“!Jeova, Yu Yu Faenem Mi!”

Nelly Lenz i talem stori ya

“?Yutufala i Witnes blong Jeova?” Mi mi askem kwestin ya long tufala man we tufala i kam long haos blong mifala. Tufala i ansa se: “Yes.” Mi talem wetem glad se: “!Mi tu mi wan Witnes!” Long taem ya mi mi gat 13 yia nomo mo mi no stap go long ol miting long Haos Kingdom. Papa mama blong mi tufala i no Witnes blong Jeova. ?From wanem mi mi talem long tufala Witnes ya se mi tu mi wan Witnes?

LAKI nomo se wan Witnes blong Jeova i bin toktok long mama blong mi. Sipos no, mi mi no bon nating. Taem Mama i gat bel wetem mi, hem i stap long Montreal, Quebec, Kanada. Hem i gat 17 yia nomo long taem ya. Famle blong hem i fosem hem, se hem i mas kilim pikinini ya we i stap long bel blong hem. Mama i agri.

Mama i askem wan dei spel long wok blong hem, blong i save go long klinik. Bos blong hem, hem i wan woman we i Witnes blong Jeova, mo hem i faenemaot se Mama bambae i kilim pikinini long bel blong hem. Nao hem i eksplenem smol long Mama se laef i wan presen we yumi mas tinghevi long hem. (Ol Sam 139:​13-​16) Taem Mama i stap ron i go long klinik, hem i stap tingting long ol tok blong bos blong hem. Ale hem i jenisim tingting blong hem, i no moa kilim pikinini long bel blong hem. Long 1964, mi mi bon, mo mama blong mi i putum mi mi stap long wan spesel hom blong ol pikinini we oli no gat papa mama.

Fastaem We Mi Harem Trutok Blong Baebol

Taem mi mi gat tu yia, mama blong mi mo niufala hasban blong hem, tufala i tekemaot mi long hom ya. Taem mifala i stap long Sainte-Marguerite-du-Lac-Masson, tufala i stat stadi Baebol wetem ol Witnes blong Jeova mo tufala i stap go long ol miting blong kongregesen. Be i no longtaem, mifala i muv i go long Boisbriand, nao tufala i no moa stadi.

Sam yia biaen, tufala i stadi bakegen. Mi mi stap lesin tu blong kasem save long hop we Baebol i givim long saed blong paradaes long wol. (Luk 23:43) Sloslo mi lavem Jeova tumas.

Be wan dei, Mama i talem long mi se bambae tufala i no moa stadi wetem ol Witnes, mo se bambae mifala i no moa go long Haos Kingdom. Fastaem, mi mi glad tumas long nius ya. Mi mi gat 8 yia long taem ya, mo sam samtaem mi faenem se ol miting oli longfala tumas. Nating se i olsem, long sem naet ya, taem mi wantem prea long Jeova, mi mi wari se maet hem i no moa lesin long mi.

I gat sam Witnes blong Jeova oli bin stap long wan haos klosap long mifala. Ale, long Sande aftenun, mi luk we olgeta oli aot long haos blong go long miting long Haos Kingdom. Mi krae mo mi askem long God se: “?From wanem ol pikinini blong olgeta oli save go long miting, be mi mi no save go?” Nating se mi harem nogud long dei ya, biaen ol tok blong Ol Sam 33:18 i kamtru: “Hae God i stap lukaot gud long olgeta we oli ona long hem, mo we oli trastem fasin ya blong hem we oltaem hem i lavem man tumas.”

Kam Long Haos Kingdom Bakegen

Afta we tri wik i pas, mi mi go luk famle ya we i stap klosap long mifala. Mi talem long mama blong famle ya, Lilianne, se mi wantem kam long ol miting tu. Lilianne i talem se bambae mi no save kam from we mama blong mi i no moa wantem joen wetem ol Witnes blong Jeova. Be mi mi strong blong talem se mi wantem kam. Ale, Lilianne i tekem mi mi kambak long haos, nao hem i askem long Mama sipos mi mi save go wetem olgeta long miting. Mi mi sapraes we Mama i talem ‘yes.’ Hem i talem se ol miting bambae oli tijim mi long ol stret fasin. Taswe, mi stat go long miting evri Sande.

Blong tri yia mi stap go long ol miting blong kongregesen. Be taem mi mi gat 11 yia papa mama blong mi tufala i divos, mo mi wetem Mama mitufala i muv i go long narafala ples. Bakegen, mi lusum ol Witnes blong Jeova.

Mi Sek We Mi Mitim Olgeta Bakegen

Wan dei mi stap sidaon long step long fored blong haos blong mifala, nao tu Witnes i kam. Tufala ya, Eddie Besson mo Don Fisher, i askem long mi sipos papa mama blong mi i stap. Taem mi talem long tufala se mi nomo mi stap, tufala i tanemraon blong goaot bakegen. Be mi mi ron biaen long tufala, mo mitrifala i storian olsem we mi talem long fastok blong stori ya.

Tufala i sapraes tumas blong harem se mi mi wan Witnes blong Jeova. Mi eksplenem long tufala ol samting we i bin hapen, mo mi plis long tufala blong kambak bakegen long sapa. Taem mi talem long Mama se tufala Witnes ya bambae i kambak, hem i kros we i kros, i talem se bambae hem i no letem tufala i kam insaed. Hem i mekem plan se bambae hem i aot bifo we tufala i kam. Wota i ron long ae blong mi, mo mi plis long Mama blong hem i stap. Taem hem i stap rere blong aot, wan man i noknok long doa. Eddie Besson nao i stanap long doa. !Tingbaot olsem wanem mi mi glad taem Mama i talem long hem se bambae hem i stadi Baebol bakegen!

!Naoia mi save gobak bakegen long ol miting! Be bifo we wan yia i pas, Mama i stopem stadi blong hem bakegen. Antap long samting ya, hem i blokem mi se mi no moa save luk ol Witnes. Mo tu, hem i sakemaot ol buk blong ol Witnes blong Jeova we hem i save faenem. Be mi mi haedem wan Baebol, wan singbuk, tu volium blong Wajtaoa, tu Yearbook of Jehovah’s Witnesses, wetem buk ya Trutok Blong Soemaot Rod Blong Itenel Laef.a Long laswan stadi we mi bin mekem, mi talem long Eddie Besson se mi lavem Jeova tumas, mo mi askem long hem wanem samting mi save mekem. Hem i leftemap tingting blong mi blong stadi mi wan mo blong prea oltaem. Hem i mekem mi mi sua se Jeova bambae i lukaotgud long mi. Long taem ya mi mi gat 14 yia nomo.

Mi Mekem “Miting” Mi Wan

Afta long taem ya, evri Sande mi go long rum blong mi mo mi mekem olsem we mi stap long miting. Blong statem mo finisim miting ya mi mekem wan singsing blong Kingdom hemia “!Yumi Mas Tingbaot Praes Ya!” Singsing ya nomo we mi save rimemba. Kam kasem tede, wota i stap ron long ae blong mi taem mi mekem singsing ya. Mo tu mi stadi long wan long ol Wajtaoa we i stap long tufala volium we mi bin haedem. Mi finisim “miting” blong mi wetem prea. Taswe, nating se mi no moa joen wetem ol Witnes, be mi harem se Jeova i stap klosap long mi.

Taem mi mi gat 17 yia, mi wetem Mama mitufala i muv i go long Montreal. Ol yia ya oli had tumas, from we i no gat lav nating long hom.

!Jeova i Faenem Mi!

Wan dei, sam Witnes blong Jeova oli givim wan buk long Mama, hemia Yu Save Laef Foreva Long Paradaes Long Wol. Taem mi mi kamhom, mi luk buk ya long tebol mo mi stat tanem ol pej blong hem. Taem mi luk nem blong God, Jeova, mi krae mo mi prea long hat blong mi se, “!Jeova, yu yu faenem mi!”

Mi harem se mi mas go luk ol Kristin brata sista. ?Be olsem wanem mi save mekem samting ya? Mama i talem long mi se maet olgeta we oli stap long haos klosap long mitufala oli Witnes blong Jeova. Ale, taem mi aot blong go long wok, mi go kilim doa blong haos ya. Wan man we hem i jes girap, i openem doa. !Hem i sek taem mi talem long hem se mi mi wan Witnes blong Jeova mo se mi mi wantem tekem baptaes! Hem i askem wan Kristin sista, nem blong hem Josée Miron, blong stadi Baebol wetem mi. Be bakegen, Mama i agensem mi. Hem i talem se mi mas wet kasem we mi gat 18 yia bifo we mi save kam wan Witnes.

?Bambae Mi Lego Jeova From Famle Blong Mi?

Bos blong mi long wok i stap luk we laef i no hapi nating long haos blong mitufala. Plante wiken hem i singaot mi blong kam stap wetem hem mo woman blong hem. Mi mi laekem tumas ol hos, mo plante taem mitrifala i ron long ol hos. Mi mi harem se tufala i olsem papa mama blong mi.

Wan dei, bos blong mi i talem se hem wetem woman blong hem tufala i laekem mi tumas, mo se tufala i wantem we mi mi kam stap wetem tufala oltaem. Hemia i olsem we hem i stap givim wan presen long mi we mi mi bin wantem long ful laef blong mi​—wan famle we i gat lav. Wan samting nomo​—mi mas lego ol Witnes blong Jeova. Tufala i talem se wan wik biaen bambae tufala i harem ansa blong mi, be mi mi tekem disisen blong mi long sem dei nomo. Wantaem nomo mi givim ansa long hem. Jeova i neva bin lego mi, mo mi mi no save lego hem.

Wok We Mi Mekem Blong God

From ol trabol we i stap long haos, mi mi go stap long haos blong step papa blong mi. Hem i leftemap tingting blong mi blong gohed blong stadi, nao long Disemba 17, 1983, mi mi baptaes. Mi gat 19 yia long taem ya. Mi glad tumas blong luk Eddie Besson long dei blong baptaes blong mi. !Naoia hem i savegud se mi mi wan Witnes blong Jeova!

Be afta we mi mi baptaes, tingting blong step papa blong mi i jenis. !Taem hem i luksave we mi mi prea, hem i toktok long bigfala voes mo sam samtaem hem i kilim mi tu! Hem i stap tok strong long mi se mi mas kasem moa edukesen, be hem i mekem samting ya blong blokem mi nomo blong mi no prij fultaem olsem wan paenia. Biaen, hem i talem long mi blong aot long haos. Hem i givim wan jek long mi blong 10 taosen vatu mo hem i talem se taem mi mi go karem mane ya long bang, bambae mi kasem save se Jeova i no stap lukaotgud long mi.

Long Septemba 1, 1986, mi mi stat paenia. !Mo kam kasem tede, mi mi holem jek ya yet, mi neva go karem mane blong hem! Long sam ples long bus, mi bin faenem i had blong paenia from we mi no gat trak. Be ol brata sista long lokol kongregesen oli givhan gud long mi.

Biaen mi mitim wan Kristin man we i kaen tumas, nem blong hem Ruben Lenz. Mitufala i mared long yia 1989. Long yia 2002, mitufala i go stap long Milton, Ontario, Kanada, mo Ruben i kam wan elda blong kongregesen long ples ya. Mared blong mitufala i wan blesing blong Jeova we i bigwan, bitim ol narafala blesing we hem i bin givim long mi. Mi mi mekem wok blong paenia go kasem yia 1993. Long taem ya, mi mi bonem faswan pikinini blong mitufala, Erika. Tri yia biaen, mi bonem wan pikinini boe, Mika. Plante yia mi bin harem nogud blong stap mi wan, be Jeova God i blesem mi bigwan wetem wan famle we oli lavem hem olsem we mi mi lavem hem.

Long ol yia we mi stap gruap, wanwan taem mi lusum ol man blong Jeova. Nating se i olsem, mi neva stop blong putum tingting blong mi i strong long God, mo blong holemtaet hop blong laef we i no save finis long Paradaes. (Jon 3:​36) !Mi mi talem tangkiu tumas long Jeova from we hem i “faenem” mi!

[Futnot]

[Tok blong pija long pej 15]

Mi ron long wan hos blong bos blong mi

[Tok blong pija long pej 15]

Nelly Lenz mo man blong hem Ruben, wetem tufala pikinini blong tufala, Erika mo Mika