Wan Man Blong Stil Mo Kilim Man i Kam Wan Man We i Fulap Long Hop

COSTA KOULLAPIS I TALEM STORI YA

MI STAP LUKLUK OL DOTI WOL BLONG RUM BLONG MI LONG KALABUS. MI STAP TINGTING STRONG SE MI MAS FAENEM WAN ROD BLONG KASEM BIGFALA MANE. OLSEM NAO, BAMBAE MI STATEM WAN NIUFALA LAEF WE MI NO MOA BREKEM LOA.

MI STAP sidaon we mi harem nogud tumas long tingting blong mi. Mi stap tingbaot se long yia we i pas, 11 fren blong mi oli ded. Wan long olgeta, kot i givim panis blong ded long hem from we hem i kilim wan narafala man i ded. Wan narafala fren blong mi i kilim hem wan i ded bakegen taem hem i stap wet long kalabus blong pas long kot. Tri, oli ded from oli kakae tumas drag. Tu, oli ded long ol faet long rod. Mo i gat fo oli ded long ol aksiden long trak. Mo tu, plante narafala fren blong mi oli stap long kalabus from ol nogud samting we oli bin mekem.

Taswe, long dak rum ya long kalabus, mi prea wetem fulhat blong mi long God. Mi no save se God hem i hu. Be mi askem long hem blong soemaot rod long mi blong kamaot long laef ya we i fulap long ol nogud fasin. Longtaem lelebet biaen, mi kasem ansa long prea ya. Be bifo long taem ya, oli putum poen agensem mi long kot se mi kilim man, we mi gat tingting blong spolem gud bodi blong hem. Ale loea i toktokgud long jaj, nao oli no putum tumas bigfala poen agens long mi, mekem se panis i no strong tumas. Be fastaem, mi mas eksplenem olsem wanem mi stap long wan laef olsem.

Long 1944, mi mi bon long Saot Afrika, long taon ya Pretoria. Mi gruap long ples ya nomo. Laef blong mi olsem wan pikinini i no hapi. Famle blong mifala i no haremgud from we oltaem Papa i faerap long kros. Fasin blong hem i nogud moa taem hem i dring tumas. Hem i westem plante mane long kasino tu. Taem hem i kros, hem i swea nogud long mifala mo i kilim nogud mifala evriwan. Hem i mekem raf fasin ya moa long mama blong mi. Blong ronwe long ol faet we oli stap kamaot oltaem, mi mi aot long haos, mi go laef long rod nomo.

Rod We i Lidim Mi Blong Brekem Loa

From samting ya, taem mi pikinini nomo, mi gat plante save finis long ol fasin blong wol. Taem mi gat eit yia nomo, mi lanem tu lesen. Faswan, hemia taem oli faenem sam pleplei we mi bin stilim long wan haos klosap long ples blong mifala. Papa blong mi i wipim mi we i wipim mi. Mi tingbaot yet ol strong tok blong hem: “!Sipos yu stilim sam samting bakegen, bambae mi brekem nek blong yu!” Stat long taem ya, mi gat strong tingting se bambae oli neva faenemaot mi bakegen. Hemia i no min se mi tingting blong livim fasin blong stil, nogat. Tingting blong mi se: “Nekis taem, bambae mi haedemgud ol samting we mi stilim blong oli no save faenem.”

Seken lesen we mi lanem taem mi yangfala yet, i no joen wetem fasin stil. Long klas long skul, mifala i tokbaot Baebol, nao tija i talem long mifala se God i gat wan prapa nem blong hem. Mifala i sapraes taem hem i talem se: “Nem blong God, hem i Jeova. Hem i save harem prea blong yu sipos yu prea long hem long nem blong Pikinini blong hem, Jisas.” Nating se mi mi yangfala nomo, mi no fogetem tok ya. Be, hemia i no blokem mi blong folem wan laef we i fulap long raf fasin mo stil. Taem mi kasem haeskul, mi mi save gud finis olsem wanem blong stilim ol smosmol samting long stoa mo olsem wanem blong rabem ol man. Ol fren blong mi long skul oli no givhan long mi nating. Plante long olgeta oli bin stap long ol spesel skul blong stretem olgeta from ol nogud samting we oli bin mekem.

Taem ol yia oli stap pas, mi mi kam wan slef long ol fasin ya blong brekem loa. Bifo we mi gat 20 yia, mi joen plante taem blong kilim mo rabem ol man, stilim ol trak, mo mekem ol raf fasin agensem ol man. Oltaem mi stap go long ol ples blong plei from mane mo ol ba, mi stap karem ol mesej blong ol man we oli mekem kruked bisnes long fasin haed, ol mesej blong ol woman blong rod, mo blong ol man blong brekem loa bakegen.

Mi stap joen oltaem wetem ol man we oli haremgud nomo blong brekem loa, mo we oli glad nomo blong spolem bodi blong narafala we i ripotem olgeta. Mi lanem se i moagud blong satem maot blong mi mo no tokflas from ol nogud samting we mi mekem, mo tu blong no soemaot se mi gat mane. Ol fasin ya oli save talemaot long ol narafala se mi bin stil, nao polis i save kam luk mi mo askem ol strong kwestin long mi. Mowas, maet ol narafala man blong stil oli kam luk mi blong karem haf long ol samting we mi bin stilim.

Be nating se mi lukaotgud olsem, sam samtaem ol polis oli wajemgud mi from oli ting se maet mi bin mekem wan samting agensem loa. Mi lukaotgud oltaem blong no holem wan samting we i save pruvum long olgeta se mi bin stil no brekem loa. Wan taem, long tri klok long moning, polis i kilkilim doa blong haos blong mifala. Oli kam insaed, nao oli jekem ol samting long haos. Oli lukluk tu taem long evri ples, blong traem faenem ol samting we oli wok wetem lektrik, from we samfala oli bin stilim evri samting long wan bigfala dok blong wan bisnesman. Oli no faenem wan samting long haos. Oli karem mi i go long polis stesen mo oli mekem kopi blong ol mak blong fingga blong mi, be oli no holem mi.

Mi Stat Joen Long Bisnes Blong Drag

Taem mi gat 12 yia nomo, mi stat blong yusum drag we oli spolem tingting blong man. Helt blong mi i kam nogud, mo sam samtaem, klosap mi ded from se mi tekem tumas drag. I no longtaem, mi mitim wan dokta we hem i wokhaed wetem ol man blong brekem loa. Nao mi kam wan man blong salem drag long ol man, we oli salem bakegen long narafala man. Mi luksave se i no gat tumas denja long wok ya blong mi blong givimaot drag long olgeta from we mi mi save haed, be olgeta nao we oli salem bakegen oli mas lukaotgud.

I nogud tumas se, samfala we mi salem drag long olgeta oli ded from we oli kakae tumas drag, mo samfala oli mekem ol nogud raf fasin taem drag i gat paoa long olgeta. Wan “fren” blong mi i kilim i ded wan bigfala dokta. Oli raetem stori ya long fas pej blong olgeta niuspepa long kantri. Biaen, man ya i traem blong putum fol long mi. Be mi mi no save wan samting long saed ya. Mi jes save long samting ya taem ol polis oli kam long haos blong askem kwestin long mi. Plante taem ol polis oli kam askem kwestin long mi from sam nogud samting we ol man oli mekem blong brekem loa.

Wan dei, mi mekem wan krangke samting. Mi bin tekem drag mo mi bin dring alkol blong wan ful wik, nao mi rao wetem tu man. Mi mi kam kros, ale mi kilim nogud tufala. Long tumora blong hem, tufala i talemaot long polis se mi nao we mi bin kilim tufala. Ale polis i holem mi mo putum poen agensem mi se mi kilim tufala wetem tingting blong spolem gud bodi blong tufala. Hemia nao from wanem mi stap long kalabus.

Kam Rij, Nao Stretem Laef

Taem mi kamaot long kalabus, mi harem nius se wan kampani blong wokem ol meresin i lukaotem wan man blong lukaot long stok blong olgeta. Mi go askem wok ya mo mi mekem bos i ting se mi nao mi stret man blong mekem wok ya. Wan fren blong mi we i wok finis long kampani ya, hem i sapotem tok blong mi, nao mi kasem wok ya. Long tingting blong mi, hemia nao rod blong kasem fulap mane, mo biaen mi save muf i go long narafala ples mo statem wan niufala laef. Ale, mi hareap blong lanem evri samting long wok ya, mo mi wekap let long naet blong lanem nem blong olgeta meresin. Mi sua se hemia nao rod blong statem wan niufala laef.

Mi plan se sloslou bambae mi mekem se ol bos oli trastem mi. Nao long stret taem, bambae mi stilim plante drag we mi save salem long fasin haed mo kasem bigfala mane from. Wantaem nomo, bambae mi save kam wan rij man. Mi mekem wan plan blong giaman long polis se mi no stap long dok taem trabol ya i kamaot, nao oli no save faenem poen blong mi. Long rod ya, mi save fri mo statem wan niufala laef.

Ale, stret taem i kam blong mi folem plan ya. Wan naet, sloslou mi go insaed long dok, nao mi luk ol kabod we oli fulap long ol drag. Praes blong olgeta i kasem plante milian vatu. Hemia nao jans blong mi blong statem wan laef we i no moa fulap long fasin blong stil mo raf fasin. Be, wantaem nomo, tingting blong mi i stikim mi. Hemia faswan taem long laef blong mi we samting ya i hapen. ?Wanem nao i mekem se tingting blong mi i stat jajem mi, be bifo hem i neva mekem wan samting? Naoia mi talem long yu wanem samting i bin hapen.

Sam wik bifo, bos blong mi i storian long mi long saed blong mining blong laef. Mi ansa long wan kwestin blong hem, se sipos man i no save win long laef, i gud hem i prea. Hem i askem se: “?Prea long hu?” Mi mi ansa se: “Long God.” Hem i se: “Yes, be i gat plante god we ol man oli stap prea long olgeta. ?Bambae yu yu prea long weswan?” Mi ansa se: “Long Hae God.” Hem i gohed se: “?Mo wanem nem blong hem?” Mi askem se: “?Yu minim wanem?” Hem i se: “Hae God i gat wan prapa nem, olsem we mi mo yu mo ol narafala i gat wan nem.” Mi haremsave se tingting ya i stret, be mi stat kam kros. Nao mi askem long strong fasin: “Ale, ?wanem ya nem blong God?” Hem i ansa se: “!Prapa nem blong Hae God, hemia Jeova!”

Wantaem nomo, mi tingtingbak long lesen we mi lanem long klasrum taem mi gat eit yia nomo. Mi mi sapraes we toktok blong bos blong mi i gat paoa bitim mak long mi. Mitufala i gohed blong storian blong plante aoa. Long nekis dei, hem i karem wan buk i kam long mi, nem blong buk ya, Trutok We i Lidim Man Blong Kasem Itenel Laef!a Long sem naet, mi ridim buk ya fulwan. Wantaem nomo, mi luksave se mi faenem trutok mo trufala mining blong laef. Long nekis tu wik, mitufala wetem bos blong mi i spenem bighaf blong taem blong mitufala blong tokbaot ol save long nambawan blu buk ya.

Taswe, taem mi sidaon long dak ples we i kwaet tumas long dok ya, tingting we i stikim mi i mekem mi mi luksave se i rong blong stil mo salem drag. Ale, mi aot long dok ya long kwaet fasin, mi gohom. Stat long taem ya, mi gat strong tingting blong no moa stil.

Mi Jenisim Laef Fulwan

Long ol dei we oli kam biaen, mi talem long famle blong mi se mi bambae mi jenisim laef blong mi. Mi storian long olgeta long ol trutok blong Baebol we mi stap lanem. Papa blong mi i wantem sakemaot mi long haos. Be brata blong mi Jon, i blokem hem, i se: “Hemia fastaem long laef blong Costa we hem i no joen long samting we i brekem loa, be yu yu wantem sakemaot hem. Bambae mi faenemaot moa long saed blong samting ya.” Jon i askem long mi blong stadi Baebol wetem hem. Mi mi sapraes mo mi glad tumas. Stat long taem ya, ol man we oli kam luk mi blong pem drag, mi mi givim wan Trutok buk long olgeta. I no longtaem, mi stap yusum buk ya blong stadi Baebol wetem 11 man!

Nao mi faenemaot se bos blong kampani i no wan Witnes yet. Woman blong hem i wan Witnes blong 18 yia finis, be man ya “i neva bin gat taem blong folem trutok.” Ale, hem i askem wan man we hem i Witnes blong longtaem, blong stadi Baebol wetem mi. Ol stadi blong mi oli givhan long mi blong luksave se mi mas stretem sam narafala samting long laef blong mi tu. I no longtaem, trutok blong God i stat blong mekem mi mi fri long ol fasin blong wol.—Jon 8:32.

Be, wantaem nomo, mi harem i narakaen from ol samting ya we oli kamaot hareap nomo long laef blong mi, olsem long sam wik nomo. Mi mas jenisim plante bigbigfala samting. Mi stat luksave se, sipos mi gohed blong folem ol samting we mi stap lanem long Baebol, bambae i mas gat wan bigfala faet bitwin bodi mo tingting blong mi. Be mi luksave tu se sipos mi gohed long olfala fasin blong laef, ating bambae mi ded, sipos no, bambae mi spenem bighaf blong laef blong mi long kalabus. Taswe, mi tingtinggud mo prea blong longtaem, nao mi jusum blong folem rod blong trutok. Sikis manis biaen, long Epril 4, 1971, mi tekem baptaes blong soem se mi givim laef blong mi i go long Jeova.

Ol Blesing Blong Wan Laef We i Stret

Samtaem mi tingtingbak long ol blesing we mi bin kasem long ol yia we oli pas afta we mi aot long rabis laef blong mi, nao samting ya i rili tajem filing blong mi. Ol 11 man ya we mi bin stadi Baebol wetem olgeta long ol faswan wik ya, i gat 5 we oli stap folem rod blong trutok yet. Mama blong mi tu i stadi Baebol mo hem i tekem baptaes olsem wan Witnes. Hem i gohed blong mekem wok blong God go kasem we hem i ded long 1991. Tufala brata blong mi oli givim laef blong olgeta i go long Jeova mo naoia oli stap mekem wok blong ol elda. Mi givhan tu long anti blong mi blong save trutok, mo hem i bin mekem wok blong God fultaem blong 15 yia nao.

Bos blong kampani blong ol meresin we mi bin wok blong hem, i sapraes tumas long ol bigfala jenis we mi mekem long laef blong mi, nao hem tu i stat blong tinghevi long trutok. Wan yia afta we mi mi tekem baptaes, hem tu i givim laef blong hem long God mo i tekem baptaes. Biaen, hem i mekem wok blong elda blong plante yia long wan kongregesen blong ol Witnes blong Jeova long Pretoria.

Naoia mi mi mared long wan Kristin sista. Mi mo Leonie i bin muf i go long Ostrelia long 1978. Long ples ya, mitufala i gat tu boe, Elaeja mo Pol. Ol samting we famle blong mi oli mekem blong givhan long mi i rili halpem mi blong stap strong. Mi mi gat blesing blong mekem wok blong elda long kapital blong Ostrelia, Canberra. Evri dei mi talem tangkiu long Jeova, we hem i tekemaot mi long wan laef we i no gat mining, i fulap long raf fasin mo stil, mo i stap lidim mi blong safa mo ded. Antap long hemia, Hem i givim mining long laef blong mi, taem Hem i soemaot wan trufala hop long mi mo long olgeta we mi laekem olgeta tumas.

[Futnot]

[Tok blong pija long pej 22]

Taem mi gat 12 yia

[Tok blong pija long pej 22]

Mi wetem waef blong mi mo tufala boe blong mi naoia