ol dedman bambae oli laef bakegen, no ol advaes we Jeova i givim long saed blong mared, no ol blesing we bambae oli kamaot long niufala wol.

Wan dei, mi stap finisim tok ya blong berem dedman, nao wan trak i kam i stop, wan man i kamaot long hem, i talem long mi blong go insaed long trak ya. Mi no fraet nating, from we mifala i no man blong brekem loa. Mifala i man blong bilif long God nomo. Be, mi gat evri ripot blong minista wok blong evri brata blong kongregesen, oli stap long poket traoses blong mi. Oli save holem mi from. Ale, mi askem long olgeta sipos mi save givim sam mane long waef blong mi bifo we mi folem olgeta. Nao, mi stap kwaet, mo stret long fored blong olgeta, mi mi givim mane ya long waef blong mi, mo tu mi givim ol ripot blong kongregesen.

Stat long 1974, long fasin haed, mi wetem Maria mitufala i stat wokem sam buk blong eksplenem Baebol long haos blong mitufala. From mifala i gat wan smol boe, mifala i wok let long naet, blong hem i no save. Be, hem i wantem tumas save wanem samting we mifala i stap mekem. Ale, hem i giaman se hem i slip, be hem i lukluk smol ol wok blong mifala. Biaen hem i talem: “Mi save hu ya i wokem ol magasin we oli tokbaot God.” Mitufala i fraet smol, be oltaem mifala i askem Jeova blong protektem impoten wok ya we famle blong mifala i mekem.

Biaen, gavman i kam moa kaen long ol Witnes blong Jeova. Taswe mifala i mekem plan blong holem wan pablik miting long wan bigfala haos we nem blong hem Mir arts and leisure center, long taon ya Usol’ye-Sibirskoye. Mifala i talem long gavman se miting ya i blong stadi long Baebol nomo, mo joen wetem ol man we oli laekem ol samting long saed blong spirit. Long Janewari 1990, bitim 700 man oli fulumap haos ya. Miting ya i pulum intres blong plante man.

Long en blong miting, wan man blong raetem niuspepa i askem long mifala, se: “?Weswe yufala i trenemgud ol yangfala blong yufala olsemia?” Hem wetem sam narafala we oli kam, oli sapraes we ol yangfala oli sidaon mo oli stap kwaet, long ol fo haoa blong faswan miting ya. I no longtaem, hem i raetem wan gudfala tok long niuspepa blong taon ya. Hem i talem se: “Yumi rili save lanem samting from [ol Witnes blong Jeova].”

Haremgud From Plante Man Oli Kam

Long 1991, mifala i holem seven asembli long Soviet Yunion, we 74,252 man oli kam long hem. Biaen, afta we ol wanwan ripablik blong Soviet Yunion oli seraot, Hed Kampani i sanem wan niufala wok i kam long mi long Mosko. Long ples ya, oli askem long mi sipos mi save mekem moa long wok blong Kingdom. Long taem ya, Yaroslav i mared finis mo i gat wan pikinini gel, mo Oksana i wan yangfala we i no kasem 20 yia blong hem yet. Long sem yia ya, mi mi lukaot long wok blong Administrative Center of the Regional Religious Organization of Jehovah’s Witnesses long Rasia.

Naoia, mi mo Maria mitufala i laef mo i wok long niufala branj ofis, afsaed long St. Petersburg. Mi ting se hemia wan bigfala ona blong wok wetem ol brata we oli gat strong bilif, blong lukaotgud long olgeta pablisa we oli stap kam plante, blong oli save talemaot Kingdom long Rasia. !Tede, i gat bitim 260,000 Witnes long olgeta ripablik we bifo oli joen long Soviet Yunion, mo long Rasia nomo i gat bitim 100,000!

Plante taem, mi mo Maria mitufala i tingbaot ol famle mo fren blong mitufala we oli stap gohed long wok blong Kingdom long Saebiria, wan ples we naoia mifala i laekem tumas. Tede, plante taem oli holem bigfala asembli long ples ya, mo i gat klosap 2,000 Witnes we oli prij long Irkutsk mo raonabaot long taon ya. Yes, profet tok ya blong Aesea 60:22 (NW) i kamtru long haf ya blong wol tu, se: “Man ya we i smolman bambae i kam taosen man, mo hemia we i olsem nating nomo bambae i kam wan strongfala nesen.”

[Futnot]

[Tok blong pija long pej 20]

Wetem papa blong mi, famle blong mifala, mo narafala presina long Irkutsk long 1959

[Tok blong pija long pej 23]

Ol pikinini long kalabus long Iskra

[Tok blong pija long pej 25]

Yia ya we mitufala i mared

[Tok blong pija long pej 25]

Wetem Maria tede