Samting Ya i Sas Moa i Winim Mane

MAN BLONG WEKAP! LONG KANADA I RAETEM STORI YA

“[Hem] i givim wan presen long gel blong hem, we i sas moa i winim mane,” hemia wanem we niuspepa ya The Monitor long Bridgetown, Nova Scotia i talem. ?Wanem nao presen ya? Hemia “nambawan eksampel long saed blong stret fasin.”

Anna mo gel blong hem Tanya tufala i stop long wan haos we oli stap salem ol seken han samting. Tufala i pem wan smol basket blong Tanya blong putum Baebol blong hem insaed. Taem tufala i kambak long haos, Tanya i openem wan poket insaed long basket ya mo i sapraes blong faenem ol pepa mane we i kasem 1,000 dola (Kanada). Kwiktaem nomo, mama ya wetem gel blong hem tufala i gobak long ples blong salem ol seken han samting. Mo tufala i givimbak mane ya long woman we i bin salem basket ya long tufala. Basket ya hem i blong mama blong woman we i bin salem basket ya. Mama blong hem i bin kasem sik ya Alzheimer nao i ded. Be taem woman ya i salem basket ya hem i no bin jekem gud fastaem blong karemaot ol samting insaed. From bigfala tangkiu blong hem, woman ya i talem se: “Samting ya i mekem we mi save trastem ol man . . . Hem i wan nambawan samting blong save se i gat sam gudfala man we oli stap yet.”

Stori ya i kamaot long fored blong wan niuspepa, mo i raetem tok we Anna i talem se: “Hemia i wan haf blong fasin blong laef blong mifala ol Witnes blong Jeova. Baebol nao i trenem [tingting blong mifala blong jajem mifala]. Mo tu, mifala i wantem tijim Tanya long ol samting we oli stret.” Long tingting blong Tanya, niufala waet basket ya bambae i wan spesel lesen blong rimemba stret fasin.