Glad Blong “Go Wan Kilometa Bakegen”

CLAIRE VAVY I TALEM STORI YA

AELAN blong Madagaska i stap 400 kilometa longwe long kantri blong Mosambik we i stap long Is Afrika. Aelan ya i gat plante hil mo dakbus. Mi mi bon long is saed blong aelan ya long wan smol vilej we nem blong hem Betoko 2. Long yia 1987, taem mi mi gat 15 yia, mi go skul long taon ya Mahanoro, we i stap klosap long solwota.

Long Mahanoro, mi stap wetem bigfala brata blong mi, Celestin. Ol Witnes blong Jeova oli stap mekem Baebol stadi long hem. Tu yia biaen, mi mi kam wan Witnes. Mi mi gat strong tingting blong mekem bes blong mi long wok blong Jeova God.

Traehad Blong Kasem Ol Mak We Mi Putum

Faswan mak we mi mi wantem kasem, se mi wantem givhan long famle blong mi long Betoko 2. Mi prea oltaem long Jeova long saed ya. Be mi save go luk olgeta long taem blong spel long skul nomo. Trip ya blong 100 kilometa i had. Mi save tekem wan trak blong 40 kilometa, be mi mas wokbaot long leg nomo blong 60 kilometa, folem wan smol rod we i pas antap long ol hil.

Mi mas klaem i go antap long plante bigfala hil, mo long sam ples, rod i smol olsem longfala blong fut blong mi. Sipos mi wokbaot stat long eli moning gogo san i godaon, mi save kasem 40 kilometa. Olting we mi karem oli hevi olsem 15 kilo. Sam long olgeta mi karem long hed mo baksaed blong mi, mo sam mi karem long han blong mi nomo. Bighaf blong olting ya, oli ol buk we oli tokbaot Baebol. Mi givimaot ol buk ya long famle blong mi mo long ol narafala we oli intres long Baebol. Ol man we haos blong olgeta i stap klosap long rod, oli singaot mi se “hemia we basket blong hem i bigwan.”

Mi mi wantem tumas blong givhan long famle blong mi. Be fastaem oli no wantem lesin taem mi tokbaot niufala bilif blong mi. Be i no longtaem, oli jenisim tingting blong olgeta mo oli askem fulap kwestin, mekem se sam naet mifala i slip long tu klok nomo.

Wan Spel We Mi No Save Fogetem

Long Disemba 24 1990, mi kasem ples blong mi, Betoko 2, long taem blong spel blong mi. Ol famle oli glad blong luk mi. Oli ting se mi mi kam blong mekem lafet blong Krismas wetem olgeta. Oli lusum glad blong olgeta taem mi eksplenem from wanem mi mi no save joen long lafet blong Krismas. Oli sem blong eksplenem samting ya long ol narafala long vilej, from we olgeta man long vilej ya oli gat fasin blong joen tugeta blong mekem evri samting. Ale mi harem se mi nao mi mas eksplenem. ?Be olsem wanem mi save mekem samting ya?

Mi mi no savegud olsem wanem blong eksplenem, antap moa, mi mi yangfala nomo. Mi bin tingting se maet i gud blong eksplenem bilif blong mi taem evriwan long vilej oli kam long jos long nekis dei. Mi mekem wan longfala prea long Jeova, mi askem wetem fulhat blong mi blong hem i lidim mi. Afta, mi askem long bigfala brata blong mi Paul, we hem i wan tija long jos, se, “?Yu ting se i oraet sipos mi mi eksplenem long evriwan long jos tumora from wanem mi no save mekem lafet blong Krismas?” Hem i askem long samfala, mo oli agri se i oraet.

Long nekis dei, oli mekem jos seves blong olgeta, nao taem oli finis oli singaot mi. Mi prea long Jeova bakegen, mo mi karem plante buk lelebet wetem mi. Fastaem, mi talem halo long olgeta, nao biaen, mi talem tangkiu long evriwan from we oli bin givhan long mi blong respektem Baebol bigwan. Mi mi eksplenem se afta we mi aot long vilej ya, mi bin gohed blong stadi Baebol long taon. Mi talem se mi bin faenemaot plante trutok blong Baebol we mifala i no bin kasem tijing long olgeta bifo.

Mi tekem janis blong eksplenem hop we Baebol i givim, long saed blong laef olwe long paradaes long wol ya (Ol Sam 37⁠:29; Revelesen 21⁠:​3, 4). Mi eksplenem from wanem sam man nomo oli go long heven (Jon 14⁠:​2, 3; Revelesen 5⁠:​9, 10; 14⁠:​1, 3), mo mi tokbaot tijing blong Baebol se ol dedman oli no save samting, oli stap slip nomo, ale oli no stap safa (Prija 9⁠:​5, 10; Jon 11⁠:​11-14, 38-44). Mo tu, mi soemaot se ol faswan Kristin oli no mekem lafet blong Krismas, be hem i wan lafet blong ol hiten man.

Long en blong toktok blong mi, plante man oli talem se ol tok blong mi oli tru nomo. Samfala oli askem kwestin. Mi soemaot ol buk long olgeta, mo mi eksplenem se ol Witnes blong Jeova oli wokem ol buk ya blong halpem ol man blong stadi Baebol. Mi talem se mi mi glad blong givhan long olgeta we oli wantem stadi Baebol. Plante long olgeta oli karem buk.

Wan Samting We Mi Sapraes Long Hem

Wan woman we mi mi no save hem, hem i kam luk mi, nao i talem se: “Sista blong mi we i stap long wan narafala vilej, hem i joen long skul blong yufala.” Mi mi sapraes, mi askem se: “?Hem i stap wea?”

Woman ya i talem se: “Long Andranomafana.” Vilej ya i samwe long 30 kilometa longwe long Betoko 2.

Mi talem long woman ya se ating sista blong hem i joen long wan narafala skul, from we olgeta Witnes long eria ya oli savsave olgeta. Be woman ya i strong blong talem se sista blong hem i bin tokbaot sem samting we mi mi tokbaot long jos. Mi askem nem mo adres blong sista blong hem, from we mi mi wantem aot wantaem nomo blong go long vilej ya. Be mama blong mi i talem long mi blong wet wan no tu dei from we rod i nogud mo mi mas wokbaot long leg nomo. Tu dei biaen, mi wetem brata blong mi Charles, mitufala i wokbaot i go long Andranomafana.

Taem mitufala i kamtru long vilej ya, mitufala i askem long samfala se: “?I gat sam Witnes blong Jeova long ples ya?” Mi mi harem nogud taem oli ansa se: “Long vilej ya, i gat Katolik, Pentekostal, mo ol Independen jos nomo.”

Nao wan woman i girap i talem se: “Yu yu lukaot ol Witnes blong Jeova, ating yu wantem luk Marceline mo famle blong hem.” !Hemia nao nem ya we mi bin raetemdaon!

Wan long olgeta i ron i go blong singaot Marceline. I no longtaem Marceline i kam, be i luk olsem we hem i fraet smol. Evriwan long vilej oli hivap raon long mitrifala, from we oli ting se mitufala i stap wok blong gavman mo se mitufala i kam blong kwestinim Marceline. Biaen mi faenemaot se plante long vilej ya oli agensem Marceline mo famle blong hem from we oli folem ‘skul ya we i narakaen.’

Marceline i lidim mitufala i go longwe lelebet long ol man, long wan ples we mitrifala i save toktok tugeta. Mi mi askem long hem sipos hem i wan Witnes blong Jeova. Hem i ansa se ‘yes.’ Nao hem i go karem buk ya, Trutok Blong Soemaot Rod Blong Itenel Laef, wan buk we ol Witnes blong Jeova bifo oli bin yusum blong stadi Baebol wetem ol man. Hem i soem sam olfala Wajtaoa long mitufala tu. Olgeta buk ya oli olfala mo oli brobrok olbaot. Mi mi askem long hem se: “?Yufala i bin stadi long wanem magasin las Sande?”

Hem i ansa se: “Mifala i gat ol magasin ya nomo. Mifala i stadi bakegen mo bakegen long olgeta.” Nao mi jes talemaot long Marceline se mi tu mi wan Witnes. !Hem i glad we i glad! Mi mi talem long hem se mi wantem mitim man ya we i stap lidim ol miting blong olgeta. Be hem i talem se man ya i stap long wan vilej we i longwe lelebet.

Mi Mi Sapraes Bakegen

Long nekis dei, mi mo Marceline mitufala i wokbaot i go blong luk man ya. Taem mitufala i kamtru long ples blong hem, hem i sapraes mo i glad tu. Mi mi faenemaot se i tru, hem i wan Witnes blong Jeova. Plante yia finis, hem i muvaot long wan taon we i stap 200 kilometa long notis klosap long solwota, nem blong taon ya Toamasina. Hem wetem famle blong hem oli kam stap bakegen long vilej, from we hem i lusum wok blong hem long taon. Taem oli kambak, hem i stat prij, i mekem Baebol stadi wetem plante man, mo i mekem ol miting.

Witnes ya wetem famle blong hem oli glad tumas blong luk ol laswan Wajtaoa we mi mi karem i kam. Mo tu, mi soemaot wan buk long olgeta, Yu Save Laef Foreva Long Paradaes long Wol, we long taem ya mifala i stap yusum blong stadi Baebol wetem ol man. Oli neva luk buk ya bifo. Long nekis Sande blong hem, mi mi kambak bakegen long Andranomafana blong joen long miting blong olgeta. Mi talem long olgeta se i gud sipos oli sanem toktok i go long hed ofis blong ol Witnes long bigfala taon ya Antananarivo, from we ofis ya i no save long smol grup blong olgeta ya.

Stat long Jenuware 1991, klosap evri manis mi aot long Mahanoro, mi wokbaot i go long Andranomafana, blong karem ol niufala Wajtaoa mo buk i go long olgeta. Hem i wan wokbaot blong 130 kilometa, mo 130 kilometa blong kambak. Long wan haf blong rod ya, mi mas wokbaot blong bitim 80 kilometa long rod we i nogud tumas, i go antap mo i godaon long ol bigfala hil, mo i pastru long dakbus. Taem i ren, mi hadwok blong wokbaot long sofmad ya we i glis we i glis.

Taem grup ya i kam bigwan moa, basket blong mi i kam hevi moa from we plante moa man oli wantem ol buk. Be evri taem we mi finisim wokbaot blong mi, mi haremgud tumas. Glad ya i mekem se mi mi no moa tingbaot we mi taed mo leg blong mi i soa. !Taem mi luk olsem wanem grup ya i glad blong kasem ol niufala buk mo olsem wanem oli laekem trutok blong Baebol, mi mi hapi tumas!

Mi Joen Long Wok Blong Prij Fultaem

Long Septemba 1, 1992, mi mi kam wan paenia, hemia ol Witnes we oli prij fultaem. Mi mi mekem wok blong paenia long Mahanoro, be mi stap raetem leta oltaem i go long famle blong mi long Betoko 2. Sloslo mi stat blong stadi wetem olgeta long ol leta. Oli askem long mi blong kam stap bakegen long vilej, blong givhan long olgeta. Mi mi glad blong go, be fastaem mi wantem save sipos oli tru, taem oli talem se oli wantem stadi Baebol mo gohed long saed blong spirit. Taswe mi mi no hareap blong go, mi stap gohed fastaem long wok blong paenia long Mahanoro.

Klosap long en blong yia 1993, mi mi kasem blesing ya blong joen blong tu wik long wan kos blong ol paenia long Antananarivo. Afta, oli askem long mi sipos mi mi glad blong mekem wok blong spesel paenia. Hemia i min se oli save sanem mi mi go long eniples long kantri ya. Be mi mi wantem tumas blong givhan long famle blong mi long Betoko 2 we oli stap longwe long wan kongregesen, ale mi tekem desisen blong no joen long wok blong spesel paenia. Mi gobak long Mahanoro mo mi gohed long wok blong paenia long ples ya.

Taem elda we i goraon blong visitim ol kongregesen blong ol Witnes blong Jeova i kam luk mifala, mi mi toktok wetem hem long saed blong tingting blong mi blong givhan long famle blong mi. Long taem ya, wan kongregesen i stanap finis long Andranomafana, ale hem i talem se i gud we mi mi go wok wetem kongregesen ya from we haf teritori blong olgeta, hemia Betoko 2. Long Septemba 1, 1994, mi muv i go long Andranomafana. Long semfala manis, brata blong mi Paul, we fastaem hem i wan tija long jos, hem i folem mi, ale mitufala i go long distrik asembli. I no longtaem, 30 man oli stap joen long wok blong prij long Andranomafana, mo long Sande 65 man oli kam long miting.

Mi No Stop Blong Wokbaot

Smoltaem afta we mi mi kam stap bakegen long Betoko 2, fo long ol stret brata mo sista blong mi oli kam naf blong joen long wok blong prij wetem ol Witnes blong Jeova. I no longtaem biaen, olgeta ya oli tekem baptaes. Mi mi wokbaot oltaem i go long Anosibe An’ala, blong kasem ol buk mo magasin mo karem i kam long Betoko 2. Hemia wan wokbaot blong 50 kilometa, mo 50 kilometa blong kambak bakegen. Long en blong wokbaot ya mi mi taed, be taem mi luk olsem wanem trutok i stap gru long ples ya, mi mi glad from we ol wokbaot ya oli no blong nating nomo.

Tede i gat wan kongregesen long Betoko 2, mo evri Sande samwe long 45 man oli kam long miting. Naoia olgeta stret famle blong mi long ples ya oli Witnes, mo bighaf blong olgeta oli mekem wok blong fultaem paenia. Wan smol brata blong mi, hem i wan spesel paenia. Long Novemba 1, 2001, mi tu mi kam spesel paenia, mo oli sanem mi mi go long vilej blong Antanambao-Manampotsy. Nating se mi mas lego Betoko 2, be hat blong mi i fulap long glad.

Long 1987, taem mi jes stat blong kasem save long ol trutok blong Baebol, namba blong ol Witnes long Madagaska i no kasem 3,000 yet. Naoia i gat bitim 14,000 Witnes. Olsem plante long olgeta ya, mi mi glad tumas blong gat janis blong yusum paoa blong mi blong “go wan kilometa bakegen” blong givhan long ol narafala. Mo mi talem tangkiu long Jeova from we hem i blesem ol traehad blong mi blong mekem olsem.

[Tok blong pija long pej 26]

Plante taem mi karem olting we oli hevi olsem 15 kilo, mi wokbaot 60 kilometa blong kasem vilej blong mi

[Tok blong pija long pej 27]

Bigfala brata blong mi Paul

[Tok blong pija long pej 28]

Brata blong mi Charles

[Tok blong pija long pej 28]

Mi wetem sam famle blong mi. Olgeta ya oli Witnes blong Jeova naoia