?Yu Yu Rere Blong Kam?

◼ ?Kam long wanem? !Long Distrik Asembli blong ol Witnes Blong Jeova, we nem blong hem “Obei Long God”! Asembli ya we i blong tri dei, i stat long Yunaeted Stet long las wiken long manis Mei. Long ol manis we oli kam, bambae asembli ya i kamaot long plante handred taon long wol. Ating bambae i stap long wan taon klosap long yu tu.

Long bighaf blong ol ples, asembli ya i stat wetem miusik long 9⁠:30 long moning. Stamba tok blong Fraede hemia ‘Yu Mas Obei Long Mi, Blong Mi Mi God Blong Yu.’ (Jeremaea 7⁠:23) Fastaem, bambae ol man oli lesin long tufala tok ya “God i Mekem Yumi ‘Long Fasin We i Nambawan’ ” mo “Laef Bakegen​—⁠?From Wanem Promes Ya i Mas Tru Long Tingting Blong Yu?” Program blong moning bambae i finis wetem stamba tok ya blong asembli, “Folem Man Ya We i Soem Eksampol Long Fasin Blong Obei Long God.”

Long Fraede aftenun, bambae ol man oli lesin long ol tok ya “Tingting Long ‘Ol Gudfala Fasin We Tabu Spirit i Wantem’ Mo Stap Laef,” “Blokem Olgeta Fasin Ya Blong Wantem Samting Blong Narafala Man,” mo “Yumi No Mas Lesin Long ‘Ol Storian Olbaot.’ ” Biaen, wan tok we i gat tu haf blong hem bambae i tokbaot ol bigfala poen long tufala buk ya blong Baebol, Hagae mo Sekaraea. Laswan tok blong Fraede, hemia “!Klosap Nao Fasin Safa Bambae i Finis!”

Stamba tok blong Sarede we i stanap long Rom 6⁠:17 mo 2 Korin 2⁠:​9, hemia “ ‘Yumi Obei’ ‘Long Ol Tok Blong God’ Wetem Fulhat Blong Yumi.” Wan tok long Sarede moning we i gat tri haf blong hem, hemia “Ol Famle We Oli Folem Ol Rul Blong God Oli Hapi.” Long tok ya, i gat sam pleplei mo oli askem kwestin long samfala, blong soemaot olsem wanem ol memba blong famle​—⁠hasban, waef, mo ol pikinini​—⁠oli save givhan blong mekem famle i hapi. Laswan tok long Sarede moning, hemia “Taem Yu Talem Yes, Yu Mas Minim Yes.” Biaen, olgeta we oli naf oli save tekem baptaes.

Long Sarede aftenun, i gat tok ya “ ‘Blokem Ae, Blong Yu No Lukluk Samting We i Nating Nomo’ ” mo “ ‘Kambak Bakegen Long Man Blong Lukaot Long Sipsip We i Stap Lukaot Long Laef Blong Yu.’ ” Afta, i gat tok ya we i gat tu haf blong hem, “ ‘Yufala i Obei Long Olgeta We Oli Lidim Yufala.’ ” Laswan tok long Sarede, hem i wan impoten haf blong asembli, nem blong hem, “?Wanem Samting We Baebol i Rili Tijim?”

Bigfala tingting long program blong Sande moning hemia “ ‘Lukaotgud Blong Obei Long Ol Tok Ya, Nao Laef Blong Yufala Bambae i Ron Gud,’ ” we i stanap long Dutronome 12⁠:28. Wan tok we i gat tri haf blong hem, “Givhan Long Ol Narafala Blong Oli Obei Long Ol Tijing Blong Baebol,” i givim gudfala advaes olsem wanem blong statem mo mekem Baebol stadi long ol man.

Long lashaf blong program long Sande moning, samfala oli dresap long ol klos blong bifo blong mekem wan drama, nem blong hem “Traehad Blong Kasem Ol Mak We Oli Givim Ona Long God.” Bifo long drama ya, i gat tok ya “Ol Yangfala​—⁠?Ol Mak We Yufala i Stap Traehad Blong Kasem Bambae Oli Lidim Yufala Blong Karem Gudfala Frut?” Tok ya i mekemrere tingting blong ol man from drama we i kam biaen. Drama ya i tokbaot yangfala Timoti long Baebol, we i givim wan gudfala eksampol long ol yangfala tede, olsem wanem oli save lego samting we olgeta nomo oli wantem blong putum wok blong God long fasples long laef blong olgeta. Las tok blong asembli long Sande aftenun, hemia pablik tok ya, “?Yumi Mas Obei Long Hu?”

I gud yu mekem plan naoia blong kam. Blong faenemaot ples blong asembli we i klosap moa long yu, yu save go long Haos Kingdom blong ol Witnes blong Jeova long ples blong yu, no yu save raet i go long ol man we oli wokem magasin ya. Long Wajtaoa blong Maj 1, i gat wan lis blong ol asembli long Saot Pasifik.